VOV4.Sêdang - Kong tô mơdrăng khăng khoăng ton, têa mŏng tung tơnêi ƀă mâu long têa pơrá hiăng xiâ mê hên ƀăng klâng rơnó Xeăng Tô a tơring Čư̆ Pah, kong pơlê Gia Lai hiăng răng hlâ hên. Ai hên mâu rơpŏng rêh kâ ối tơngah to ing báu cho ki xiâm, la a rơnó kố tơkéa vâ tối hía tâi.

Ngăn a ƀăng klâng báu Ia Sah môi mơngiơk trĭng xua chếo, pôa Rơ Chăm Chíu, kuăn pơlê pơlê Mrông Yố 2, cheăm Ia Ka, tơring Čư̆ Pah, bu ‘nâi khéa hơ’nêng. Rơnó báu rơnó xeăng tô kố dêi rơpŏng tro lŭp tâi, ƀă pôa xuân tá hâi ‘nâi vâ hơ’leh hdrê pêt ki lâi vâ pêi lo liăn tung la ngiâ:

“Rơpŏng á pêt 3 sao klâng, 1 sao pêi lo châ 6 troh 7 tă, rêm hơnăm mê rơpŏng xuân bê kâ. Laga môi hơnăm kố ôh tá bê kâ tơdrêng amê vâi dế pôe dêi báu, báu răng hlâ tâi xua ôh tá ai têa hí iâ, nôkố tơnêi têa hnê mơhno pin tơtro ƀă loăng plâi ki lâi mê thế tiô tơnêi têa tê”.

Kuăn pơlê khéa kho báu tro răng hŏn hlâ tâi

Kơtăn klâng dêi pôa Rơ Chăm Chíu ôh tá hơngế, vâ chê 4 sao báu dêi pôa Rơ Chăm Luyên, xuân hiăng răng hlâ tâi. Tiô pôa Luyên, kố cho hơnăm má 2 rơpŏng ôh tá pêi lo báu tung ƀăng klâng Ia Sah.

“To lâi hơnăm hdrối ối bê kâ, 2 troh 3 hơnăm kố ôh tá ai têa, kong tô khăng khoăng ƀă báu răng hlâ tâi. Pói vâ khu râ kăn pơkuâ, Đảng, Tơnêi têa ngăn ƀăng tơnêi tíu kố hôm chiâng vâ hơ’leh pêt loăng plâi ki lâi ăm tơtro ƀă kuăn pơlê”.

Pôa Hoàng Văn Thành, Kăn phŏ pơkuâ hnê ngăn Vi ƀan cheăm Ia Ka, tơring Čư̆ Pảh tối ăm ‘nâi, hên hơnăm kố vâi krâ hdroâng Jarai, ối a cheăm ki hên pêt báu kơnôm ing têa mŏng ƀă têa ing têa plông, ôh tá ai têa ing mâu rơchôa têa, long têa. Hơnăm kố, kong tô khăng khoăng ton hâi, kơnhŏng têa xiâ, xua mê ki hên ƀăng klâng têa hiăng khăng khoăng.

Xêo apoăng ăm hlo, hiăng ai lối 70 ha báu klâng rơnó xeăng tô hiăng tro lŭp ó lơ lŭp tâi, ƀă vâ chê 200 rơpŏng kuăn pơlê tro tơdjâk, ki hên a pơlê Mrông Yố 1 ƀă 2. Pôa Hoàng Văn Thành, tô tuăn, tâng khu râ kăn kơpêng ôh tá rĕng hnê mơhno, tơkŭm po ăm kuăn pơlê hơ’leh hdrê pêt, tro lŭp tung rơnó pêi báu rơnó xeăng tô kô pơtối tung mâu hơnăm la ngiâ:

“Klăng roh kố xuân pơkâ thế khu râ kăn ai hnoăng ai troăng pêi, ai kơxô̆ liăn tŏng kum ăm vâi krâ vêh pêi kâ. Tiô tối hdrối mê mơni mâu hơnăm la ngiâ pơtối tro kong tô khăng khoăng, Vi ƀan cheăm kô tơrŭm ƀă mâu kơ koan râ kơpêng mê khu râ kăn cheăm xuân tơrŭm krá tơniăn ƀă kuăn pơlê vâ hnê mơhno vâi krâ pêt mâu loăng plâi iâ hâi tơtro ƀă hơ’leh hdrê pêt tơtro ƀă kong prâi tơnêi tíu tung rơnó tô dêi mâu hơnăm pơtối”.

Môi ƀăng klâng tro khăng khoăng pro báu răng hŏn hlâ trĭng tâi tâng

Pôa Trần Đắc Thắng, Kăn phŏ pơkuâ ‘na pêi chiâk deăng ƀă mơnhông mơdêk thôn pơlê tơring Čư̆ Pảh tối ăm ‘nâi, kơ koan hiăng pêi pro tơdroăng séa ngăn tâi tâng ƀăng pêt báu rơnó xeăng tô tung tơring. Rơnó xeăng tô hơnăm kố, lâp tơring pêt lối 1.700 ha báu mê ai troh 170 ha tro kong tô khăng khoăng ƀă tro lŭp tâi. Vâ tơleăng  tơdroăng ‘na loăng plâi, ki rơhêng cho báu dế trâm kong tô khăng khoăng, pôa Trần Đắc Thắng, tối ăm ‘nâi:

“Ƀơrô pơkuâ ngăn ‘na pêi chiâk deăng ƀă mơnhông thôn pơlê tơrŭm krá tơniăn ƀă Tíu xiâm kum tung pêi chiâk deăng xuân môi tiah Vi ƀan mâu cheăm pêi pro séa ngăn tâi tâng ƀăng rơnó Xeăng tô, ki rơhêng vâ tối ƀă báu. Bu xúa tung mâu ƀăng deăng tơniăn bê têa tôh, ƀă mâu kơpong kong tô khăng khoăng mê pơchân kuăn pơlê hơ’leh hdrê pêt tơtro vâ kong tô khăng khoăng ôh tá tơdjâk troh kuăn pơlê”.

Hoàng Qui chêh

A Sa Ly tơplôu ƀă tơbleăng