VOV4.Sedang - Hâi lơ 13/5, Hô̆i đong tâ phĭu Tơnêi têa séa ngăn hnoăng cheăng tâ phĭu a hên kong pơlê tung lâp tơnêi têa, vâ rak tơniăn hâi mơdĭng tâ phĭu châ tơkŭm po tơniăn lĕm. Khu kăn séa ngăn dêi Vi ƀan pơkuâ Kuô̆k hô̆i, Hô̆i đong tâ phĭu Tơnêi têa xua kăn xiâm phŏ hnê ngăn tơnêi têa, kăn xiâm phŏ hnê ngăn Hô̆i đong tâ phĭu Tơnêi têa Võ Thị Ánh Xuân pro kăn pơkuâ khu kăn kố hiăng lăm pêi cheăng ƀă kong pơlê Dak Nông.

Xuân tung hâi ki mê, Khu kăn séa ngăn dêi Vi ƀan pơkuâ Kuô̆k hô̆i, Hô̆i đong tâ phĭu tơnêi têa xua thươ̆ng tươ̆ng Nguyễn Văn Được, Kăn xiâm hnê ngăn Khu mố đô̆i hơnăm hiăng krâ Việt Nam, Ngế cheăng tung Hô̆i đong tâ phĭu Tơnêi têa pơkuâ djâ khu kăn kố hiăng ai rôh pêi cheăng ƀă Vi ƀan tâ phĭu kong pơlê Dak Lak ‘na hnoăng cheăng tâ phĭu.

Pôa Nguyễn Văn Được, Kăn xiâm hnê ngăn Khu mố đô̆i hơnăm hiăng krâ Việt Nam, Ngế cheăng tung Hô̆i đong tâ phĭu Tơnêi têa tơpui a rôh pêi cheăng

Thươ̆ng tươ̆ng Nguyễn Văn Được mơnhên tối khât mâu tơdroăng pêi pro ki Vi ƀan tâ phĭu kong pơlê Dak Lak hiăng pêi klêi. Tơdrêng amê hnối pơkâ thế kong pơlê Dak Lak pơtối séa ngăn tŭm mâu hlá mơ-éa, túa pơkâ dêi Tơnêi têa, dêi kong pơlê, tơring, cheăm ‘na hnoăng cheăng tâ phĭu.

Tơmâng ngăn khât troh tơdroăng kring vế, gak ngăn tơniăn, hbrâ mơdât mâu tơdroăng ki tơmiât vâ pêi pro tơ’nhiê rôh tâ phĭu; tơtrŏng rak tơniăn kring vế a mâu tíu ki kal. Mâu khu râ, kơvâ cheăng athế tơrŭm tơdâng tơ’mô, xing xoăng hnoăng cheăng, hnoăng pơkuâ pôu râng athế nhên; rak tơniăn rôh tâ phĭu tro luât, tơniăn hbrâ mơdât pơreăng.

Nga tơplôu ƀă tơbleăng