VOV4.Sêdang - Tiô tơdroăng pơkâ dêi Khu xiâm ngăn ‘na hnê hriâm ƀă hnê mơjiâng tuăn ngôa rơkê hơnăm 2021 po sap ing hâi lơ 7 troh lơ 9/7 la ngiâ. Hneăng tơ’noăng hơnăm kố po tung pơla dế ai pơreăng COVID-19 xông tâ tá, pro tơdjâk hên troh tâi tâng mâu tơdroăg cheăng dêi hneăng tơ’noăng, xua mê, kal athế rak vế tơniăn tơdroăng hbrâ tơplâ mơdât pơreăng. A kơpong Tây Nguyên, tung mâu khế hơnăm hdrối mê hía nah, kơvâ hnê hriâm mâu kong pơlê, pơlê kong kơdrâm hiăng thăm mơdêk tơdroăng ki rĕng mê hiăng mơjiâng troăng hriâm ăm hok tro lâm 12, tơkŭm po roh tơ’noăng ăm hok tro ki tơtrro, tơ-ƀrê.

Drêng ai pơreăng COVID-19 tâ tú, kơvâ ngăn ‘na hnê hriâm ƀă hnê mơjiâng tuăn ngôa rơkê hiăng kơhnâ khât tung pơkâ mơ’no mâu tơdroăng ki vâ mơhriâm, kum hok tro lâm 12 hbrâ rơnáu tơtro má môi ăm hneăng tơ’noăng mơgêi râ má 3 phôh thong. Hơnăm kố, kong pơlê Dak Lak ai lối 19 rơpâu 800 ngế ki chêh inâi tơ’noăng. Tung mê, ai lối 4 rơpâu 700 ngế vâi o chêh dêi inâi vâ mơnhên mơgêi hneăng tơ’noăng, 14.400 ngế vâi o tơ’noăng râ má 3 vâ seá ngăn điêm ăm mot hriâm đăi hok, kao đăng.

Drêng ai pơreăng COVID-19 dế xông tâ tú ó tiah mê, kong pơlê Dak Lak hiăng vêh mơnhên mâu tơdroăng ki tro tamo châi xua tâ pơreăng COVID-19, kơvâ hnê hriâm ƀă hnê mơjiâng tuăn ngôa rơkê dêi kong pơlê Dak Lak hiăng hbrâ rơnáu ăm tơdroăng cheăng vâ hriâm ƀă tơkŭm tơ’noăng tơtro má môi ngăn tiô kơ tơdroăng ki ai păng ‘nâng vâ po hneăng tơ’noăng.

Ƀă khu hok tro lâm 12, Khu ngăn ‘na hnê hriâm ƀă hnê mơjiâng tuăn ngôa rơkê hiăng hnê mơhno mâu hngêi trung séa ngăn tơdroăng pơkâ hnê hriâm tơkŭm mơjiâng xêh tơdroăng pơkâ, mơhnhôk tâi tâng khu râ ăm tơdroăng ki vâ hriâm hdrối vâ tơ’noăng mơgêi râ má pái phôh thong. Tung mê, mâu hngêi trung xing xoăng mâu thái cô pơkuâ ngăn tiô môn hriâm tro tiô kơ lâm; hnê mơhnhôk, kơdeăn khĕn tơdrêng ƀă mâu ngế krê, khu pơkuâ pêi tro; hnê djâ, tối tơno mâu ngế krê, khu pơkuâ cheăng, khu ki ôh tá pôu râng dêi hnoăng cheăng tung pơkâ mơ’no tơdroăng cheăng. Maluâ ai tơdjâk ki tâ tú dêi pơreăng COVID-19, la hok tro lâm 12 tung lâp kong pơlê xuân ối lăm hriâm tiah hmâ, hnối ai tá tơdroăng ăm hriâm tung troăng hyôh internet ƀă kơvâ ngăn ‘na hnê hriâm dêi kong pơlê Dak Lak hiăng hbrâ rơnáu mâu troăng hơlâ, tơdroăng ki hnê hriâm tung pơla vâ ai pơreăng COVID-19, drêng kal mê vâi kô athế pêi pro hlối.

Dak Lak tơkŭm po lâm hnê hriâm ăm mâu hok tro

Pôa Phạm Đăng Khoa, Kăn pơkuâ hnê ngăn ‘na hnê hriâm ƀă hnê mơjiâng tuăn ngôa rơkê kong pơlê Dak Lak tối ăm ‘nâi:

“Ngin dế hnê mơhno tối nhên mâu hngêi trung tung tơdroăng tơkŭm po hnê hriâm, tơdrêng amê, dế kơhnâ veăng tối ăm Vi ƀan hnê ngăn kong pơlê ‘na tơdroăng mơjiâng Khu hnê mơhno dêi kong pơlê, pơkâ pêi pro tiô tơdroăng pơkâ vâ tơ’noăng, séa mơnhên ngăn mâu tơdroăng ki tơtro vâ tơkŭm tơ’noăng châ tơniăn, tơdrăng, tro tiô pơkâ dêi hnê hriâm, vâ hok tro ki tơ’noăng châ plah hên luâ tâ hneăng hriâm 2019-2020”.

Pơla hdrối kố nah, Vi ƀan hnê ngăn kong pơlê Lâm Đồng hiăng ai hlá mơ-eá vâ môi tuăn ăm phep hok tro phôh thong, mâu ngế hriâm, sinh viên mâu hngêi trung tung kong pơlê kố tơkŭm po hneăng tơ’noăng má 2 ƀă athế pêi kêi hdrối hâi lơ 21/5. Mơgêi hneăng tơ’noăng kố, mâu hok tro, mơngế hriâm, sinh viên tung kong pơlê kố pơtối pơtê hriâm vâ hbrâ mơdât pơreăng COVID-19.

Krê ƀă hok tro lâm 12, Vi ƀan hnê ngăn kong pơlê Lâm Đồng hiăng pơkâ thế Khu ngăn ‘na hnê hriâm ƀă hnê mơjiâng tuăn ngôa rơkê hnê mơhno tơkŭm hriâm mơgêi râ má pái phôh thong tiô kơ tơdroăng hriâm troăng hyôh internet. Ƀă mâu tơring, cheăm ki kơtiê xahpá, kơpong hdroâng kuăn ngo, ôh tá ai tŭm kế tơmeăm khoăng, kơ-ƀăng tăng, lâm kơbong, kih thuât vâ mơhrriâm mê xuân chiâng mơhriâm tơdjoâm la athế kơpuih văng, xut krúa, xôh pơkeăng kơdê pơreăng, lâm hriâm, hlá mơ-eá, loăng chêh, kơtong, hmân ếo, kế tơmeăm ki xúa hnê hriâm, la ôh tá chiâng tơkŭm luâ 30 ngế hok tro tung môi to lâm, đi đo athế truâ kên klup rơkong-môh, xếo kơpeăng kŏng ƀă pơkeăng, chêh tối dêi ivá châ chăn, ối klâ hơngế, rak tơniăn ‘na tơdroăng hbrâ mơdât pơreăng.

A roh hôp dêi Khu hnê mơhno cheăng tơnêi têa hneăng tơ’noăng mơgêi râ má pái phôh thong hơnăm 2021 nếo achê pơla kố. Pôa Nguyễn Hữu Độ, Ngế xiâm phŏ hnê hriâm ƀă hnê mơjiâng tuăn ngôa rơkê, Kăn hnê mơhno hiăng pơkâ thế mâu ngế ki ối tung khu tí tăng seá ngăn kal athế ai tơrŭm cheăng krá tơniăn ƀă khu ngăn ‘na pơkeăng ƀă khăm pơlât. Kố cho tơdroăng pơkâ thế ai ki kal, xua hneăng tơ’noăng hơnăm kố po tung pơla ai pơreăng COVID-19 dế xông tâ tú tung tơrêm kơvâ, rêm tơdroăng dêi hneăng tơ’noăng, xua mê, hneăng tơ’noăng kal athế châ rak tơniăn.

Tiô tơdroăng ăm ‘nâi ing pôa Nguyễn Đức Cường, Kăn séa ngăn Khu xiâm ngăn ‘na hnê hriâm ƀă hnê mơjiâng tuăn ngôa rơkê tối, hneăng tơ’noăng hơnăm kố xuân châ rak tơniăn, pơtối mơdêk ki tơtro ƀă mơnhông ki hơ’lêh nếo ăm vâ ga tơtro tung pơla kong pơlê dế ai pơreăng xông tâ tú. Tiah mê, tiô kơ tơdroăng ki hiăng ‘nâi nhên dêi hneăng tơ’noăng hơnăm 2021 châ pêi pro ing râ tơnêi têa troh a tâi tâng tơring, cheăm. Ƀă mâu kong pơlê ki ai pơ’leăng mâ hok tro tơ’noăng kơdrâm, mâu hneăng tơ’noăng hdrối hmâ hlo ai hên tơdroăng, xua mê, hơnăm kố, kô ăm mâu thái, mâu kăn lăm seá mơnhên ngăn ing apoăng hbrâ po hneăng tơ’noăng.

Pôa Nguyễn Đức Cường, Kăn Seá ngăn tơdroăng cheăng dêi Khu xiâm ngăn ‘na hnê hriâm ƀă hnê mơjiâng tuăn ngôa rơkê tối ăm ‘nâi:

 “ ‘Na tơdroăng cheăng châm tơ’noăng mê athế hơ’lêh pro ti lâi vâ ga tơtro má môi, tiô pơkâ dêi Luât seá ngăn, mê hơnăm kố, teăng ăm tơdroăng tơkŭm lăm seá ngăn roh châm tơ’noăng ki ahdrối tâ cho kal athế đi đo séa mơnhên ngăn tơdroăng plâ hâi khế ki Hô̆i đong châm tơ’noăng. 63 khu séa ngăn dêi Khu xiâm a 63 Hô̆i đong châm tơ’noăng tung plâ to lâi khế hơnăm vâ kring vế tơniăn ăm kuăn pơlê. Mâu khu ki lăm séa ngăn mê cho Khu xiâm ngăn ‘na hnê hriâm ƀă hnê mơjiâng tuăn ngôa rơkê ƀă mâu thái cô hnê râ đăi hok”.

Tiô chêh tối dêi Khu xiâm ngăn ‘na hnê hriâm ƀă hnê mơjiâng tuăn ngôa rơkê ăm ‘nâi, troh nôkố hiăng ai lối 1 rơtuh ngế hok tro chêh inâi vâ veăng tơ’noăng mơgêi râ má pái phôh thong hơnăm 2021, tung mê ai lối 41 rơpâu ngế ki hiăng mơgêi hơnăm hdrối mê hiá nah. Tung lôí 1 rơtuh ngế hok tro ki chêh inâi tơ’noăng mơgêi râ má pái phôh thong hơnăm kố, ai ối 222 rơpâu hok tro bu châ mơnhên hiăng klêi mơgêi râ má pái, lối 33 rơpâu ngế bu rah vâ mot hriâm đăi hok, kao đăng. Kơxô̆ hok tro ki nếo châ séa ngăn điêm ki mơgêi râ má pái ki nếo mê ai lối 758 rơpâu ngế, châ 74%. Pơ’leăng mâ hok tro ki rah ƀai tơ’noăng khoa hok xah hô̆i xuân hên luâ tâ kơvâ ki ê, châ lôí 541 rơpâu ngế.

Quốc Học rah chêh

Nhat Lisa tơplôu ƀă tơbleăng