VOV4.Sêdang - A kơpong Tây Nguyên, mâu kong pơlê hiăng pêi pro khế Kŏng nhân ƀă hên tơdroăng pêi ki pơxúa. Jâ Trần Lệ Nhung – Kăn hnê ngăn Liên đoân pêi cheăng kong pơlê Gia Lai tối ăm ‘nâi: Vâ pêi pro châ tơƀrê Khế Kŏng nhân hơnăm 2021, pakĭng tơdroăng pơtối tơkŭm po mâu tơdroăng dế mơnhông mơdêk châ tơƀrê, châ kơdrâm đoân viên, mơngế pêi cheăng tơdah, mâu khu râ Kŏng đoân tung kong pơlê ối tơkŭm pêi pro tơ’nôm 4 tơdroăng ki xiâm, mê cho: tơdroăng “75 rơpâu troăng tơmiât pêi rơkê, tơkâ hluâ pá puât, mơnhông mơdêk”;  tơdroăng “Tơmâng – Plĕng – kum dêi pó’’ ƀă đoân viên ƀă mơngế pêi cheăng; tơkŭm po mâu tơdroăng: “Mơnê mơngế pêi cheăng” ƀă kheăn kơdeăn đoân viên, mơngế pêi cheăng troh mâu râ Kŏng đoân tung kong pơlê.

Gia Lai tŏng kum mơjiâng, rơnêu “Toăng hngêi tuăn pâ Kŏng đoân”

Roh kố Liên đoân pêi cheăng kong pơlê Gia Lai hiăng mơhnhôk khế pêi pro tơdroăng rak tơniăn pêi cheăng hơnăm 2021 tơkŭm po sap hâi lơ 1 troh lơ 31/5 ƀă dó inâi “Thăm mơnhên, mơdât mâu tơdroăng ki ôh tá tơniăn tung pêi cheăng ƀă tơdroăng ki veăng dêi rak tơniăn dêi mơngế pêi cheăng”.

A leh mơhnhôk, Liên đoân pêi cheăng kong pơlê hiăng xo 530 rơtuh liăn ing Khu pơkuâ râng liăn kum rêh ối pơlê pơla vâ tŏng kum mơjiâng nếo ƀă rơnêu 17 “Toăng hngêi tuăn pâ Kŏng đoân” ăm đoân viên, mơngế pêi cheăng pá puât ‘na hngêi ối’’.

*** Klêi kơ’nâi leh tơbleăng dêi Liên đoàn Lao động kong pơlê Gia Lai, Kong đoàn Kŏng ti pêi cheăng tiô rơnó môi tung khu pêt kơxu Čư̆ Pah xuân hiăng tơkŭm po leh tơbleăng Khế Kŏng nhân ƀă Khế pêi pro ‘na tơniăn tung pêi cheăng hơnăm 2021. Tung Khế Kŏng nhân ƀă Khế pêi pro tơ’niăn tung pêi cheăng hơnăm kố, Kong đoân Kŏng ti kô ai mâu tơdroăng cheăng pêi pro môi tiah: tơkŭm po tối tơbleăng trâu hngế troh tâi tâng tá đoân viên, mâu ngế pêi cheăng ‘na ki pơxúa dêi hâi pêi cheăng Lâp plâi tơnêi; tối tơbleăng ‘na troăng hơlâ mơjiâng yai kâp kŏng nhân Việt Nam tiô tơdroăng pơkâ dêi Hneăng hôp 13 dêi Đảng; tơkŭm po mâu rôh trâm kuăn pơlê ƀă mâu ngế pêi cheăng tiô inâi “Tơmâng – ‘Nâi plĕng – Veăng tơdjuôm tơdroăng ki mê”, mơdêk tơdroăng ki mơnhên tối, séa ngăn mâu tơdroăng ki kô trâm tơdroăng ôh tá mơhúa tung pêi cheăng, ƀă veăng pêi pro tung tơdroăng tơniăn sinh viên.

Pakĭng mê, Kŏng đoan Kŏng ti kô tơkŭm po hên rôh lăm pôu, hbru tơmeăm ăm kŏng nhân ki ai tơdroăng rêh ối xơpá, tro xía vâ tung pêi cheăng; mơjiâng ƀă pơcháu mâu toăng hngêi “Hơtôu Kong đoân” ăm rơpŏng kŏng nhân ki xơpá ‘na hngêi ối.

Gương - A Sa Ly tơplôu ƀă tơbleăng