VOV4.Sêdang - Khu hnê mơhno cheăng hbrâ mơdât pơreăng COVID-19 kong pơlê Gia Lai nếo pơkâ túa ‘na rak tơniăn hnoăng cheăng khăm pơlât ƀă tơniăn hbrâ mơdât pơreăng COVID-19 ăm rôh tâ phĭu pôk kăn Kuô̆k hô̆i hneăng má 15 ƀă kăn Hô̆i đong hnê ngăn rêm hơnăm 2021 – 2026. Ki xiâm dêi túa pơkâ cho rak tơniăn tơbleăng tơdâng tơ’mô hnoăng cheăng khăm pơlât vâ hbrâ mơdât pơreăng COVID-19 mot tâ tú a kong pơlê; tơdrêng amê hnối rak tơniăn hnoăng cheăng khăm pơlât, mơgrúa lĕm kế kâ, rĕng pơkâ tơleăng drêng ai tơdroăng ki kơdrâ ai tơdroăng ôh tá tơniăn ‘na ivá ăm mâu ngế ki tơbriât cheăng, kăn ƀô̆ veăng tung tôh tâ phĭu ƀă kuăn pơlê hdrối, tung pơla po mâu tơdroăng dêi rôh tâ phĭu.

Tiah mê, pơkâ thế châ tâi tâng tíu tâ phĭu tung kong pơlê xúa mâu troăng hơlâ hbrâ mơdât pơreăng COVID-19; châ xôh pơkeăng ƀă Cloramin B hdrối ƀă klêi kơ’nâi rôh tâ phĭu; mâu tơdroăng dêi rôh tâ phĭu pêi pro tŭm tơdroăng ki hnê tối 5K dêi Khu xiâm ngăn pơkeăng.

Katarina Nga tơplôu ƀă tơbleăng