VOV4.Sêdang - Măng tĭng hdrối, mâu kong pơlê tung lâp tơnêi têa hiăng tơbleăng klêi kơ’nâi rôh tâ phĭu pôk kăn Kuô̆k hô̆i hneăng má 15 ƀă Hô̆i đong hnê ngăn rêm râ hneăng hơnăm 2021 – 2026. Tiô mơnhên tối dêi pôa Vương Đình Huệ, kăn xiâm hnê ngăn Kuô̆k hô̆i, klêi kơ’nâi séa ngăn tơdjuôm dêi lâp tơnêi ai 99,5% kuăn pơlê lăm tâ phĭu, hên tâ rôh tâ phĭu pôk kăn 5 hơnăm hdrối nah. Rôh tâ phĭu rôh kố gá tơƀrê, maluâ tung pơla ai pơreăng Covid-19 tâ tú.

A Kon Tum, tung 10 ngế kuăn pơlê a kong pơlê Kon Tum rah 6 ngế ki châ rah xo kăn hnê ngăn Kuô̆k hô̆i hneăng 15, ƀă kơxô̆ 82,97% troh 93,39%. Mê cho, pôa Nguyễn Văn Hùng, Ngế cheăng tung Tíu xiâm Đảng, Ngế xiâm ngăn ‘na mơhno túa lĕm tro, Tơ’noăng ivá bbă Ôm hyô; Jâ Trần Thị Thu Phước (kuăn ngo Rơteăng) kăn phŏ hnê ngăn Kŏng an kong pơlê Kon Tum; pôa Tô Văn Tám, kăn phŏ pơkuâ ngăn Khu kăn Kuô̆k hô̆i kong pơlê Kon Tum, Ngế cheăng tung Vi ƀan ‘na Luât dêi Kuô̆k hô̆i; pôa Phạm Đình Thanh, Ngế xiâm pơkuâ ‘na Luât kong pơlê Kon Tum; pôa U Huấn, Ngế ki hbrâ dêi Tíu xiâm Đảng, Ngế cheăng tung khu Đảng kong pơlê Kon Tum; jâ Nàng Xô Vi, kuăn ngo Brâu, pêi cheăng a Hngêi trung râ má pái hnê kuăn ngo ai tíu kâ koi a tơring Ia H’Drai.  

Kuăn pơlê kong pơlê Kon Tum hiăng rah xo 51 ngế kăn Hô̆i đong kong pơlê, 316 ngế kăn Hô̆i đong rêm râ tơring ƀă ƀă 2.164 ngế kăn Hô̆i đong râ cheăm. Ôh tá ai tíu tâ phĭu ki lâi thế vêh tâ phĭu nếo.

Pôa Vương Đình Huệ, Kăn xiâm hnê ngăn Kuô̆k hô̆i tối hneăng tâ phĭu klêi tơniăn lĕm

Tiu tối tơbleăng dêi Vi ƀan tâ phĭu kong pơlê Gia Lai, a kong pơlê kố ai lối 1 rơtuh ngế kuăn pơlê lăm tâ phĭu (châ 99,86%). Ăm hlo hneăng tâ phĭu tơniăn tro ‘na kơxô̆, ‘na tơdroăng pơkâ kơxô̆ mơngế, ki rơkê. Mê, ai 8/14 ngế ki lo tơbriât châ rah xo pro kăn Kuô̆k hô̆i hneăng 15; 71/119 ngế châ rah xo kăn Hô̆i đong kong pơlê, 571/951 ngế châ rah xo kăn Hô̆i đong râ tơring ƀă 4.997/8.455 ngế châ rah xo kăn Hô̆i đong râ cheăm.

A kong pơlê Dak Lak, hiăng rah xo tŭm kăn Kăn Kuô̆k hô̆i, 75 ngế kăn Hô̆i đong kong pơlê, 513/514 ngế kăn Hô̆i đong rêm râ tơring ƀă 4.628/4.658 ngế kăn râ cheăm. Tíu tâ phĭu kơxô̆ 9, 10, 11 (Cheăm Čư San, tơring MDrak) thế tơkŭm vêh tâ phĭu nếo vâ rah xo kăn Hô̆i đong râ cheăm hneăng hơnăm 2021-2026, xua bu ai pá xôp 50% ngế tung tâi tâng kơxô̆ kuăn pơlê lăm tâ phĭu.

Tơdroăng tơkŭm tâ phĭu rah xo kăn a 3 tíu tâ phĭu châ Vi ƀan tâ phĭu kong pơlê Dak Lak pơkâ a hâi tĭng, lơ 6/6. Tối tơdroăng tơkŭm tâ phĭu rah xo kăn Kuô̆k hô̆i hneăng 15 ƀă kăn Hô̆i đong kong pơlê hneăng hơnăm 2021-2026. Pôa Y Ƀiêr Niê, Kăn hnê ngăn Vi ƀan tâ phĭu kong pơlê Dak Lak  ăm ‘nâi:

‘’Ƀă tơdroăng mơ-eăm dêi tâi tâng khu cheăng kal kí ing kong pơlê troh tơring vâ tơbleăng tơdroăng tâ phĭu hiăng klêi tơniăn. Ƀă kơxô̆ kuăn pơlê lăm tâ phĭu châ 99,76%, vâ tối kố cho kơxô̆ ki hên má môi sap ing nah troh nôkố. Kơxô̆ phĭu rah xo vâ tối tŭm kơxô̆ 9 ngế kăn Kuô̆k hô̆i, ‘na mâu kăn Hô̆i đong kong pơlê châ 75 ngế tơniăn ‘na kơxô̆ ki hiăng pơkâ’’.

Kuăn pơlê Tây Nguyên tung hâi tâ phĭu

Tiô kơxô̆ tơbleăng dêi Vi ƀan tâ phĭu kong pơlê Dak Nông, hneăng tâ phĭu rah xo kăn Kuô̆k hô̆i hneăng 15 ƀă kăn hnê ngăn Hô̆i đong rêm râ hneăng hơnăm 2021-2026 a kong pơlê hiăng klêi tơniăn, ƀă ai 99,77% kuăn pơlê lăm tâ phĭu.

Tơdrêng ƀă tơdroăng tâ phĭu tŭm 6 ngế kăn Kuô̆k hô̆i hneăng 15, 52 ngế kăn Hô̆i đong kong pơlê, hneăng tâ phĭu xuân tơniăn tro ‘na kơxô̆, mơngế, ‘na ki rơkê lâm hriâm ƀă mâu kăn Hô̆i đong râ tơring ƀă râ cheăm.

A Lâm Đồng, kuăn pơlê hiăng pêi pro hnoăng ki pơxúa ƀă hnoăng cheăng dêi tơná vâ rah xo ngế kăn ki ai tuăn mơno lê̆m tơdrăng, rơkê, mơhno tŭm tơdroăng, tuăn chân, púi vâ dêi kuăn pơlê. Mê cho, hiăng tâ phĭu rah xo tŭm 7 ngế kăn Kuô̆k hô̆i hneăng 15, 66 ngế kăn Hô̆i đong rêm râ kong pơlê, 396 ngế kăn Hô̆i đong râ tơring ƀă 3,350 ngế kăn Hô̆i đong râ cheăm.

Tối tơbleăng a rôh hôp má 56 dêi Vi ƀan pơkuâ cheăng Kuô̆k hô̆i hdrối kô nah, pôa Vương Đình Huệ, kăn xiâm hnê ngăn Kuô̆k hô̆i ăm ‘nâi: hneăng tâ phĭu rah xo kăn Kuô̆k hô̆i hneăng 15 ƀă kăn hnê ngăn Hô̆i đong rêm râ hneăng 2021-2026, tung lâp tơnêi têa ai 99,57% ngế kuăn pơlê lăm tâ phĭu, hên tâ rôh tâ phĭu 5 hơnăm hdrối nah.   

Hneăng tâ phĭu rôh kố châ tơ-ƀrê, mơhé tung pơla dế ai pơreăng Covid-19 tâ tú rơ iô. Lâp tơnêi têa hiăng tâ tŭm 500 ngế kăn Kuô̆k hô̆i. Vâ tối tâ phĭu tŭm mâu kăn rêm râ cheăm, tơring, kong pơlê.

Ăm hlo hneăng tâ phĭu klêi tơniăn lĕm, Kăn xiâm hnê ngăn Kuô̆k hô̆i, Kăn xiâm hnê ngăn Hô̆i đong tâ phĭu tơnêi têa pôa Vương Đình Huệ pơkâ thế Ƀơrô Hô̆i đong tâ phĭu tơnêi têa rĕng pê klêi tơdroăng chêh tối tơbleăng rê̆ng ăm ‘nâi tơdroăng pơtroh ăm kăn hnê ngăn Đảng, Tơnêi têa ƀă Vi ƀan pơkuâ cheăng Kuô̆k hô̆i.

‘Na pôa Bùi Văn Cường, Ngế xiâm chêh tôm xo rơkong dêi Kuô̆k hô̆i, Ngế pơkuâ Ƀơrô Kuô̆k hô̆i, Kăn cheăng tung Ƀơrô Hô̆i đong tâ phĭu tơnêi têa mê ăm ‘nâi, hneăng tâ phĭu klêi tơniăn ƀă ai pơxúa kal khât. Kuăn pơlê pơtối séa ngăn, tí tăng ngăn tơdroăng cheăng mâu kăn Kuô̆k hô̆i plâ tung hneăng.

‘’Hneăng tâ phĭu ai pơxúa kal khât. Tâ phĭu rah xo mâu ngế ai tuăn lĕm   rơkê kơhnâ, ai tuăn mơ-eăm pêi cheăng tro tiô púi vâ dêi kuăn pơlê. Ing mê tâ phĭu rah xo mâu ngế kăn teăng mâ ăm kuăn pơlê. Ing tơdroăng tâ phĭu rah xo mâu ngế ki teăng mâ ăm tơná, mê tung hnoăng cheăng dêi mơngế kăn hnê ngăn kuăn pơlê cho hmâ khât ƀă kuăn pơlê, tơmâng kuăn pơlê, tơmâng kuăn pơlê veăng hnê tối tung tơdroăng xo pêi hnoăng cheăng.

Ngế kuăn pơlê séa ngăn mâu kăn pêi pro tiô rơkong tơhrâ pêi tơdroăng cheăng dêi tơná. Tâng mâu kăn ôh tá pêi pro tro, ôh tá pêi kơtăng mê kuăn pơlê pâ thế mâu kơ koan ai hnoăng séa ngăn’’.

Tiô pơkâ dêi Luât tâ phĭu rah xo kăn Kuô̆k hô̆i ƀă Kăn hnê ngăn Hô̆i đong kuăn pơlê, Hô̆i đŏng tâ phĭu tơnêi têa ngăn a hlá mơ-éa chêh mơgêi hneăng tâ phĭu tung lâp tơnêi têa tơbleăng kơxô̆ phĭu tâ ƀă inâi mâu ngế châ rah xo kăn Kuô̆k hô̆i ki hrá má môi ai 20 hâi klêi kơ’nâi hâi tâ phĭu (ki hrá má môi hâi lơ lơ 12/6/2021.

Quốc Học rah chêh

Gương tơplôu ƀă tơbleăng