VOV4.Sêdang - Kơxo lơ 27/5, Khu xiâm pơkuâ hnê hriâm ƀă hnê mơjiâng tuăn ngôa rơkê tơkŭm po hneăng hôp mơ’no tơdrêng tung um tơvi ƀă 63 kong pơlê, pơlê kong kơdrâm ‘na tơdroăng tơkŭm po tơ’noăng mơgêi râ má pái phôh thong hơnăm 2021. Kố cho hneăng hôp châ mâu kong pơlê pói vâ vâ mơjiâng pơkâ hbrâ tơkŭm po tơ’noăng ăm tơtro tung pơla ai pơreăng COVID 19 dế xông tâ tú ó.

Hneăng hôp châ tơkŭm po mơ’no tơdrêng tung um tơvi a Khu xiâm pơkuâ hnê hriâm ƀă hnê mơjiâng tuăn ngôa rơkê ƀă mâu um tơvi hrik hyôh mơ’no tơdrêng dêi Chin phuh. Tơdroăng xiâm dêi hneăng hôp cho pêi pro Hneăng tơ’noăng mơgêi râ má pái phôh thong hơnăm 2021; mâu tơdroăng ki Vi ƀan kuăn pơlê mâu kong pơlê, pơlê kong kơdrâm kal hnê mơhno mâu Khu, pơkuâ, kơvâ mơjiâng ƀă pêi pro tơkŭm po tơ’noăng mơgêi râ má pái trung hok phôh thong a kong pơlê tiô tro Pơkâ tơ’noăng mơgêi râ má pái phôh thong, rak tơniăn, pêi kơtăng, ôh tá tơdjâk pá kong, kơdĭng ƀă châ tơƀrê.

Nôkố pơreăng COVID 19 hiăng pro hên hok tro lâm 12 thế pêi pro klâ kơtăn, lơ ối tung kơpong klâ kơtăn, djâk troh tơdroăng hriâm tâp ƀă hriâm hbrâ ăm hneăng tơ’noăng mơgêi râ má pái phôh thong.

            A Sa Ly tơplôu ƀă tơbleăng