VOV4.Sêdang - Troăng hơlâ mơhnhôk mơjiâng pro on tơhrik kơtâu ƀă hyôh tô trâ mâ hâi dêi Ngế pro xiâm hnê ngăn Chin phuh a tơdroăng 13/2020/QĐ- TTg cho troăng hơlâ ki tơtro vâ rak vế kring on tơhrik tơnêi têa. Ki khât gá a kong pơlê Gia Lai, drêng tơbleăng troăng hơlâ kố, tơtro ƀă tơdroăng ki hên khu mơdró kâ kơchuâ tơdroăng tơkêa pêi chiâk deăng vâ pơxúa ing yă tê on tơhrik ki hên má môi pơkâ ăm on tơhrik kơtâu ƀă hyôh tôu hâi mâ ‘măn kuâ hngêi, mê tơdroăng ki khu mơdró kâ rơlối on tơhrik ‘no tâk péa hdroh tâng vâ pơchông ƀă tơdroăng ki rơhêng vâ xúa on tơhrik dế pro lối hrĭng khu mơdró kâ ‘no liăn cheăng ăm kơvâ cheăng kố tro pơkâ thế pơtê (tơkéa vâ tối cho tah lôi, ôh tá roê on tơhrik) hơ’leh dêi rơpó.

Tơdroăng kố hiăng hlo sap ing apoăng hơnăm 2021 troh nôkố, ƀă tá hâi ‘nâi troh drêng lâi nếo pơtê, pro khu ki ‘no liăn cheăng ôh ti ‘nâi pro tiah lâi xua ‘no hên liăn pơtê tung tơdroăng mơdró.

Pôa Võ Ngọc Qúy, Phŏ pơkuâ On tơhrik kong pơlê Gia Lai tối, kơvâ on tơhrik hiăng tối hdrối tơdroăng rơlối on tơhrik tung hơnăm 2020, drêng pêi pro  tơdroăng môi tuăn tơdjêp on tơhrik ƀă khu tê mơdró. Xua mê, 70/463 khu mơ’no liăn cheăng môi tuăn tơdjêp on tơhrik mơ’nui hơnăm 2020 thế kĭ môi tuăn tơ’nôm ‘na tơdroăng tro tơpâ on tơhrik tâng rơlối hên, môi tiah môi  tơdroăng pơkâ vâ châ kơvâ on tơhrik tơdjêp troăng on tơhrik ƀă kĭ tơkêa tê rôe. Tơdrêng amê, ai 35 tíu pơkâ krâ tơ’nôm tơmeăm vâ khu pơkuâ on tơhrik tơpâ on tơhrik ing hơngế tâng drêng kal.

Nhên khât nôkố, tâi tâng ivá on tơhrik dêi mâu on tơhrik kơtâu ƀă mâ hâi ki pro krâ kơpêng hngêi a Gia Lai cho lối 603 MWp, hên tâ châ péa xôh tiô kal vâ xúa on tơhrik dêi kong pơlê cho 300 MWp.  Tơdroăng kố tơ’nôm tơdroăng xêo mơdêk xúa on tơhrik dâng 10%/hơnăm dêi kơvâ on tơhrik hlêk tơ-ê ƀă  tơdroăng ki ai khât, pro tơdroăng on tơhrik hiăng rơlối, mê nôkố thăm rơlối hên tâ nếo:

“Drêng tơdjêp krâ on tơhrik, tiô xêo dêi kơvâ on tơhrik tŭm ivá mơ’no dêi khu mơ’no liăn cheăng. Laga, xua ai tơdjâk dêi pơreăng COVID 19, kơlo mơdêk on tơhrik ôh tá môi tiah xêo cho 9 troh 10%/hơnăm, laga nhên khât bu tâk 1 troh 2%. Tiah mê u ối 70 troh 80% rơlối ƀă thế tơ’mot a troăng kơxái on tơhrik, chiâng pro rơlối on tơhrik hên. Khu 1 hiăng ối tung tơdroăng ki xêo hdrối cho rơlối xua mê vâi tơkêa, vâi thế pôu râng. Mê cho tơdroăng ki ôh tá tơniăn tung mơ’no liăn, mê khu mơ’no liăn thế veăng kum ƀă kơvâ on tơhrik tê’’.

Jâ Trần Thị Diễm, ngế pơkuâ dêi on tơhrik krâ pêng kuâ hngêi tíu kơdroăng păn mơnăn ivá 1MWp a cheăm Čŭ Hậu, tơring Ia Grai, Gia Lai tối ăm ‘nâi, sap khế 1/2021 troh nôkố, rêm măng tĭng, on tơhrik 1MWp dêi jâ tro tơpâ 1 hâi, pro lŭp 50 rơtuh liăn/khế. Jâ Diễm tối ăm ‘nâi: vâ mơ’no pro on tơhrik kố, jâ mơ’no liăn 15 rơtal liăn, tung mê, mung liăn ngân hngêi arak liăn 10 rơtal liăn. Tiô xêo  apoăng, tâng on tơhrik kơtâu tâi ivá, mê klêi kơ’nâi 7 hơnăm kô châ xo tơvêh dêi liăn mơ’no. Laga, tơdroăng tơpâ on tơhrik đi đo kố pro pơkâ tê mơdró dêi jâ chiâng tơ-ê:

‘’Á hlo mơ’nhê on tơhrik tê kơtê ‘nâng, tơdjâk ki châ pơxúa dêi khu tê mơdró.  Nôkố, tiô hâi khế tơpâ dêi On tơhrik Gia Lai, mê ngin tro tơpâ 4 troh 6 hâi/môi khế, tơdjâk troh tơdroăng pêi lo liăn rêm khế dêi ngin châ to lâi chât rơtuh, pro hrá tơdroăng chêl liăn hngêi arak liăn, pá tung tơdroăng tăng liăn’’.

Ki nhên khât,  nôkố, tâi tâng 463 tíu krâ pro on tơhrik a kuâ hngêi a kơdroăng păn mơnăn a Gia Lai pơrá tro tơpâ on tơhrik tiô 2 tơdroăng cho thâ ƀă tiô pơkâ tối hdrối. Pơtối mê, mâu tíu cheăng hiăng pơkâ krâ kế ki vâ tơpâ, tơpâ ing hơhngế kô tro tơpâ thâ, tâng drêng lâi rơlối on tơhrik, rơlối lối hên. Ƀă mâu tíu on tơhrik ki ê kô tro tơpâ sap ing 4 troh 10 hâi/1 khế. Ki rơhêng vâ tối tơ’nôm,  cho tơdroăng tơpâ on tơhrik đi đo a kơhâi, drêng ki tô mâ hâi lối tô, xuân cho drêng kơmăi kố hrik on tơhrik châ hên má môi.

Môi ngế pơkuâ kơdroăng păn mơnăn mơ’no 15 rơtal liăn pro vâ chê 1MWp on tơhrik kơtâu ƀă mâ hâi a kuâ hngêi a tơring Ia Grai tối, mơhé ôh tá kĭ môi tuăn tơpâ on tơhrik, laga xuân đi đo tro tơpâ on tơhrik, tối ăm ‘nâi:

“Tung môi hâi tro tơpâ on tơhrik mê cho hía 8 rơtuh liăn, hâi khế vâ châ xo dêi liăn mơ’no chiâng ton. Tiô tơdroăng tê mơdró ƀă dêi pó cho ôh tá tơdâng tơ’mô. Xua khu mơ’no liăn cheăng ing tơdroăng xêo kô châ pơxúa ăm dêi tơná chiâng ngế ki pá xua mơjiâng pro châ to mê on tơhrik, mê ôh tá ‘nâi kô tê châ to lâi, mê chiâng ôh tá ‘nâi chôu châ xếo’’.

Pôa Phạm Văn Binh, Kăn pơkuâ Khu pơkuâ Kơmăi kơmok – tê mơdró kong pơlê Gia Lai tối ăm ‘nâi, kong pơlê ai ki tô mâ hâi cho tô hên ƀă ai kơmăi kơmok hrik xo on tơhrik tơtro vâ mơjiâng on tơhrik kơtâu ƀă mâ hâi. Laga, thế troh drêng ai troăng hơlâ mơhnhôk a Pơkâ 13/2020 mê mâu khu mơ’no liăn cheăng nếo môi tuăn khât. Tung hơnăm 2020, ing kơxô̆ liăn rơpâu rơtal liăn dêi mâu khu mơ’no liăn cheăng, kơvâ on tơhrik hiăng ai tơ’nôm tíu xúa on tơhrik tơdâng ƀă ivá on tơhrik dêi On tơhrik Ia Ly.

Laga, ki nhên khât nôkố, tơdroăng on tơhrik môi tuăn tơdjêp on tơhrik môi xôh, pro tíu mơjiâng on tơhrik rơlối châ péa xôh tâng pơchông ƀă tơdroăng ki xúa chiâng ai tơdroăng tơpâ on tơhrik dế pro mơ’nhê tê kơtê on tơhrik ki krúa ƀă mơ’nhê kơxô̆ liăn dêi khu mơ’no liăn cheăng. Tiô tung tơdroăng tơrŭm tê mơdró, ƀă cho khu ki rôe on tơhrik, laga kĭ tơdjêp hên khu mơ’no liăn pro on tơhrik, pro mơjiâng pro hên kal vâ iâ, mê hlo nhên khât EVN dế mơjiâng môi roh tê rôe bu khu on tơhrik tê châ pơxúa, pro ki ôh tá châ pơxúa ăm mâu khu mơ’no liăn cheăng, djâ vâi chiâng pá xua on tơhrik kơtâu ƀă mâ hâi.

Nguyễn Thảo chêh

A Sa Ly tơplôu ƀă tơbleăng