VOV4.Sêdang - Drêng pơreăng COVID 19 xông tâ tú ó tung tơnêi têa, pơlê kong kơdrâm Plei Ku, kong pơlê Gia Lai ai mơ-éa pơkâ mâu hngêi trung mâm non ăm vâi hdrêng pơtê hriâm sap hâi lơ 13/5 vâ hbrâ mơdât pơreăng. Tơdrêng amê, Vi ƀan kong pơlê Gia Lai xuân ai hlá mơ-éa thâ pơkâ mâu kơvâ hnê hriâm thâ mơgêi hơnăm hriâm hdrối hâi lơ 16/5.

Gia Lai: Thâ mơgêi hơnăm hriâm vâ hbrâ mơdât COVID 19

Ƀă kong pơlê Gia Lai, Vi ƀan kong pơlê hiăng ai hlá mơ-éa thâ pơkâ Khu pơkuâ hnê hriâm ƀă hnê mơjiâng tuăn ngôa rơkê hnê mơhno mâu hngêi trung ăm hok tro pơtê hriâm hdrối hâi lơ 16/5 vâ hbrâ mơdât pơreăng COVID 19.

Mâu hngêi trung hriâm a kong pơlê xuân hiăng teăm tơdrêng ‘nâi troăng hơlâ mơgêi hơnăm hriâm rĕng vâ hbrâ mơdât pơreăng, thâ tơkŭm po hneăng tơ’noăng hneăng má 2 ƀă pêi pro hriâm vâ tơ’noăng mơ’no tơdrêng tung um tơvi ăm hok tro râ má pái phôh thong.

A Sa Ly tơplôu ƀă tơbleăng