VOV4.Sêdang - Hâi lơ 4/4, ai 50 ngế kăn ƀô̆ khăm pơlât a hngêi pơkeăng mâu ngế tro tâ COVID 19 kong pơlê Gia Lai hiăng pêi kêi đeăng tơdroăng klâ ối kơtăn 14 hâi, vêh a tíu pêi cheăng pơtối cheăng. Tơdrêng amê, Vi ƀan kong pơlê Gia Lai hiăng pơkâ pơtê cheăng Hngêi pơkeăng pơlât mâu ngế tro tâ COVID 19. Tiô pơkâ dêi Vi ƀan kong pơlê Gia Lai, Hngêi pơkeăng pơlât mâu ngế tro tâ pơreăng COVID 19 pơtê cheăng sap ing hâi lơ 5/4.

Mâu ƀok thái pơkeăng pơlât mâu ngế tro tâ Covid 19 a Gia Lai châ pâk vaccin apoăng

Tung pơla pêi cheăng, rơtế ƀă tơdroăng tŏng kum pêi cheăng ing Hngêi pơkeăng kân Chợ Rẫy, Pơlê kong kân Hồ Chí Minh ƀă Hngêi pơkeăng xôh pơkeăng kơdê pơreăng Tây Nguyên, hngêi pơkeăng hiăng pêi kêi đeăng hnoăng cheăng pơlât prêi ăm 27 ngế tro tâ pơreăng a kong pơlê.

Tiah mê, troh nôkố, mâu kăn ƀô̆ khăm pơlât má mơ’nui a tíu hbrâ mơdât pơreăng COVID 19 a Gia Lai hiăng pêi kêi đeăng hnoăng cheăng, vêh pơtối pêi cheăng.

            A Sa Ly tơplôu ƀă tơbleăng