VOV4.Sêdang - A tơring Ea Kar ƀă pơlê kong kơdrâm Ƀuôn Ma Thuột, kong pơlê Dak Lak nếo po Hâi mơdĭng pleăng mâu kơto mơheăm Tây Nguyên hơnăm 2021. Lối rơpâu ngế kuăn pơlê pêi pro kơtăng mâu tơdroăng pơkâ hbrâ mơdât pơreăng, ối pơtăng lĕm tơkôm pleăng mơheăm.

Hâi leh pleăng kơto mơheăm khêi Tây Nguyên hơnăm 2021 cho môi tung mâu tơdroăng cheăng pêi pro kum kơto Mơheăm khêi - rơnó pơtê hriâm hơnăm 2021 ƀă tơdroăng pêi pro pleăng mơheăm khêi roh má 8, xua khu hnê mơhno dêi tơnêi têa 'na mơhnhôk pleăng mơheăm. Ƀă tơdroăng pơkâ “Môi kơto mơheăm ki ăm - môi rơxông mơngế ối rêh”, mơhé tung tơdroăng dế ai pơreăng tâ tú rơ -iô a hên tíu, kuăn pơlê Dak Lak xuân mơ-eăm pleăng dêi mơheăm.

Rêm ngế xuân râk vế pêi pro tro tiô pơkâ 5K dêi Khu xiâm ngăn pơkeăng ƀă khăm pơlât, mơ-eăm pơtăng tơkôm vâ troh dêi tơná vâ chêh inâi pleăng mơheăm. Ngoh Trương Văn Lợi, ngế pêi cheăng a Khu ngăn mơdró tíu tơkăng kong dêi kong pơlê Dak Lak ăm ‘nâi:

“Pêi pro tiô rơkong krếo thế ing Khu pơkuâ ngăn Đoân mê á xuân veăng pleăng mơheăm tơchoâm ƀă lâp tơnêi têa vâ troh tah COVID-19. Veăng pleăng mơheăm mê xuân hbrâ mơdât pơreăng tiô pơkâ 5K. Klêi rêm rôh pleăng mơheăm á xuân púi vâ veăng kum kơto mơheăm tơná ăm mâu ngế ki ôh tá mơhuá dế kal vâ mơheăm”.

Tíu xo mơheăm châ po a tíu pro tơniăn vâ hbrâ mơdât pơreăng

Tung rôh pleăng mơheăm mê ôh tá xê to kuăn pơlê tung pơlê kong kơdrâm Ƀuôn Ma Thuột mê ai hên mâu ngế lo ing tơring ki achê veăng pleăng. Nâ Nguyễn Thị Hương, cô hnê hngêi trung râ má pái Quang Trung, tơring Krông Pač, kong pơlê Dak Lak xuân rĕng troh amê ing hdrối, tối: 

“Rêm hơnăm a veăng mâu rôh mơhnhôk pleăng mơheăm dêi rêm râ  á hmâ rêm hơnăm veăng pleăng mơheăm 2-3 hdroh tiô pơkâ ‘na ivá. Hâi kố veăng pleăng mơheăm mê a châ kŏng đoân hngêi trung hnê pơchân ‘na tơdroăng hbrâ mơdât pơreăng ƀă tơná á xuân môi tiah mâu kŏng đoân viên tung hngêi trung veăng hbrâ mơdât tro pơkâ, rak tơniăn pêi pro tro 5K tiô hnê mơhno dêi Khu xiâm ngăn pơkeăng pơlât”.

Tiô pôa Nguyễn Đức Phú, Ngế cheăng tung Ƀơ rô Hnê mơhno pleăng mơheăm kong pơlê Dak Lak, vâ ai tiô púi vâ ‘na mơheăm kal vâ pơlât tơdroăng tung rôh hbrâ mơdât pơreăng COVID-19, sap apoăng hơnăm troh nôkố kong pơlê Dak Lak hiăng tơkŭm hên rôh pleăng mơheăm, tơ’mot hên ngế kuăn pơlê veăng pleăng. Krê to tơdroăng mơheăm khêi ƀă Mơhnhôk mâu kơto mơheăm khêi- rơnó pơtê hriâm hơnăm kố châ tơkŭm po rĕng tâ ai 1 khế tâng vâ pơchông ƀă rêm hơnăm, vâ kum teăm tơdrêng mơheăm kal vâ pơtroh ăm Tíu xiâm ‘măn rak mơheăm ƀă ‘mot mơheăm dêi tíu xiâm tơnêi têa.

“Mâu rôh pleăng mơheăm drêng kô pa kĭng kal vâ pơlât tơdrêng ƀă xúa pơlât tung kong pơlê mê ối kum ăm Tíu xiâm ‘măn rak mơheăm ƀă pâk ‘mot mơheăm xiâm tơnêi têa cho tíu pêi cheăng a peăng kơnhŏng. Nôkố,  xua pơreăng tâ tú, ‘na peăng kơnhŏng vâi ôh tá châ xo mơheăm, xua mê Khu hnê mơhno xuân thế xo mơheăm ing kố pơtroh ăm Tíu xiâm ‘măn rak mơheăm ƀă pâk ‘mot mơheăm dêi tơnêi têa”.

Kuăn pơlê rak vế tơdroăng pơtăng tơkôm troh tơná vâ chêh inâi pleăng mơheăm

Hâi leh pleăng mơheăm Kơto mơheăm khêi Tây Nguyên hơnăm kố châ xo a 6 tíu dêi kong pơlê Dak Lak, tiô tối hdrối kô xo ki iâ gá ai 2 rơpâu 900 tơdrong mơheăm. Bu krê tung hâi lơ 8/6 kố nah, tơdroăng kố hiăng tơdah xo lối 1 rơpâu tơdrong mơheăm. Hdrối mê, a lơ 6/6, Hâi leh pleăng mơheăm hiăng châ tơkŭm po xo mơheăm a tơring Ea Kar ƀă châ lối 1.200 tơdrong mơheăm ƀă hiăng pơtroh ăm 500 tơdrong mơheăm vâ kum ăm Tíu xiâm’măn rak mơheăm ƀă pâk ‘mot mơheăm xiâm tơnêi têa.

H’Xíu H’Mok chêh

Gương tơplôu ƀă tơbleăng