VOV4.Sêdang - Khu hnê mơhno cheăng hbrâ mơdât pơreăng COVID-19 dêi kong pơlê Gia Lai hiăng tơkŭm po hôp ‘no tơdrêng ing um tơvi ƀă Khu hnê mơhno cheăng mâu tơring, pơlê kong krâm, pơlê kong kơdrâm pơtối tối tơbleăng hnoăng cheăng hbrâ mơdât pơreăng, rak tơniăn tâ phĭu pôk kăn Kuô̆k hô̆i hneăng má 15 ƀă Hô̆i đong hnê ngăn kuăn pơlê rêm râ hơnăm 2021 – 2026.

A rôh hôp, Khu hnê mơhno hiăng tơbleăng tơdroăng ƀă hnê mơhno nhên hnoăng cheăng hbrâ mơdât pơreăng COVID-19 ƀă rak tơniăn rôh tâ phĭu. Tơpui mơgêi rôh hôp, Vi ƀan hnê ngăn kong pơlê pơkâ thế mâu kơvâ cheăng, tơring, cheăm ai túa pơkâ môi tuăn tung hnoăng cheăng hbrâ mơdât pơreăng, rak tơniăn mâu rơxế, malối cho hbrâ rơnáu tơdroăng ki rak vế châ ăm mâu khu ki veăng pêi dêi hnoăng cheăng.

Vi ƀan hnê ngăn kong pơlê thế athế môi tuăn ‘na túa pơkâ khăm pơlât ƀă pơkâ tơleăng phĭu tơtro, môi tuăn mâu troăng hơlâ rak tơniăn pơkâ thế pêi pro kơtăng ‘na hbrâ mơdât pơreăng COVID-19 tung rôh tâ phĭu.

Katarina Nga tơplôu ƀă tơbleăng