VOV4.Sedang - Ngế pro xiâm hnê ngăn Chin phuh nếo pơtroh hlá mơéa 479/CĐ-TTg ‘na tơdroăng ki kum ăm tơdroăng ki prôk vêh dêi kuăn pơlê ƀă rak tơniăn a troăng prôk tung rôh leh lơ 30/4 ƀă lơ 1/5/2021. Hlá mơ-éa mê ai tối nhên, rôh pơtê leh lơ 30/4 ƀă lơ 1/5, Ngế pro xiâm hnê ngăn Chin phuh pơkâ thế mâu Khu xiâm, kơvâ cheăng, kơ koan ki ai tơdjâk troh; mâu kong pơlê, pơlê kong kân ối tung Tơnêi têa tung tơdroăng pêi dêi hnoăng cheăng, hâi khế dêi tơná pơkâ thế rak tơniăn ‘na ivá, rơkê plĕng ƀă tơniăn tung mâu tơdroăng ki pơto chơ tơmối; pêi pro kơtăng mâu tơdroăng pơkâ dêi luât tơniăn troăng prôk; Mơdêk tơdroăng ki rak tơniăn kring vế, gak ngăn tơniăn a mâu tíu ki xiâm cho mâu tíu troăng prôk ki kân, mâu kơpong ki roê tơmeăm, tíu ki xah hêi, ôu kâ tơkŭm ƀă mâu tíu ôm hyô, tíu ki po mơdĭng ki kân.

Tơbleăng kơxô̆ phôn ki rĕng pơtâng ‘na rak tơniăn a drô troăng prôk dêi mâu kơ koan tơnêi têa, dêi rêm to kong pơlê vâ tơdah xo mâu tơdroăng ki tối tơbleăng dêi mâu kuăn pơlê ‘na tơdroăng tơniăn troăng prôk tung rôh leh; rak tơniăn túa pơkâ tiô tơdroăng 24/7 vâ pơtối tơdah tơdroăng, pơkâ tơleăng, ‘mâu rơnêu tơdrêng mâu rôh ki ôh tá tơniăn ƀă hên ki ê.

Nga tơplôu ƀă tơplôu tơbleăng