VOV4.Sêdang - Hâi lơ 14/4, Khu ki pêi dêi hnoăng cheăng dêi Hô̆i đong tâ phĭu tơnêi têa xua Thươ̆ng tươ̆ng Võ Thượng Việt, kăn pơkuâ Vi ƀan kring vế pro kăn pơkuâ djâ khu kăn kố ai rôh séa ngăn, hnoăng cheăng rak tơniăn kring vế ƀă khăm pơlât hbrâ ăm rôh tâ phĭu khu kăn Kuô̆k hô̆i ƀă Hô̆i đong hnê ngăn rêm râ hơnăm 2021 – 2026 a kong pơlê Gia Lai.

Tiô Vi ƀan tâ phĭu kong pơlê Gia Lai, kong pơlê hiăng mơjiâng 3 tíu tâ phĭu môi tiah ƀă 3 khu ki tâ phĭu pôk kăn Kuô̆k hô̆i ƀă mâu tíu tâ phĭu, mâu khu tâ pĭu pôk kăn hô̆i đong hnê ngăn rêm râ; mơjiâng 1.438 tôh tâ phĭu a mâu tíu tâ phĭu tung lâp kong pơlê.

Thươ̆ng tươ̆ng Võ Thượng Việt, kăn pơkuâ Vi ƀan gâk kring dêi Gô̆i đong tâ phĭu Tơnêi têa tơpui a rôh pêi cheăng

Rơtế ƀă mê, kong pơlê xuân hiăng tơkŭm po 2 rôh hôp tơkêa, pêi klêi mâu rôh xo rơkong veăng tơpui tối dêi kuăn pơlê a tíu rêh ối. Rôh hôp tơkêa rôh má 3 tiô tối hdrối kô châ tơkŭm po a hâi lơ 17/4 la ngiâ. ‘Na kring vế, rak tơniăn, Gia Lai hiăng ai khu ki pơkuâ, tơplâ tơƀrê ƀă mâu tơdroăng ki pêi pro ôh tá tro, mơhnhôk, tơbleăng mâu tơdroăng ôh tá tro, ‘mâi túa tơmiât ôh tá tro, hêng hôu tơdjâk troh ngế ki tơbriât.

Tơdrêng amê, kong pơlê xuân dế rak vế mâu tơdroăng cheăng dêi 24 tôh gak ngăn ƀă 10 tôh hbrâ mơdât pơreăng COVID-19 u kố u mê a kơpong tíu tơkăng kong ki tơdjêp ƀă Kul ƀă hên ki ê.

A rôh pêi cheăng, Thươ̆ng tươ̆ng Võ Thượng Việt, kăn pơkuâ Vi ƀan kring vế dêi Hô̆i đong tâ phĭu tơnêi têa mơnhên tối khât hnoăng cheăng rak tơniăn kring vế ƀă khăm pơlât ăm rôh tâ phĭu dêi kong pơlê Gia Lai, tơdrêng amê hnối loi tơngah tơdroăng ki tơkŭm po tâ phĭu kô châ tơniăn lĕm.

Katarina Nga tơplôu ƀă tơbleăng