VOV4.Sêdang - A Hà Nội, Khu xiâm ngăn Kŏng an tơkŭm po rôh hôp ‘no tơdrêng ing um tơvi troh Kŏng an mâu kong pơlê vâ mơgêi, mơnhên tối klêi kơ’nâi tối tơbleăng troăng hơlâ mơjiâng Kŏng an cheăm, pơlê kân ki păng ‘nâng tung lâp tơnêi têa; tơbleăng mơjiâng Kŏng an bêng kơhnâ, rơkê, tiô túa ‘na kring vế, gak tơniăn ƀă hlê plĕng kơphô̆.

Pêi pro tơdroăng pơkâ kơxô̆ 22 hâi lơ 15/3/2018 dêi Khu xiâm pơkuâ tơdroăng kal kí ‘na pơtối hơ’lêh nếo, xing xoăng tơrŭm kơ koan Khu xiâm ngăn Kŏng an, pêi cheăng tơƀrê troh nôkố, Kŏng an dêi 63/63 to kong pơlê hiăng pơtối pơtroh lối 43 rơpâu ngế kăn ƀô̆ Kŏng an ki păng ‘nâng pôu râng mâu hnoăng cheăng tơkŭm inâi Kŏng an cheăm a 7 rơpâu 800 to cheăm, pơlê kân.

Tơkâ luâ mâu tơdroăng ki xơpá apoăng, khu Kŏng an ki păng ‘nâng dêi cheăm, pơlê kân tung lâp tơnêi têa hiăng rĕng tơbleăng lăm pêi cheăng a cheăm, tơring, mơdêk mâu tơdroăng ki lăm pơtrui ngăn, rak tơniăn, tơbleăng mâu hnoăng cheăng ki păng ‘nâng, ing mê, hiăng pro chiâng môi tơdroăng ki nếo ‘na hnoăng cheăng rak tơniăn kring vế, gak ngăn a cheăm, tơring, veăng kum mơjiâng um méa khu Kŏng an cheăm xua tơnêi têa piu dêi tơná, xua kuăn pơlê kum tơdroăng cheăng, tâi tâng xua tơdroăng rêh ối tơniăn lĕm, hơniâp ro dêi kuăn pơlê.

Katarina Nga tơplôu ƀă tơbleăng