VOV4.Sêdang - Klêi kơ’nâi 8 hâi pêi cheăng kơhnâ, tơƀrê, măng tĭng hdrối, a Hngêi Kuô̆k hô̆i, xua tơdroăng pơkuâ dêi pôa Vương Đình Huệ, kăn xiâm hnê ngăn Kuô̆k hô̆i, mê Vi ƀan pơkuâ Kuô̆k hô̆i hiăng mơgêi rôh hôp má 3, pêi klêi tơdroăng pơkâ mơ’no vâ hbrâ ăm mâu tơdroăng ki kal ăm Hneăng hôp má 2, Kuô̆k hô̆i hneăng má 15.

Pôa Vương Đình Huệ, Kăn xiâm hnê ngăn Kuô̆k hô̆i tối nhên, kố cho mâu tơdroăng rôh hôp tiah hmâ ton má môi tung hơnăm dêi Vi ƀan pơkuâ cheăng Kuô̆k hô̆i ăm hnê tối a mâu tơdroăng pơtroh ăm Kuô̆k hô̆i a rôh hôp má 2. Klêi tí tăng ngăn nhên, tơpui leăng rơdâ, Vi ƀan pơkuâ cheăng Kuô̆k hô̆i hiăng môi tuăn  mâu tơdroăng, châ hbrâ nhên, tŭm tơdroăng pơtroh ăm Kuô̆k hô̆i ƀă mâu tơdroăng ki kal châ tơ’nôm, pê klêi. 

Ƀă tơdroăng cheăng ‘na luât, a hneăng hôp, Vi ƀan pơkuâ cheăng Kuô̆k hô̆i hiăng tơmâng ƀă veăng hnê tối a 6 tơdroăng tơkêa luât. Vi ƀan pơkuâ cheăng Kuô̆k hô̆i tối nhên ki tơrŭm pơla kơ koan rah chêh ƀă mâu kơ koan dêi Kuô̆k hô̆i ƀă tơdroăng ai hnoăng cheăng nhên khât, ing hdrối, ing hơngế tung tơdroăng hbrâ mâu tơkêa bro dêi Luât. Tơdroăng kố mơhno ki mơ-eăm dêi Kuô̆k hô̆i, Vi ƀan pơkuâ cheăng Kuô̆k hô̆i, Hô̆i đong hnê kuăn ngo ƀă mâu Vi ƀan dêi Kuô̆k hô̆i. Kăn xiâm hnê ngăn Kuô̆k hô̆i pơkâ thế rah chêh mâu tơdroăng pơtối pê klêi tơkŭm mơdêk ki tơ-ƀrê dêi mâu tơdroăng tơkêa luât, tơniăn ai mơhnhôk, pro môi tuăn hên pơtroh ăm Kuô̆k hô̆i ƀă drêng châ pơkâ, mâu tơdroăng tơkêa bro Luât kô pro chiâng luât pơkâ ki tơ-tro ƀă mâ ngăn ‘na tơdroăng cheăng pêi ton hơnăm, mơnhông mơdêk tơ-ƀrê:

“Vi ƀan pơkuâ Kuô̆k hô̆i môi tuăn tơ’nôm a tơdroăng Luât ‘mâi rơnêu, tơ’nôm mâu tơdroăng dêi Luât săm phoăng a tơdroăng mơjiâng luât, luât pơkâ hơnăm 2021 vâ pơtroh ăm Kuô̆k hô̆i séa ngăn, tơbleăng a hneăng hôp roh má 2 tiô pơkâ tơpui iâ a môi hneăng hôp. A hneăng hôp mê, pakĭng veăng ‘no hnoăng tối tơbleăng dêi Chin phuh, mê Vi ƀan pơkuâ cheăng Kuô̆k hô̆i ối veăng ‘no hnoăng môi tiah riân, hnoăng chiâng pêi tung tơdroăng tơchĕng tơmiât hdrối, riân ngăn dêi mâu kong pơlê, pơlê kong kân râ xiâm tơnêi têa môi tiah mâu pơkâ cheăng kâ kân, râ xiâm tơnêi têa môi tiah mâu tơdroăng pơkâ cheăng kâ kân GIDP, tâng riân tiô rêm ngế ƀă mâu kơlo kơxô̆ ki ê”.

Vi ƀan pơkuâ cheăng Kuô̆k hô̆i mơgêi hneăng hôp má 3-Pôa Vương Đình Huệ, Kăn xiâm hnê ngăn Kuô̆k hô̆i tối tơbleăng mơgêi hneăng hôp

Kăn xiâm hnê ngăn tơnêi têa khĕn kơdeăn: ‘na ki tơ-ƀrê, mâu tơdroăng tối tơbleăng a hneăng hôp xuân tơ-ƀrê, mơhno mâu tơdroăng ki pơ’lêh tung mâu tơdroăng cheăng châ tối pơtâng xuân môi tiah mâu tơdroăng mơ-eăm khât, hnoăng cheăng pêi ƀă pơkâ kơtăng dêi mâu kơ koan tung tơdroăng tơbleăng pêi mâu tơdroăng cheăng. Pâ thế Chin phuh, mâu kơ koan tơrŭm cheăng tơkŭm hnê mơhno pêi pro mâu troăng rơhlâ vâ tơkâ luâ tơdroăng pá tơvâ tơvân.

Môi tơdroăng ki châ kuăn pơlê vâ tơmâng mê cho Vi ƀan pơkuâ cheăng Kuô̆k hô̆i ăm phêp pơtroh 14 rơpâu 620 rơtal liăn a kơxô̆ liăn ngân ki hbrâ dêi Tơnêi têa vâ xúa ăm tung tơdroăng hbrâ mơdât pơreăng. Pôa Hồ Đức Phớc, Ngế xiâm ngăn liăn ngân tối nhên tơdroăng mê: Xua kơlo ki tơdjâk dêi pơreăng lối kân, mâu kong pơlê hiăng xúa tâi mâu liăn ngân dêi kong pơlê, liăn ‘măn kơdĭng, kơdroh, hrê ‘nâi kơdĭng ƀă xiâm pêi cheăng tro luât vâ hbrâ mơdât pơreăng COVID-19 ƀă kum kuăn pơlê tơdjâk dêi pơreăng. Xua mê, kal thế ăm phêp pơtroh 14 rơpâu 620 rơtal liăn a liăn ngân xiâm tơnêi têa vâ xúa ăm hbrâ mơdât pơreăng.

“Liăn ‘măn kơdĭng rôe vaccine troh nôkố châ 8 rơpâu 700 rơtal liăn. Krê to Khu xiâm ngăn liăn ngân hiăng pơtroh ăm Khu xiâm ngăn liăn ngân lối 14 rơpâu rơtal vâ rôe vaccine. Vaccine nôkố oh tá riân xô̆ ki hiăng pơkâ ai lối 3,5 rơpâu rơtal ing liăn ‘măn kơdĭng rôa vaccine. Kơxô̆ ki u ối xúa liăn ki hbrâ ‘măn  pơtối rôe. Má péa, liăn ‘măn hbrâ mơdât pơreăng khu xiâm ngăn ‘na liăn hiăng thế mâu kong pơlê tối tơbleăng, klêi ai tơbleăng dêi khu xiâm ngăn liăn ngân kô tơbleăng ƀă Khu pơkuâ cheăng Kuô̆k hô̆i ‘nâi ‘na liăn ki ‘no hrê hbrâ mơdât pơreăng ki xo ing liăn ngân kong pơlê”.

A hneăng hôp, tâi tâng mâu ngế tung Vi ƀan pơkuâ cheăng Kuô̆k hô̆i hiăng môi tuăn ăm phêp pơtroh 14 rơpâu 260 rơtal liăn a liăn hbrâ ‘măn dêi liăn ngăn xiâm tơnêi têa vâ xúa ăm hbrâ mơdât pơreăng, tơniăn kơdĭng xuá tơ-ƀrê tro tiô pơkâ dêi Luât liăn ngân ƀă Pơkâ 30 dêi Kuô̆k hô̆i ƀă tối tơbleăng dêi Khu pơkuâ cheăng Kuô̆k hô̆i tiô pơkâ.

Pôa Vương Đình Huệ, Kăn xiâm hnê ngăn Kuô̆k hô̆i xông tơpui mơgêi hneăng hôp

‘Na tơdroăng séa ngăn, Kăn xiâm hnê ngăn Kuô̆k hô̆i tối nhên, a hneăng hôp rôh kố, Vi ƀan pơkuâ cheăng Kuô̆k hô̆i hiăng tơpui, ăm hnê tối ‘na tơdroăng pơkâ nhên ƀă troăng rơhlâ séa ngăn dêi mâu tơring vâ séa ngăn  khât dêi Kuô̆k hô̆i ƀă séa ngăn dêi Vi ƀan pơkuâ cheăng Kuô̆k hô̆i tung hơnăm 2022. Ing tơdroăng hnê tối dêi Vi ƀan pơkuâ cheăng Kuô̆k hô̆i, Ngế chêh tôm xo rơkong dêi Kuô̆k hô̆i ƀă kĭ mâu hlá mơ-éa pơkâ séa ngăn vâ tơkŭm po tơbleăng:

“Vi ƀan pơkuâ cheăng Kuô̆k hô̆i môi tuăn kal thế tơkŭm po hneăng hôp mơ’no tơdrêng tiô troăng hyôh Internet tung lâp tơnêi têa vâ hlối tơbleăng, hlối hnê thế tơkŭm pêi mâu tơdroăng séa ngăn. Ngăn pơ’lêh nếo tơdroăng cheăng séa ngăn, mơdêk ki tơ-ƀrê dêi tơdroăng cheăng séa ngăn cho môi tung mâu tơdroăng pơ’lêh nếo, mơdêk tơ-ƀrê tơdroăng cheăng dêi Kuô̆k hô̆i  tung hơneăng 15”.

Tơpui mơgêi hneăng hôp má 3, pôa Vương Đình Huệ, Kăn xiâm hnê ngăn Kuô̆k hô̆i tối, a hneăng hôp Vi ƀan pơkuâ cheăng Kuô̆k hô̆i ăm hnê tối 6 tơdroăng Luât ƀă hên tơdroăng kal ki ê. ‘Na tơdroăng hbrâ ăm rôh hôp má 2, kal hbrâ tro nhên má môi tơdroăng cheăng kring tơniăn, rak tơniăn hbrâ mơdât pơreăng, tơniăn mâu tơdroăng pơlâ tơleăng mơnhên teăm tơdrêng ăm mâu ngế teăng mâ veăng hôp. Pâ thế klêi rôh hôp mâu kơ koan thâ pê klêi hlá mơ-éa vâ kĭ pơkâ tơbleăng drêng mơgêi hneăng hôp

VOV1

Gương tơplôu ƀă tơbleăng