VOV4.Sêdang - Kơxo lơ 15/3, Khu rak ngăn tơniăn troăng prôk kong pơlê Gia Lai tơkŭm po Leh tơbleăng rôh hnê tối, hnê hriâm luât ƀă lăm pơtrui ngăn pơkâ tơleăng mâu ngế ki pro xôi luât, tơniăn a troăng prôk a mâu droh rơtăm mâu hdroâng kuăn ngo vâ pro kơdroh tơdroăng ki tơklâm rơxế a troăng prôk tung hdroâng kuăn ngo dêi kong pơlê.

Gia Lai: Pêi pro kơtăng kơdroh tơdroăng tơklâm rơxế a troăng prôk kơpong hdroâng kuăn ngo

Tiô Khu ngăn tơdroăng tơniăn troăng prôk kong pơlê Gia Lai, bu tung 2 khế apoăng hơnăm kố, a kong pơlê hiăng ai 56 rôh tơklâm rơxế ki râ, pro 46 ngế hlâ ƀă lối chât ngế ki ê tro rong. Lối tơdế kơxô̆ ngế ki tơdjâk troh rơtăm hdroâng kuăn ngo. Khu rak ngăn tơniăn troăng prôk kong pơlê Gia Lai ăm ‘nâi, rôh ki tối tơbleăng, hnê hriâm ‘na luât ƀă lăm pơtrui ngăn hbrâ mơdât mâu ngế ki pro xôi, rak tơniăn a troăng prôk a mâu vâi rơtăm hdroâng kuăn ngo ki xiâm cho vâ mơdêk ki tơ-ƀrê pêi pro luât rak tơniăn troăng prôk a thôn pơlê, kơpong hdroâng kuăn ngo, malối cho mâu tiú ki ai troăng kân prôk tơkâ luâ.

Katarina Nga tơplôu ƀă tơbleăng