VOV4.Sedang - Hâi lơ 22/4, a pơlê kong kơdrâm Đà Lạt, Vi ƀan kong pơlê Lâm Đồng ƀă Kơ koan teăng mâ Ấn Độ a Pơlê kong kân Hồ Chí Minh hiăng tơkŭm po Hneăng hôp “Tơmeăm ki ai hlâu vâ mơnhông, roh tơ’lêi mơ’no liăn cheăng tung kong pơlê Lâm Đồng ƀă khu tơrŭm cheăng ƀă Ấn Độ tung kơvâ pêi chiâk deăng”. A hneăng hôp, teăng mâ khu râ kăn pơkuâ kong pơlê, pôa Phan Văn Đa, kăn phŏ hnê ngăn Vi ƀan kong pơlê Lâm Đồng mơnhên, nôkố mâu khu tê mơdró, rơpŏng kuăn pơlê tung kong pơlê dế mơjiâng pro, tê mơdró hên tơmeăm pêi lo ing chiâk deăng ki dâi lĕm, tung mê, ai hên tơmeăm hiăng châ Kơ koan xiâm pơkuâ tuăn ngôa rơkê Việt Nam ăm mơ-éa mơnhên pơkuâ inâi môi tiah mâu tơmeăm kơchâi drêh, reăng, chếi, kơphế ƀă hên tơmeăm ki ê.

Hneăng hôp tơdjêp tê mơdró pơla Lâm Đồng ƀă kong têa Ấn Độ

Kố cho tơdroăng ki vâ tơ’lêi hlâu vâ mâu kơ koan dêi Lâm Đồng, mâu khu tê mơdró tung kong pơlê thăm tơbleăng tối, po rơdâ trâm mâ, tơrŭm mơjiâng pro tơmeăm khoăng ƀă tê ăm dêi pó tơmeăm khoăng ƀă mâu kong têa tung lâp plâi tơnêi, tung mê, ai Ấn Độ - môi kong têa ki  nôkố Lâm Đồng dế tê ƀă rôe tơmeăm ing kong têa kố.

A Sa Ly tơplôu ƀă tơbleăng