VOV4.Sêdang - Ƀok thái pơkeăng Hồ Ngọc Gia – Kăn pơkuâ Tíu xiâm mơdât pơreăng kong pơlê Gia Lai tối ăm ‘nâi: Sap apoăng hơnăm troh nôkố, lâp kong pơlê châ hlo 164 ngế tro tơngê lo mơheăm, kơdroh 63% tâng pơchông ƀă roh kố hơnăm nah. Kơxô̆ mơngế tro pơreăng tơkŭm a mâu tơring: Krông Pa, Phú Thiện, pơlê kong kơdrâm Plei Ku ƀă pơlê krâm Ayun Pa. Mơhé kơxô̆ mơngế tro tơngê lo mơheăm kơdroh tâng pơchông ƀă roh kố hơnăm hdrối, laga ôh tá xê to ti mê, mê hlo ối hên khu ngế lối tơngôu tung tơdroăng hbrâ mơdât pơreăng.

Tíu xiâm mơdât pơreăng kong pơlê kơjo thế ai tŭm mâu ngế pơlât tơngê lo mơheăm tung kong pơlê, khu ki pêi cheăng a hngêi pơkeăng tơring ƀă kăn ƀô̆ pêi cheăng a hngêi pơkeăng cheăm pêi pro tơdroăng hbrâ mơdât tơngê lo mơheăm a pơlê pơla. Rơtế amê, pơtối tơdroăng ki veăng dêi khu xiâm kal kí a mâu tíu cheăng tung tơdroăng hbrâ mơdât; thăm pơtâng tối, mơhnhôk kuăn pơlê veăng tung tơdroăng kơdê kiâ ngu ngĕng.

A Sa Ly tơplôu ƀă tơbleăng