VOV4.Sêdang - Tá hâi teăm châ pá môi khế nếo, kô ai lối 1 rơtuh ngế hok tro tung lâp tơnêi têa mot tung Hneăng tơnoăng mơgêi râ má pái phôh thong hơnăm 2021. Troh a chôu phut kố, mâu kong pơlê tung lâp tơnêi têa hiăng mơ’no pơkâ mâu tơdroăng cheăng hbrâ ăm hneăng tơ’noăng kố, tung mê, ki rơhêng vâ tối kal athế thăm mơdêk hnoăng cheăng dêi ngế ki pơkuâ xiâm a mâu tíu hnê hriâm, mâu khu pơkuâ ngăn ‘na hnê mơhriâm, khu pơkuâ ngăn kong pơlê, tơring, cheăm, vâ khŏm châ tơkŭm po hneăng tơ’noăng ki tơniăn, tơtro khât.

Troh nôkố, mâu tơring, kong pơlê hiăng mơjiâng Khu hnê mơhno Rôh tơ’noăng râ má pái Trung hok phôh thong hơnăm 2021 dêi kong pơlê, xing xoăng nhên hnoăng cheăng ăm rêm tíu tơ’noăng ki ai tơdjâk, tung mê, Khu ngăn hnê hriâm ƀă hnê mơjiâng tuăn ngoâ rơkê pôu râng tơdroăng ki chêh pro mâu hlá mơ-éa tơkŭm po tơ’noăng tơtro ƀă rôh ki ai pơreăng Covid-19 ôh tá tơniăn.

Ai mâu kong pơlê ki ‘nâ môi tiah Hải Phòng, Dak Lak ƀă hên ki kong pơlê ki ê, ối mơjiâng Khu hnê mơhno râ tơring, pơlê kong krâm, pơlê kong kơdrâm vâ tŏng kum ăm hnoăng cheăng tơkŭm po tơ’noăng dêi mâu hngêi trung a kong pơlê. Tung pơla ai pơreăng, pakĭng mâu tíu tơ’noăng ki păng ‘nâng, mâu kong pơlê, pơlê kong kân pơrá tiô tối hdrối kô mơjiâng mâu tíu tơ’noăng krê ăm hok tro ối tung F1 vâ rak tơniăn hnoăng ăm mâu vâi o. Mâu tíu tơ’noăng pơrá châ hbrâ rơnáu tŭm mâu kế tơmeăm xúa tung hbrâ mơdât pơreăng.

Pôa Nguyễn Văn Long, kăn phŏ pơkuâ Khu ngăn hnê hriâm ƀă hnê mơjiâng tuăn ngoâ rơkê kong pơlê Gia Lai ăm ‘nâi, kong pơlê ai lối 14 rơpâu ngế hok tro chêh inâi tơ’noăng, châ tơkŭm po a 39 to tíu tơ’noăng. Kong pơlê hiăng mơjiâng túa pơkâ tơ’noăng râ má pái phôh thong ƀă 4 râ cheăng vâ hbrâ mơdât pơreăng Covid-19. Nôkố, rơtế ƀă tơdroăng ki tơkŭm po rơbot ƀai ăm hok tro, kong pơlê mơdêk hnoăng cheăng tối tơbleăng tơdroăng kal ăm kăn ƀô̆, thái cô, mâu ngế cheăng ƀă hok tro, nôu pâ mâu hok tro ‘na tơdroăng pơreăng rơtế ƀă mâu tơdroăng ki hnê pơchân dêi kơ koan ai tơdjâk ‘na hbrâ mơdât pơreăng.

“Khu ngăn hnê ngăn hriâm ƀă hnê mơjiâng tuăn ngoâ rơkê hiăng hnê mơhno ăm mâu khu, mâu tíu pêi cheăng rế tơbleăng mâu tơdroăng cheăng ăm rôh tơ’noăng tro pơkâ, rế rak tơniăn mâu tơdroăng pơkâ thế hbrâ mơdât pơreăng tung pơla ai pơreăng Covid-19 ôh tá tơniăn. Tung mê, ai pŭn túa pơkâ tơkŭm po tơ’noăng tơtro ƀă tơdroăng pơkâ dêi pơreăng. Rôh tơ’noăng xuân châ tơkŭm po tiô túa pơkâ tơdjuôm dêi Khu xiâm ngăn hnê hriâm ƀă hnê mơjiâng tuăn ngoâ rơkê, Khu ngăn hnê hriâm ƀă hnê mơjiâng tuăn ngoâ rơkê hiăng ai hlá mơ-éa pơkâ thế mâu hok tro veăng tung rôh tơ’noăng, kăn ƀô̆ ƀă mâu ngế cheăng pêi cheăng tung rôh tơ’noăng athế chêh tối ivá hdrối 7 hâi drêng rôh tơ’noăng châ tơkŭm po.

Klêi mê, pơtroh tâi mâu tơdroăng ‘na mâu tíu chêh inâi tơ’noăng, mâu kơpong tơ’noăng vâ tơpui tối, pơkâ tơleăng”.

Cho môi tung mâu kong pơlê ki ai kơxô̆ hok tro chêh inâi tơ’noăng hên má môi lâp tơnêi têa, ƀă lối 88 rơpâu ngế hok tro, pôa Lê Hoài Nam, kăn phŏ pơkuâ Khu ngăn hnê hriâm ƀă hnê mơjiâng tuăn ngoâ rơkê pơlê kong kân Hồ Chí Minh ăm’nâi, Khu ngăn hnê hriâm hiăng pơtroh mâu hlá mơ-éa hnê mơhno tơkŭm po tơ’noăng ăm tâi tâng mâu hngêi trung hriâm a pơlê kong kân, mâu tíu tơ’noăng ƀă hbrâ mâu kế tơmeăm, xuân môi tiah mâu ngế cheăng vâ kum tung rôh tơ’noăng, maluâ kơxô̆ liăn ‘no ăm rôh tơ’noăng hên xua athế rak tơniăn hbrâ mơdât pơreăng:

“Ngin xuân hiăng pơkâ túa ƀă pơlê kong kân xuân ‘no liăn ngân vâ roê mâu kế tơmeăm ki hbrâ mơdât pơreăng a 160 to tíu tơ’noăng kố, tŏng kum lối 1 rơtal liăn roê mâu têa kơdê pơreăng, môi tiah kên pâng môh rơkong ƀă rak tơniăn rêm lâm tơ’noăng pơrá ai têa kơdê pơreăng, mê nếo ƀă kơmăi ki vê ngăn ki tôu hngíu a châ, pêi pro tro “5K”.

A rôh hôp ‘no tơdrêng tung um tơvi ‘na hnoăng cheăng tơkŭm po rôh tơ’noăng râ má pái phôh thong hơnăm 2021 nếo châ Khu xiâm ngăn hnê hriâm ƀă hnê mơjiâng tuăn ngoâ rơkê tơkŭm po a 63 to kong pơlê, pơlê kong kân nếo achê kố, kăn pơkuâ Khu ngăn hnê hriâm ƀă hnê mơjiâng tuăn ngoâ rơkê tơmâng xo tơdroăng ki hbrâ rơnáu nhên dêi mâu kong pơlê tung tơdroăng ki hbrâ po rôh tơ’noăng.

Tối nhên ki kal dêi rôh tơ’noăng, pôa Nguyễn Hữu Độ, kăn phŏ pơkuâ Khu ngăn hnê hriâm ƀă hnê mơjiâng tuăn ngoâ rơkê xuân pơkâ thế mâu hô̆i đong tơ’noăng hbrâ rơnáu mâu kế tơmeăm, malối, cho kơxô̆ liăn kuăn mơngế ai tŭm hiâm mơno lĕm ƀă ivá cheăng vâ tơkŭm po rôh tơ’noăng châ tơniăn, kơtăng ƀă tro pơkâ.

“Rah xo tro mơngế, pơcháu tro tơdroăng cheăng. Ngin xuân xo hnoăng cheăng ki kal cho tơkŭm po rôh tơ’noăng cho tơdrăng, rơkê, rak tơniăn tơdrăng mê rah xo tro ngế ki pêi môi tơdroăng ki kal. Mâu ngế ki ai hiâm mơno lĕm, ai ivá cheăng rơkê, ai hnoăng cheăng pôu râng hnoăng, kơtăng tung pơla tơkŭm po ƀă malối cho rah xo ngế ki pơkuâ, malối cho mâu hngêi trung tơ’noăng, mê mâu kăn pơkuâ, kăn pơkuâ ngăn tơ’noăng, kăn pơkuâ khu châ̆m tơ’noăng. La ngế ki pơkuâ xiâm lĕm tơdrăng mê rôh tơ’noăng kô tơniăn lĕm”.

Hbrâ ăm tơdroăng ki tơkŭm po tơ’noăng râ má pái phôh thong tơnêi têa hơnăm 2021, Khu xiâm ngăn hnê hriâm ƀă hnê mơjiâng tuăn ngoâ rơkê rơtế ƀă mâu kong pơlê hiăng hbrâ rơnáu, rak tơniăn tro tơdroăng pơkâ. Laga, achê kố, pơreăng Covid-19 hlo ôh tá tơniăn. Pơtó mâu tơdroăng ki pêi prodêi hơnăm nah, Khu xiâm ngăn hnê hriâm ƀă hnê mơjiâng tuăn ngoâ rơkê rơtế ƀă mâu kong pơlê kô tơkŭm po rôh tơ’noăng râ má pái phôh thong hơnăm kố tro tiô mâu tơdroăng pơkâ, la bu tơkŭm po tơ’noăng tung 2 hâi lơ 7 ƀă lơ 8 a mâu tíu ki tơniăn ƀă mâu hok tro ki ôh tá ối tung F0, F1, F2. Pôa Mai Văn Trinh, kăn xiâm Khu rak ngăn ki rơkê plĕng, Khu xiâm ngăn hnê hriâm ƀă hnê mơjiâng tuăn ngoâ rơkê ăm’nâi:

“Troh nôkố, tâng xuân ối ai mâu tíu athế pêi pro tơdroăng ki mơdât prôk lăm lơ klâ ối krê pơlê pơla tiô pơkâ thế dêi Ngế pro xiâm hnê ngăn Chin phuh pêi pro hbrâ mơdât pơreăng Covid-19 mê rôh tơ’noăng hâi lơ 7-8/7/2021 bu tơkŭm po ăm mâu tíu ki tơniăn ƀă ăm mâu ngế ki tơ’noăng ki ôh tá ối tung F0, F1, F2. Tiah mê, Khu xiâm ngăn hnê hriâm ƀă hnê mơjiâng tuăn ngoâ rơkê kô rơtế ƀă mâu kong pơlê tơkŭm po tơ’nôm rôh tơ’noăng má 2 ăm mâu hok tro ki tá hâi châ tơ’noăng a rôh tơ’noăng má môi”.

Ƀă hnoăng cheăng rah xo hriâm đăi hok, kao đăng, malối ƀă mâu hok tro ki rah xo mot hriâm tơdrăng a mâu hngêi trung đăi hok, kao đăng tiô túa ki séa ngăn klêi kơ’nâi tơ’noăng râ má pái phôh thong hơnăm 2021, Khu xiâm ngăn hnê hriâm ƀă hnê mơjiâng tuăn ngoâ rơkê kô hnê mâu khu ngăn hnê hriâm đăi hok rơnêu ‘na túa pơkâ, hâi khế, kơxô̆ ngế rah xo vâ rak tơniăn hnoăng pơxúa ăm hok tro ki séa ngăn hồ sơ tiô túa ki séa ngăn klêi kơ’nâi tơ’noăng râ má pái phôh thong hơnăm 2021 tung hên rôh ki phá tơ-ê dêi rơpó.

Khu xiâm ngăn hnê hriâm ƀă hnê mơjiâng tuăn ngoâ rơkê xuân mơjiâng ko ƀai tơ’noăng ăm mâu rôh tơ’noăng ki phá tơ-ê dêi rơpó rak tơniăn tơdâng ‘mô ‘na ki xơpá vâ rak tơniăn hnoăng pơxúa ăm hok tro tơ’noăng ki phá tơ-ê dêi rơpó.

VOV chêh

Katarina Nga tơplôu ƀă tơbleăng