VOV4.Sêdang - A Hà Nội, Ƀơrô Kuô̆k hô̆i tơkŭm po Hneăng hôp Mơgêi hneăng cheăng dêi Khu kăn teăng mâ Kuô̆k hô̆i hơnăm ối nếo Kuô̆k hô̆i hneăng má 14 (2016 - 2021). Pôa Đỗ Bá Tỵ, Kăn xiâm phŏ hnê ngăn Kuô̆k hô̆i veăng hneăng hôp. Mâu rơkong tơpui mơnhên: Kăn teăng mâ Kuô̆k hô̆i hơnăm ối nếo hiăng veăng kum hên, pơxúa khât tung tơdroăng châ tơƀrê tơdroăng pêi ‘na luât, séa ngăn ƀă pơkâ mâu tơdroăng ki kal dêi Kuô̆k hô̆i hneăng má 14, mơnhên tíu cheăng, hnoăng cheăng dêi rơxông ối nếo Việt Nam tung kơ koan ai hnoăng tơnêi têa, tơxâng ƀă tơdroăng loi tơngah dêi Đảng, Kuô̆k hô̆i, kuăn pơlê ƀă kuăn pơlê lâp tơnêi têa.

Laga, mâu kăn xuân tối cho kăn teăng mâ hơnăm ối nếo, tá hâi xo vế hên túa ki rơkê plĕng, kal thế mơ-eăm hriâm hên tâ. Xông tơpui a Hneăng hôp, pôa Đỗ Bá Tỵ tối ăm ‘nâi kô tơbleăng Vi ƀan pơkuâ Kuô̆k hô̆i vâ pơtối ai troăng hơlâ tŏng kum châ tơƀrê tâ nếo ăm tơdroăng pêi cheăng dêi Khu kăn teăng mâ Kuô̆k hô̆i hơnăm ối nếo.

A Sa Ly tơplôu ƀă tơbleăng