VOV4.Sêdang - Tơdroăng kal hâi dế lơ 31/5 dêi Khu xiâm ngăn pơkeăng ƀă khăm pơlât ăm ‘nâi ai tơ’nôm 68 ngế tâ COVID-19 tung tơnêi têa, krê Bắc Giang ai 48 ngế, Bắc Ninh ai 4 ngế, Hà Nội ai 12 ngế, Long An ai 2 ngế, Dak Lak ai 1 ngế ƀă Đà Nẵng ai 1 ngế. Xuân tung kơxo lơ 31/5, Hngêi pơkeăng Trung ương Huế hiăng tơkŭm pơtroh mâu ƀok thái pơkeăng ki mơhnŏng pleăng dêi hnoăng cheăng kum kong pơlê Bắc Giang hbrâ mơdât pơreăng COVID-19. Tung mê ai 18 ngế kăn ƀô̆, mâu ngế cheăng ‘na khăm pơlât cho mâu khu ki rơkê plĕng a mâu kơvâ cheăng hồi sức tích cực, hồi sức tim mạch, chống độc.

Pakĭng tơdroăng ki veăng pơlât, rah ngăn, tí tăng mâu ngế ki tâ pơreăng ƀă hên ki ê mâu khu ki rơkê plĕng Hngêi pơkeăng Trung ương Huế kô tối mâu tơdroăng ‘na khoa hok ƀă pơlât mâu ngế ki tâ pơreăng COVID-19. Hdrối mê, Vi ƀan hnê ngăn pơlê kong kân Đà Nẵng xuân hiăng chiân 10 ngế ƀok thái pơkeăng, điều dưỡng lăm kum ăm Bắc Giang tung hnoăng cheăng pơlât, hbrâ mơdât pơreăng COVID-19.

Pôa Nguyễn Trường Sơn, ngế pro phŏ ngăn pơkeăng ăm’nâi, Khu xiâm hiăng hbrâ rơnáu pơtroh 500 ngế sinh viên hngêi trung Kao đăng y tế Bạch Mai ƀă lối 400 ngế cheăng khăm pơlât ki ê vâ kum Bắc Giang.

Katarina Nga tơplôu ƀă tơbleăng