VOV4.Sêdang - Tá hâi troh pa môi khế xếo kô po Hneăng hôp má môi dêi Kuô̆k hô̆i hneăng má 15. Ôh ti xê tơpui tối khu xiâm pơkuâ kơ koan pêi cheăng, rôh hôp kố ối séa ngăn mâu tơdroăng kal ki ê. Xua mê, pôa Vương Đình Huệ, kăn xiâm hnê ngăn Kuô̆k hô̆i pơkâ thế pơtối hơ’lêh Rôh hôp má môi dêi Kuô̆k hô̆i hneăng má 15 tiô troăng ki kơdroh chôu phut pơchuât hlá mơ-éa, mơdêk chôu phut pơchuât hlá mơ-eá tối tơbleăng séa ngăn tơtro, vâ mâu kăn Kuô̆k hô̆i ai chôu phut séa ngăn ƀă ăm rơkong veăng tơpui tối.

Tiô tơdroăng tối hdrối, rôh hôp má môi, Kuô̆k hô̆i hneăng 15 kô pêi cheăng tung 11 hâi tơdế. Tung mê, Kuô̆k hô̆i mơdoh 5 hâi pêi tơdroăng cheăng ‘na mơngế cheăng, mơdoh 4 hâi tơdế vâ séa ngăn tơdroăng tơbleăng ƀă mâu tơdroăng kal ki ê ƀă môi pôe hâi pêi tơdroăng cheăng hbrâ rơnáu; ki u ối cho mơdoh chôu pơxiâm po, mơgêi ƀă 1 pôe hâi hbrâ rơnáu lơ ai tơdroăng ki nếo ‘lo tơ’nôm chôu pêi cheăng.

A rôh hôp, mâu ngế tung Vi ƀan pơkuâ cheăng Kuô̆k hô̆i môi tuăn leh pơxiâm po rôh hôp má môi, Kuô̆k hô̆i hneăng 15 po a hâi lơ 20/7, ƀă tơdroăng pơkâ tơrŭm cheăng ‘na mơngế pêi cheăng hdrối vâ tơpui tơno mâu tơdroăng ki ê. Xua mê, kô cho rôh hôp apoăng ki hên cho ‘mâi xĭng xoăng hnoăng cheăng pêi ăm mâu kăn, thế hôp mơ’no tơdrêng.

Tung mê, ai dâng 500 ngế kăn ƀă kơdrâm ngế kăn ƀô̆ mâu ngế pêi cheăng ăm Kuô̆k hô̆i, mâu ngế chêh hlá tơbeăng. Xua mê, mâu ngế tung Vi ƀan thế: Kal hbrâ pêi tơdroăng hbrâ mơdât pơreăng COVID-19 nhên khât. Tung mê, tơkŭm pâk vaccine mơdât COVID-19 rĕng ăm mâu kăn ƀă mâu ngế pêi hnoăng cheăng plâ mơdât ƀă mâ khăm ngăn mơheăm ki iâ gá 2 hdroh hdrối vâ po rôh hôp.

Pakĭng mê, tơbleăng ăm mâu kăn Kuô̆k hô̆i kơdroh tơpui tơno klêi rôh hôp, xua tâng nếo klêi pâk vaccine kô ối chiâng tâ pơreăng. Xua mê, kal thế hbrâ rơnáu má môi tung pơla veăng hôp dêi Kuô̆k hô̆i hneăng 15. ‘Na hâi chôu po rôh hôp má môi, Kuô̆k hô̆i hneăng 15, pôa Vương Đình Huệ, Kăn xiâm hnê ngăn Kuô̆k hô̆i tối:

“Tâi tâng hâi chôu kal séa ngăn nếo vâ pơkâ. A rôh hôp má môi Kuô̆k hô̆i hneăng 14, 10 hâi bú pêi tâi tâng mâu tơdroăng cheăng ‘na mơngế ƀă tơ’nôm tối tơbleăng cheăng kâ rêh ối liăn ngân 6 khế, cho tâi. Rôh hôp mê dêi pin ai hên tơdroăng kal ki ê, ki kố pin thế riân ngăn nhên, rôh kố pin thế tơ’nôm pơkâ 5 hơnăm, tá tơdroăng pơkâ 5 hơnăm hdrối, ƀă pơtroh ăm Kuô̆k hô̆i séa ngăn pơkâ mơnhông cheăng kâ rêh ối 5 hơnăm pơla hơnăm 2021-2025 ƀă pơkâ liăn ngân 5 hơnăm. Riân nhên, ôh tá chiâng mơdât vâ xúa hneăng ki kố”.

Pôa Vương Đình Huệ, Kăn xiâm hnê ngăn Kuô̆k hô̆i hnê mơhno tơdroăng cheăng hbrâ pêi ăm rôh hôp má môi Kuô̆k hô̆i  hneăng 15

Pôa Vương Đình Huệ, Kăn xiâm hnê ngăn Kuô̆k hô̆i xuân thế pơtối ‘mâi hơ’lêh rôh hôp má môi Kuô̆k hô̆i hneăng 15 tiô hnê mơhno kơdroh hâi khế tơbleăng tối, mơdêk hâi khế tơbleăng ăm khu râ kăn tơtro, vâ mâu kăn Kuô̆k hô̆i  ai chôu séa ngăn ƀă veăng hnê tối.

‘Na tơdroăng rôh hôp, tơdrêng ƀă tơdroăng ‘na mơngế, rôh hôp mê, Kuô̆k hô̆i séa ngăn tối tơbleăng mâu tơdroăng tối nhên tơdroăng pơkâ mơnhông cheăng kâ rêh ối pơlê pơla, liăn ngân tơnêi têa 6 khế apoăng hơnăm bă troăng hơlâ pêi tiô pơkâ mơnhông cheăng kâ-rêh ối, liăn ngân tơnêi têa 6 khế mơ ‘nui hơnăm 2021; kĭ pơkâ liăn ngân tơnêi têa hơnăm 2019; séa ngăn, tơbleăng mâu pơkâ dêi Kuô̆k hô̆i ‘na tơdroăng mơjiâng luât, luât hơnăm 2022, pơkâ xúa tơnêi dêi tơnêi têa pơla hơnăm 2021-2030 ƀă pơkâ xúa tơnêi dêi tơnêi têa pơla hơnăm 2021 -2025.

A rôh hôp mâu ngế veăng hnê tối ‘na tơdroăng séa ngăn dêi Kuô̆k hô̆i, Vi ƀan pơkuâ cheăng Kuô̆k hô̆i hơnăm 2022 xua Kăn xiâm chêh tôm xo rơkong dêi Kuô̆k hô̆i tơbleăng ƀă tối tiah kố tơdroăng séa ngăn thế tơtro, pêi tro tiô pơkâ dêi tơdroăng séa ngăn, pơkâ luât cheăng séa ngăn ƀă tơdroăng ki nếo châ mâu kuăn pơlê tơmâng.

Mâu ngế tung Vi ƀan Kuô̆k hô̆i môi tuăn rah xo 4 tung 6 tơdroăng séa ngăn pơtroh ăm Kuô̆k hô̆i, Vi ƀan Kuô̆k hô̆i. Xông tơpui a rôh hôp, pôa Đỗ Bá Tỵ, Kăn phŏ hnê ngăn Kuô̆k hô̆i tối nhên:

“Tơdrêng ƀă tơdroăng séa ngăn tơchoâm dêi Kuô̆k hô̆i, pâ Hô̆i đong ngăn kuăn ngo ƀă Vi ƀan mơ-eăm tơbleăng mâu tơdroăng pêi pro tối nhên, mâu tơdroăng ‘na ki tô tuăn kal mơnhên ƀă mâu khu tơrŭm cheăng, mâu ngế, tí tăng ‘nâi plĕg vâ tơkŭm po mâu rôh hôp tơpui mơnhên, pơtối hơ’lêh nếo tơbleăng mâu khu lăm séa ngăn tơrŭm ƀă hlối séa ngăn, mơdêk pêi cheăng tơ-ƀrê ‘na kơ-êng dêi Vi ƀan pơkuâ Kuô̆k hô̆i”.

Xua pơla sap nôkố ta troh hâi pơxiâm po rôh hôp ôh tá ối hên, tung pơla mê ối hên tơdroăng pêi ki ê thế pêi, xua mê, Kăn xiâm hnê ngăn Kuô̆k hô̆i thế mâu kơ koan ki tơrŭm cheăng hbrâ rơnáu tơrŭm séa ngăn, mơ-eăm hbrâ mâu tơdroăng cho hnoăng cheăng tơná, rak tơniăn tơ-ƀrê, rĕng pơtroh mâu hlá mơ-eá chêh tơdroăng kal ăm mâu kăn Kuô̆k hô̆i.

Tiô pôa Vương Đình Huệ, Kăn xiâm hnê ngăn Kuô̆k hô̆i, klêi rôh hôp má 57, Vi ƀan pơkuâ Kuô̆k hô̆i bú hôp môi xôh nếo vâ séa ngăn mâu tơdroăng kal ki u ối kô pơtroh ăm Kuô̆k hô̆i a rôh hôp má môi, tung mê, ai mâu tơdroăng kal tơdjâk troh pơkâ mơnhông cheăng kâ - rêh ối, pơkâ ‘na liăn ngân, pơkâ ‘no liăn cheăng  mơjiâng tơmeăm khoăng tơnêi têa ki ton 5 hơnăm...

Kăn xiâm hnê ngăn Kuô̆k hô̆i thế Chin phuh thâ pơtroh hồ sơ, hlá mơ-eá ki khât dêi mâu tơdroăng tơdjâk troh mâu kơ koan dêi Kuô̆k hô̆i vâ po séa ngăn.

Gương tơplôu ƀă tơbleăng