VOV4.Sêdang - Kơxo lơ 16/3, a tíu pêi cheăng Khu xiâm ngăn Kŏng an, Đăi tươ̆ng Tô Lâm, kăn xiâm pơkuâ ngăn Kŏng an hiăng pơkuâ po leh tơdah Khu kăn xiâm Hô̆i đong kring tơniăn kong têa Rusi. Klêi kơ'nâi leh tơdah, pôa Tô Lâm prếi kăn tươ̆ng Patrushev Nikolai Platonovich tơpui tơno. A rôh tơpui tơno, péa pâ tối phiu ro rơkâu 'na tơdroăng ki mơnhông mơdêk tơrŭm cheăng tung la ngiâ dêi tâi tâng pơla péa tơnêi têa rế hía rế tơ-brê ƀă pơxúa.

Pôa Tô Lâm pơkâ thế péa pâ pơtối tơbleăng châ tơ-ƀrê mâu hlá mơ-éa ki hiăng kĭ tơkêa, môi tuăn Tơkêa tơrŭm pơla Chin phuh kong têa Rusi 'na tơrŭm tung kơvâ cheăng rak tơniăn kring vế tơdroăng kal ƀă Túa pơkâ drêng mâu tơdroăng tơrŭm cheăng xiâm pơla Việt Nam - Rusi tung kơvâ tung mê ai tá kring vế tơdroăng kal 'na kong têa ê.

Mơgêi Hneăng hôp tơpui tơno, pôa Tô Lâm prếi kăn xiâm chêh tôm xo rơkong Hô̆i đong kring vế tơniăn kong têa Rusi cho pôa Patrushev Nikolai Platonovich hiăng châ hlo leh kĭ tơkêa hlá mơ-éa chôu vế 'na tơrŭm cheăng pơla Khu xiâm ngăn Kŏng an Việt Nam ƀă Vi ƀan Séa ngăn kong têa Rusi.

Katarina Nga tơplôu ƀă tơbleăng