VOV4.Sêdang - Vi ƀan hnê ngăn kong pơlê Gia Lai nếo ai hlá mơ-éa pơtroh tơdrêng pơkâ thế mâu tơring, cheăm tung lâp kong pơlê pơtê mâu tơdroăng ki ối tơkŭm hên mơngế, tơdroăng ki tơkŭm po ôh tá kal vâ hbrâ mơdât pơreăng sap ing 12 chôu măng dế lơ 8/5. Tiô tơdroăng ki chêh tung hlá mơ-éa, Vi ƀan hnê ngăn kong pơlê Gia Lai pơkâ thế mâu tơring, cheăm tung lâp kong pơlê pơtê mâu tơdroăng pêi pro mơhno túa lĕm tro, tơ’noăng ivá, mơdĭng, tơkŭm po tơdroăng ki ai hên mơngế; pơtê pơtân mâu tơdroăng ki ôh tá kal môi tiah karaoke, kuăn bar, tíu kơhnhon xoâng, tiê bliê, tíu ki mơđah phim, mâu tíu ki xah hêi điê̆n tưh, internet, tíu klê têa ƀă hên tíu ki ê sap ing 12 chôu măng dế hâi lơ 8/5.

Ai mâu tíu mơjiâng pro, tê mơdró kuăn kơphế, tíu kâ, tíu ôu têa, tơ’noăng ivá tung hngêi châ pêi cheăng la athế pêi pro tiô mâu tơdroăng pơkâ ki hbrâ mơdât pơreăng; kuăn pơlê lăm ôm hyô a mâu kơpong tíu xối tơbâ, lơ a mâu tíu ôm hyô athế truâ kên pâng môh rơkong. Vi ƀan hnê ngăn kong pơlê Gia Lai pơkâ thế kơvâ ngăn pơkeăng ƀă khăm pơlât rak tơniăn tơdroăng ki hbrâ mơdât pơreăng pôi tá ăm pơreăng tâ tú; mơdêk séa ngăn, pơxâu phak mâu ngế ki ôh tá tro kên pâng môh rơkong a tíu ối tơdjuôm. Riân troh kơxê lơ 7/5, Gia Lai hiăng pêi klêi tơdroăng ki pâk lối 18 rơpâu klŏng vaccine hbrâ mơdât COVID-19.

Katarina Nga tơplôu ƀă tơbleăng