VOV4.Sêdang - A hneăng hôp kân Kuô̆k hô̆i kố nah, hên mâu kăn Kuô̆k hô̆i ai tối tiah kố, ƀă tơdroăng ki tối tơbleăng mâu troăng hơlâ séa ngăn pơreăng COVID-19, mê kal tơbleăng tơ-ƀrê tâ mâu troăng hơlâ tŏng kum kuăn pơlê, mâu ngế pêi cheăng, mâu ngế ki xo mâu ngế pêi cheăng tro tơdjâk xua pơreăng. Rơtế amê, mâu kăn Kuô̆k hô̆i xuân pơkâ thế mâu khu xiâm, kơvâ cheăng tơnêi têa kal ai tơdroăng tơrŭm môi tuăn tung mơjiâng pro ƀă tê mâu kế tơmeăm ăm khu mơdró kâ ƀă kuăn pơlê ki pêi chiâk pêi deăng.

Tơpui tơno mâu troăng rơhlâ hbrâ mơdât pơreăng COVID-19, hên mâu kăn Kuô̆k hô̆i ai tối tiah kố, troăng rơhlâ pro kơtăng séa ngăn plâ mơdât pơreăng, la ôh tá chiâng pơkâ ki kơtăng ôh tá tro tơdroăng. Ki khât gá tung pơla hdrối kố nah, ai mâu pơlê cheăm bêng ki ‘na xúa tơdroăng pơkâ  hbrâ mơdât pơreăng pro ki ó luâ râ, kơtăng la ôh tá tro tơdroăng ‘na hbrâ mơdât pơreăng  chiâng pro pá ăm kuăn pơlê, mơngế pêi cheăng ƀă khu mơdró tung tơdroăng chơ mâu tơmeăm, pro mâu tơmeăm ki vâ tê pơla mâu kong pơlê, tơring, cheăm chiâng trâm hên xơpá, thăm nếo ôh tá ai tơmeăm vâ tê ăm mơngế vâ rôe.

Tiô pôa Phan Đức Hiền, Khu kăn kong pơlê Thái Bình tối, kal mơdêk tơrŭm pơla mâu kong pơlê, tơring, cheăm tung hbrâ mơdât pơreăng tiô troăng rơhlâ mơnhên dêi rơpó ƀă tối ăm ‘nâi tơdroăng, vâ pro troăng lĕm tung tơdroăng chơ tơmeăm tê mơdró pơla mâu kong pơlê.

“Tung  tơdroăng dế nôkố tơdroăng tâ tú pơreăng  a mâu kong pơlê pơrá phá dêi rơpó, ƀă tơdroăng hbrâ mơdât xuân pơrá phá há. Tung tơdroăng ki lâi ‘ló mê kố cho tơdroăng pêi pro ki kal, la tâng ki pơrá phá pơla mâu tơdroăng hbrâ mơdât pơreăng kô chiâng ôh tá ai troăng prôk vâ chơ mâu tơmeăm ƀă kuăn mơngế. Tiô tơdroăng ăm ‘nâi nôkố drô troăng kân xuân dế hlo ki hâ ho ‘na chơ tơmeăm mê tơdroăng tơrŭm pơla mâu kong pơlê tung tơdroăng mê cho kơdroh hên mâu tơdroăng ki phá dêi rơpó ki ôh tá kal, mê kô troh tơdroăng mơdêk ăm châ chơ mâu tơmeăm’’.

 Tối ‘na tơdroăng vâ ăm châ chơ tơmeăm pơla mâu kong pơlê, pôa Nguyễn Hồng Diên, Ngế xiâm ngăn tê mơdró tối ăm ‘nâi, rôh apoăng tơplâ mơdât pơreăng COVID-19, mâu kong pơlê hâi teăm hlê, mê chiâng ai tơdroăng mung rôe tơmeăm ăm kuăn pơlê chiâng trâm pá, oh tá ai tŭm tơmeăm xua ôh tá ai troăng vâ chơ chiân mâu tơmeăm. Mâu tơdroăng ki tơvâ tơvân mê hiăng châ kơ koan rak ngăn hlo ‘nâi ƀă tơkŭm tơleăng mơnhên tơdroăng mê:

“Khu xiâm ngăn tê mơdró thế kơvâ ngăn ‘na chiâk deăng mơdêk pêi pro mâu tơmeăm kế kâ, malối cho kơchâi kâ ki ối drêh, kơchâi plâi pôm a kong pơlê ai pơreăng ƀă mâu kơpong ki ai pơreăng hên xuân môi tiah lâp tơnêi têa vâ hbrâ rơnáu mung tơmeăm. Mâu kơvâ cheăng ngăn troăng prôk, kŏng an, khu ngăn pơkeăng, mâu kăn mâu kong pơlê, malối cho mâu kong pơlê tung kơpong tâ pơreăng pêi pro kơtăng tơdroăng hnê mơhno dêi Chin phuh, Ngế pro xiâm hnê ngăn Chin phuh ôh tá pơkâ pá mâu tơdroăng ki ê ƀă xúa pro kơtăng mâu pơkâ. Mâu kong pơlê tung kơpong kal pơtối séa ngăn, thâ tŏng kum mâu khu mơdró xing xoăng tê tơmeăm ki kal vâ châ ‘măn kơdĭng mâu tơmeăm ki kal tung kong pơlê ing 10 hâi troh 15 hâi tơ’mô hâi pơkâ klâ kơtăn; hlối ‘mâi hơ’lêh kơtăng tơdroăng xing xoăng tê tơmeăm ing mâu siêu thĭ, kơchơ hmâ mơdró ƀă kơchơ kuăn pơlê hmâ lăm tê rôe hên ƀă kơchơ kân, mơdêk mâu túa tê mơdró môi tiah lăm tê ukố umê rôe tung điê̆n tưh ing hơngế’’.

Hên mâu kăn Kuô̆k hô̆i xuân ai tối tiah kố, tơdrêng ƀă mâu troăng rơhlâ séa ngăn mơdât pơreăng mê kal thế tơbleăng pêi tơ-ƀrê tâ mâu tơdroăng pơkâ tŏng kum kuăn pơlê, mơngế pêi cheăng, mơngế xúa mơngế pêi cheăng chiu tơdjâk xua pơreăng COVID-19. Drêng kuăn mơngế pro xiâm kô pro rơtâ tá mâu tơdroăng ki mơ-eăm nếo vâ séa ngăn plâ mơdât pơreăng. Nôkố, Chin phuh hiăng ai hên luât pơkâ tŏng kum, môi tiah: kơdroh yă on tơhrik, yă têa, pơkâ ton tâ hâi nâp liăn pro hnoăng mơhá rôe xúa tơmeăm kơdroh iâ kơxô̆ liăn nâp ki kố ki mê, kum tơdrêng ăm kuăn pơlê, mơngế pêi cheăng ƀă ngế xiâm ki xúa mơngế pêi cheăng.

Jâ Vũ Thị Lưu Mai, khu kăn Kuô̆k hô̆i pơlê kong kân Hà Nội tối, tơdroăng Chin phuh tơbleăng rĕng tơdrêng mâu kơxô̆ liăn tŏng kum tơdrêng ing tơdroăng hlo hlâu khât, ôh tá pá, pro tơ’lêi hlâu ăm mơngế ki vâ châ xúa, la tơmeăm tŏng kum mê thế ăm tro mơngế, ôh tá mơhno tơbleăng lâp lu, ôh tá xê mơhno to ăm mâ hlo, hlối kal thế kơchăng tơdroăng xúa liăn pơkâ dêi kơvâ cheăng:   

“Xua nôkố ki khât gá ƀă mâu tơdroăng cheăng pro hnoăng mơhá, luât tê mơdró tơkăng kong mê pin thế xúa pơkâ luât ki mê. Tâng chêh tơbleăng tung hlá mơ-éa ôh tá tro kô tro xo tơvêh, la ƀă kơxô̆ liăn tơmeăm tŏng kum mê gá tơ ê ƀă pin thế hbrâ rơnáu  ăm tơtro. Xua drêng chêh tung hlá mơ-éa kuăn pơlê bú ‘nâi to nâp hồ sơ ƀă tơdroăng ki mơnhên hiăng riân tro, mê cho hnoăng pêi pro rak ngăn dêi tơnêi têa dêi kơ koan râ kơpêng tung chêh pro. Drêng hiăng xo liăn ăm kuăn pơlê mơhé vâ riân tro. Ki ê nếo, mê luât pơkâ tŏng kum cho mơhno ki ‘ló tro ƀă tá um méa Chin phuh ăm kơpeăng kŏng vâ rơtế ƀă kuăn pơlê tơkâ luâ xơpá. Xua mê, tơdroăng pơxâu phâk xuân kal pêi pro ‘lo tro’’.

Vâ pêi pro tiô Pơkâ xô̆ 30 dêi Kuô̆k hô̆i hneăng 15, nếo achê kố Chin phuh hiăng pơkâ xô̆ 86/NQ-CP ‘na troăng rơhlâ pêi tơdrêng tơdroăng hbrâ mơdât pơreăng COVID-19. Luât pơkâ mê châ ngăn cho po troăng rơhlâ pro tơ’lêi hlâu ăm mâu khu xiâm, kơvâ cheăng, kong pơlê hbrâ rơnáu plâ mơdât pơreăng. Tơdroăng ki kal tâ nếo tung Pơkâ mê, Chin phuh hiăng pơkâ troăng rơhlâ mơdât pơreăng thế pro tro khât, tro tiô pơkâ pêi tơ-ƀrê ki má môi. Hên ngế tối kô cho troăng rơhlâ  pơkâ ki ‘ló  tro má môi.

VOV1 chêh

Gương tơplôu ƀă tơbleăng