VOV4.Sêdang - Kong pơlê Gia Lai hiăng mơdêk tối tơbleăng mâu tơdroăng ‘na rôh tâ phĭu pôk kăn Kuô̆k hô̆i hneăng má 15 ƀă kăn Hô̆i đong hnê ngăn kuăn pơlê rêm râ hơnăm 2021 – 2026 a kơpong hdroâng kuăn ngo ƀă hên tơdroăng ki ai khât, tơtro ƀă khôi túa lĕm tro tơrêm hdroâng kuăn ngo. Tiah mê, kong pơlê Gia Lai hiăng pơcháu ăm kơ koan rah chêh mâu tơdroăng ki tơtro, ai pơxúa, tơ’lêi hmâng, tơ’lêi hlê tơdrêng amê hnối tơplôu lo péa ‘nâl: Xuăn ƀă Jarai vâ kuăn pơlê tơ’lêi hlê, tơ’lêi hmâng.

Tơdroăng ki tối tơbleăng mê cho tơkŭm tung tơdroăng ki kal, ai pơxúa dêi rôh tâ phĭu pôk kăn, mâu tơdroăng ‘na luât ki ai tơdjâk troh môi tiah luât hơnăm 2013, Luât pôk kăn Kuô̆k hô̆i ƀă pôk kăn Hô̆i đong hnê ngăn kuăn pơlê mâu hlá mơ-éa hnê mơhno ‘na rôh tâ phĭu dêi tơnêi têa, dêi Vi ƀan pơkuâ Kuôk hô̆i ƀă Hô̆i đong tâ phĭu tơnêi têa. Vâ hnoăng cheăng tối tơbleăng châ tơƀrê, Vi ƀan tâ phĭu rêm râ a kong pơlê Gia Lai hiăng mơhnhôk mâu krâ pơlê, mâu ngế ki châ kuăn pơlê loi nhuô̆m a mâu pơlê cheăm ki veăng tung hnoăng cheăng tối tơbleăng.

Katarina Nga tơplôu ƀă tơbleăng