VOV4.Sêdang - Kŏng ti xiâm on tơhrik Tơnêi têa ƀă Khu pơkuâ Tơdroăng tơkêa bro mâu hngêi kơmăi on tơhrik peăng Tơdế tơnêi têa tơkŭm po troăng kơxái on tơhrik 500kV Dốc Sỏi – Plei Ku 2 tơkâ tung kong pơlê Gia Lai. Troăng on tơhrik 500kV 3 Dốc Sỏi – Plei Ku 2, kơpong tơkâ Gia Lai xŏn lối 41 km, tơkâ 3 tơring cho tơring Čư̆ Păh, tơring Ia Grai ƀă pơlê kong kơdrâm Plei Ku, ƀă 99  tíu trăng on tơhrik.

Vâ tơniăn tung pêi pro, Kŏng ti on tơhrik Gia Lai kô tơkŭm po tơpâ on tơhrik troăng 110kV ing kơmăi klâ xoăng on tơhrik 500kV Plei Ku prôk a kơmăi klâ xoăng on tơhrik 110kV Diên Hồng tung pơla kố. Kŏng ti on tơhrik Gia Lai tối ăm ‘nâi, tíu cheăng hiăng po rơdâ pêi pro troăng xing xoăng on tơhrik ăm lối 200 rơpâu rơpŏng a 9 tơring ki tro tơdjâk.

Troăng kơxái on tơhrik 500kV 3 Dốc Sỏi – Plei Ku 2 cho on tơhrik ki xiâm vâ thăm mơdêk troăng kơxái on tơhrik tơnêi têa. Tiô tối hdrối, 31/3, kô pêi kêi đeăng mơjiâng troăng kơxái on tơhrik.

            A Sa Ly tơplôu ƀă tơbleăng