VOV4.Sêdang - Rơtế ƀă lâp tơnêi têa, Khu rak ngăn tơniăn troăng prôk kong pơlê Gia Lai tơkŭm po leh tơbleăng hnê hriâm luât ƀă lăm pơtrui ngăn pơxâu phak mâu ngế ki pro xôi, rak tơniăn a troăng prôk tung mâu droh rơtăm hdroâng kuăn ngo vâ pro kơdroh tơdroăng ki tơklâm rơxế drô troăng prôk tung kơpong hdroâng kuăn ngo dêi kong pơlê.

Tiô khu ngăn ‘na rak tơniăn drô troăng prôk kong pơlê Gia Lai, bú tung 2 khế apoăng hơnăm kố, a kong pơlê kố ai 56 hdroh tơklâm rơxế drô troăng prôk ki rơ-iô ó, pro 46 ngế hlâ ƀă chât ngế ki ê tro rong. Luâ tơdế kơxô̆ rôh tơdjâk troh mâu phô̆m xông kân hdroâng kuăn ngo. Tung mê, cheăm Ia Hrú hiăng ai 5 ngế hlâ. Pôa Huỳnh Thái Nghiêm, Kăn hnê ngăn Vi ƀan cheăm Ia Hrú, tơring Čŭ Pưh ăm ‘nâi, tŭm 5 ngế xuân ôh tá truâ muâk rak vế ko, 2 ngế hâi ai ƀâng vê rơxế mô tô. Tơdrêng ƀă mâu tơdroăng ki xiâm mê, pôa Nghiêm tối, ai môi tơdroăng xôi xúa ing tơmiât nôu pâ mơjo phĕng kuăn ‘nĕng luâ kơ tơdroăng a pơlê kố:

“Rơpŏng hngêi mơjo phĕng dêi kuăn ‘nĕng ‘na rơxế to. Mơhé ôh tá ai liăn, la rơpŏng hngêi xuân khŏm rôe rơxế ăm dêi kuăn. Tơdroăng kuăn ‘nĕng kơto rơxế kơtâu drô troăng vâi hâi hlê tŭm, mê chiâng trâm mâu tơdroăng kheá kho môi tiah mê.  Nôu pâ, nhŏng o tung rơpŏng hngêi kơdrâ khât, ôh tá tơmiât dêi kuăn tơná hiăng troh hơnăm phô̆m xông kân, kơto rơxế kơtâu drô troăng hlâ tiah mê, kơdrâ ti mê. Vâi khéa kho tung hiâm tuăn’’.

Tối nhên mâu rôh tơklâm rơxế drô troăng kân tung kơpong hdroâng kuăn ngo, Khu ngăn ‘na rak tơniăn drô troăng prôk kong pơlê Gia Lai ăm ‘nâi,  hên ngế ki tơklâm rơxế cho mâu ki phô̆m xông kân ƀă mâu rơtăm, cho mâu ki dế tro hơnăm pêi cheăng tung rơpŏng hngêi. Tơdroăng xôi pro chiâng ai tơklâm rơxế ki hên cho ing mâu tơdroăng hâi teăm tro hơnăm ăm phêp vê rơxế la hiăng kơto rơxế kơtâu drô troăng, kơto rơxế hon đa phân khô̆i têi, ôu drôu ƀiê̆r drêng kơto, kơto têi luâ tơdroăng ăm phêp, ôh tá truâ muâk rak vế ko,  to ƀa gai  ƀă hên ki ê hâi châ ‘nâi, hâi teăm châ mơdât.

Pôa Nguyễn Văn Hạnh, Ngế xiâm phŏ pơkuâ ngăn troăng prôk rơxế kơtâu, Phŏ ngăn ‘na rak tơniăn drô troăng prôk kong pơlê Gia Lai ăm ‘nâi rôh hnê tối ‘na luât ƀă seá ngăn vâ pơxâu phak mâu ngế pro xôi luât pro ôh tá tơniăn troăng prôk tung mâu phô̆m xông kân mâu rơtăm kuăn ngo ai pơkâ vâ mơdêk hnê mơhno tơ-ƀrê tơdroăng rak vế tro luât pro tơniăn drô troăng prôk a mâu thôn pơlê, kơpong hdroâng kuăn ngo, malối a mâu tíu ai troăng kân tơkâ luâ.

Tung mê, kong pơlê tơmâng khât mâu tơdroăng tơrŭm hnê mơhno ƀă pơxâu phak kơtăng mâu ngế pro xôi luât  prôk drô troăng:

“Má môi, tơrŭm hnê tối lâp lu ƀă hnê tối krê ăm mâu ngế rơtăm ki hmâ ôu drôu, ki hmâ tơhôu, ki lơ ƀa gai drêng kơto rơxế kơtâu drô troăng kân. Má peá nếo cho seá ngăn, tí tăng ngăn, ôh tá xê to a mâu troăng kân mê ối thế tăng ngăn a mâu troăng kân tung thôn, malối a mâu troăng kân ing mâu pơlê troh a troăng kân xiâm vâ mơdât ing xiâm ki pro chiâng ai tơklâm rơxế a troăng kân’’.

Veăng leh mơhnhôk, ngoh Siu Hiên, ối a pơlê Rú Rưng, cheăm Ia Hrú ăm ‘nâi:

“A la ngiâ kô ah drêng kơto rơxế kơtâu drô troăng prôk kô mơ-eăm râk vế tro troăng hơlâ dêi Đảng, Luât tơnêi têa pơkâ. Hdrối vâ kơto rơxế prôk a troăng kân a kô xâo muâk rak ko, ôh tá ôu drôu ƀiêr, ôh tá to ƀa gai, ôh tá pong, ‘mâi rơnêu vŏng ngôi rơxế’’.

Rôh hnê tối ‘na luât ƀă tí tăng seá ngăn pơxâu mâu ki pro xôi luât pơto rơxế prôk drô troăng tung mâu ngế phô̆m xông kân, mâu rơtăm hdroâng kuăn ngo tung kong pơlê Gia Lai po tung 3 khế, sap nôkố ta troh khế 6.

Nguyễn Thảo chêh

Gương tơplôu ƀă tơbleăng