VOV4.Sêdang - Tơdroăng Pro ăm theh căn cước hiăng ƀă dế châ Khu xiâm Kŏng an, kŏng an mâu kong pơlê, pơlê kong kân tung lâp tơnêi têa thâ pro rĕng tiô tơdroăng tơbleăng, tơniăn hdrối lơ 1/7/2021, pro klêi theh căn cước kuăn pơlê ăm tâi tâng mâu ngế ki chiâng ăm pro. Tơdroăng kố kal thế veăng kum dêi rêm râ, kơvâ cheăng ƀă malối cho hlê plĕng dêi rêm ngế kuăn pơlê. Vâ tơdroăng ăm theh Căn cước kuăn pơlê pêi pro tro tiô pơkâ mê kuăn pơlê thế pêi pro mâu tơdroăng cheăng tơná, rak vế tro mâu pơkâ dêi Luât Căn cước kuăn pơlê. 

Mâu hâi kố, tung lâp tơnêi têa, mâu kăn ƀô̆, mâu Kan sát Pơkuâ hlá mơ-éa ‘na tơniăn pơlê pơla mơdêk chôu pêi cheăng đi đo, pêi cheăng plâ hâi plâ măng troh a kơpong hơngế hơngo, mot a mâu rơpŏng vâ pro căn cước krâ chíp ăm kuăn pơlê vâ pêi pro châ tơƀrê “tơdroăng” troh khế 7/2021 kô pro ăm 50 rơtuh căn cước kuăn pơlê ăm kuăn pơlê. Mâu kăn ƀô̆, mâu kan sát hiăng tơkâ hluâ pá puât vâ pro ăm rêm ngế kuăn pơlê pơrá châ xúa mâu tơdroăng ‘na pro mơ-éa tiô rơxông nếo, kơdroh pro mơ-éa, tơdroăng prôk lăm ƀă hía hé.

Khu xiâm pơkuâ Kŏng an hiăng ai pơkâ thăm pơtroh kăn ƀô̆, kan sát rơtế ƀă kơmăi kơmok, kơmăi vi tĭnh kum tung tơdroăng pro ăm căn cước kuăn pơlê ăm mâu kong pơlê. Tơdrêng amê, hiăng hnê mơhno Kŏng an mâu kong pơlê tơkŭm tâi tâng mâu ngế pêi cheăng, thăm pơtroh kăn ƀô̆ pêi ‘na tơdroăng pro ăm căn cước kuăn pơlê tơniăn pêi cheăng ki vâ iâ má môi 15 chôu/hâi (sap ing 7 chôu troh 22 chôu); tơdrêng amê, tơkŭm pơkâ túa pêi pro ăm căn cước kuăn pơlê ăm Kŏng an mâu kong pơlê tiô rêm hâi; đi đo kheăn kơdeăn mâu kong pơlê ai troăng pêi rơkê, kêi đeăng hnoăng cheăng ƀă tơkâ hluâ pơkâ pro ăm căn cước kuăn pơlê.

Mơhé ối pá puât, tơdroăng cheăng hên ‘nâng thế pro tung môi pơla, kăn ƀô̆, mâu Kan sát pơkuâ mơ-éa ƀă Tơniăn pơlê pơla ƀă Kŏng an mâu kong pơlê xuân dế mơ-eăm, pêi plâ hâi plâ măng, lăm rêm cheăm, bêng, troh a kơtâu, pơlê kơpong kong ngo, a mâu pơlê a hơngế, tơkăng kong, rơlố ƀă kơpong kong ngo vâ pro ăm căn cước kuăn pơlê.

Xêo troh hâi lơ 6/5, lâp tơnêi têa hiăng tơdah vâ chê 40 rơtuh hô sơ pro căn cước kuăn pơlê; hiăng mơjiâng pro ƀă mơdrếo ăm kong pơlê 7,4 rơtuh to theh căn cước kuăn pơlê. Ƀă tơdroăng pro i nhên tơdroăg kuăn pơlê tơniăn “tro, tŭm, krúa, rêh”, troh nôkố, Kơ koan xiâm Kan sát Pơkuâ mơ-éa ‘na tơniăn pơlê pơla hiăng chiâng môi tung kơmăi vâ chê 99 rơtuh pơ’leăng mâ kuăn pơlê tung lâp tơnêi têa mot tung Kơmăi chôu ‘măn tơdroăng kuăn pơlê tung lâp tơnêi têa; hiăng chêh tŭm tơdroăng kuăn pơlê châ dâng 42 rơtuh ngế kuăn pơlê.

Ai hên kong pơlê pêi tơtro tơdroăng kố, môi tiah: Nam Định, Hải Dương, Thái Bình, Ninh Bình, Thừa Thiên Huế, Hà Nam ƀă hiá hé. Mâu kong pơlê hiăng pêi pro teăm tơdrêng ƀă châ tơƀrê hnê mơhno dêi Khu xiâm ‘na pêi pro tơdah hô sơ pro ăm căn cước kuăn pơlê ƀă mâu kuăn pơlê ki rêh ối pơtân cho a: Quảng Ninh, Bình Dương, Pơlê kong kân Hồ Chí Minh.

 Thươ̆ng tă Trần Thanh Phong, Kăn phŏ pơkuâ kan sát pơkuâ hlá mơ-éa ‘na rak tơniăn pơlê pơla kŏng an kong pơlê Đồng Tháp ai tối, vâ tơdroăng xing xoăng theh căn cước kuăn pơlê tiô pơkâ ƀă tro luât mê kuăn pơlê drêng troh pro mơ-éa vâ pro ăm theh căn cước kuăn pơlê kal pêi tiô pơkâ dêi Luât căn cước kuăn pơlê ƀă luât ai tơdjâk.

“Tung tơdroăng pro ăm căn cước kuăn pơlê nôkố mê pin kal pêi pro tiô pơkâ pro ăm căn cước kuăn pơlê châ Khu xiâm pơkuâ Kŏng an tơbleăng ăm pêi pro, tơbleăng rơdâ tung rơ’jíu, um tơvi ƀă kơpong kuăn pơlê rêh ối vâ kuăn pơlê ‘nâi. Tung tơdroăng môi tiah nôkố. Drêng vâi krâ lăm pro căn cước kuăn pơlê mê vâi krâ kal tơtrŏng mâu tơdroăng môi tiah kơ’nâi: Môi vâi krâ thế môi tuăn tơmâng ƀă tối ăm dêi pó tơdroăng dêi khu râ kăn pơkuâ drêng khu râ kăn pơkuâ tơbleăng ăm tơdroăng, ăm mơ-éa thơ krếo thế vâ vâi krâ troh tro tíu, tro chôu, hâi khế vâ pro căn cước kuăn pơlê, tơniăn ôh tá mơdoh chôu ƀă tơ’lêi hlâu tung tơdroăng pêi pro.

Má péa nếo, kuăn pơlê ôh tá ai chêh hâi khế tung mơ-éa pơ’leăng mâ mơngế xuân môi tiah mơ-éa kiêm tra mê vâi krâ xuân thế tối ăm khu râ kăn pơkuâ nhên cho troh viên chưk hnê ‘na luât a cheăm, bêng, pơlê kân tíu vâi krâ rêh ối vâ châ kăn ƀô̆ hnê mơhno ƀă tơ’nôm pro ăm khai sanh ƀă tơ’nôm chêh hâi khế vâ tiô pơkâ căn cước kuăn pơlê châ tơƀrê rĕng má môi”.

Tiah mê, drêng kuăn pơlê pro theh căn cước kuăn pơlê kal tơtrŏng:

-Thế tiô pơkâ dêi luât kố ƀă Luât ki ai tơdjâk;

-Pro mơ-éa vâ pro, pơ’lêh, vêh pro ăm nếo theh căn cước kuăn pơlê tiô pơkâ dêi luât kố;

-Tơbleăng tối tŭm, tơtro khât, tro hâi khế pơkâ tơdroăng mê, tơdroăng dêi châ chăn vâ chêh ‘măn tung kơmăi vi tĭnh tơnêi têa ‘na kuăn pơlê rêh ối ƀă Tơdroăng pro căn cước kuăn pơlê tiô pơkâ dêi Luât kố ƀă luât ai tơdjâk;

-Mơhno theh căn cước kuăn pơlê drêng kuăn pơlê ai hnoăng pơkâ séa ngăn tiô pơkâ dêi luât;

-Rak ‘măn, rak vế theh căn cước kuăn pơlê hiăng châ pro ăm; drêng hía teăm tơdrêng tơbleăng ƀă kơ koan pơkuâ căn cước kuăn pơlê;

-Vêh nâp theh Căn cước kuăn pơlê ăm kơ koan ai hnoăng tâng drêng pơ’lêh, tro xo tơvêh, râng pơtân theh tiô pơkâ a Troăng 23 ƀă Troăng 28 dêi Luât kố”.

Việt Phú – VOV4 chêh

A Sa Ly tơplôu ƀă tơbleăng