VOV4.Sêdang - Ing tơdroăng gô̆m xo mơ-éa ki ôh tá xúa xếo, kơdĭng liăn tung chu ki meăn ƀă tơnêi hneăn, rôe lĭch têt vâ ai liăn pêi pro tiô tơdroăng pơkâ “Pơkâ cheăng kŭn”, ai hên hok tro ki rêh ối pá puât a kong pơlê Dak Lak hiăng châ tŏng kum troh a hngêi trung. Ing kơxô̆ liăn tŏng kum hiăng châ mâu hngêi trung diâp hnoăng liăn hriâm rơkê, tŏng kum tơmeăm khoăng hriâm tâp, hmân ếo tơtô ăm hok tro kơtiê.

Klêi kơ’nâi cô ki pơkuâ ngăn đô̆i tơbleăng tung rôh koh hlá cờ apoăng măng tĭng ƀă cô ki pơkuâ ngăn lâm rơtế ƀă ngế kăn pơkuâ ngăn lâm tơbleăng a lâm, o Nguyễn Quỳnh Nhi, lâm 7A2, hngêi trung râ má péa Ngô Quyền, pơlê kân Ea Drăng, tơring Ea Hleo, kong pơlê Dak Lak hiăng kơhnâ tơkŭm hlá mơ-éa ki hiăng ton ôh tá xúa xếo vâ djâ nâp a lâm.

Nguyễn Quỳnh Nhi hơ’muăn, muăn ƀă vâi pú mơ-eăm veăng pêi tơdroăng mơhnhôk Pơkâ ki kŭn xúa hngêi trung mơhnhôk pêi. Ôh tá ai mâu kơxô̆ liăn ki kân vâ veăng tơlo mê muăn thăm ‘măn i lĕm mâu hlá mơ-éa ton ki hlo tơklêh a plông hngêi trung lơ tung lâm râng djâ ‘măn dêi hngêi vâ ‘măn ăm ‘na  Tơdroăng pơkâ ki kŭn.

“Rêm hâi ai hlá mơ-éa ki lâi ôh tá xúa xếo á kô xo tâ tung kơthung ki ‘măn a víu hriâm dêi á vâ troh hâi thế nâp mâu hlá mơ-éa ton ah á xo mâu hlá mơ-éa ki mê ah á tâ tung chá nilong râng djâ nâp ăm hngêi trung. A tâ hơniâp ro tung tuăn mơno xua á hiăng châ veăng kum mâu ngế kơtiê á tung hngêi trung, veăng tơlo liăn iâ veăng kum vâi pú. Pakĭng mê, hngêi trung á xuân ối xúa kơxô̆ liăn ki mê vâ pro plông xah hêi”.

Hok tro hngêi trung râ má péa Ngô Quyền, Êa Drăng pêi pro tơdroăng Pơkâ kŭn

Ƀă túa tơbleăng pêi ki tơ’lêi hlâu, tung roh mơhnhôk ki apoăng a hơnăm 2020-2021, hngêi trung râ má péa Ngô Quyền hiăng tơkŭm châ dâng 2 tâ̆n hlá mơ-éa ki hiăng ton, tê châ 3 rơtuh 500 rơpâu liăn. Tơdrêng amê, a hngêi trung ối tơbleăng pêi mâu tơdroăng, mê cho: Mơhnhôk veăng tơlo hmân ếo, hlá mơ-éa hriâm, tơmeăm xúa tung hriâm ối châ ăm mâu vâi pú hok tro kơpong kơtiê xơpá. Tung 5 hơnăm hriâm hdrối kô nah, hngêi trung hiăng tơlo châ 1 rơtuh 500 plâ hmân ếo; 800 kơxop hlá mơ-éa hriâm; lối 200 to muâk, kơtong tâ hlá mơ-éa, tơmeăm xúa tung hriâm, tơ’mô dâng lối 1,2 tâ̆n tơmeăm ăm mâu vâi o phô̆m xông kân, vâi o ki kơtiê xơpá má môi a mâu pơlê cheăm hngế hngo tung tơring.

O Phan Trường Nhất, Liên đô̆i phŏ hngêi trung râ má péa Ngô Quyền, pơlê kân Ea Drăng, tơring Ea H’Leo, kong pơlê Dak Lak tối:

“A hlo vâi pú veăng pêi kơhnâ tơdroăng, tơkŭm mâu hlá mơ-éa ki hiăng ton tôm mâu hlá mơ-éa ki klêh a tơnêi, mâu hlá mơ-éa ki hiăng klêi chêh ki hiăng xúa, tơkŭm ‘măn, vâ kum ăm mâu vâi pú ki kơtiê xơpá, mâu vâi pú ki nguăn loi hiăng mơ-eăm tơkâ luâ xơpá, hriâm rơkê”.

Ôh tá xê to a hngêi trung râ má péa Ngô Quyền, ing hên hơnăm hdrối mê hía nah, tơdroăng mơhnhôk pơkâ kŭn hiăng châ hên hngêi trung hriâm râ má môi ƀă má péa a Dak Lak tơbleăng ƀă po rơdâ. Ƀă hên túa pêi pro ki pơrá phá môi tiah: kum pú, mơhnhôk dêi rơpó mơ-eăm, vó tâ phái hơ-ui pâ, Khu í kên khêi, Liăn ‘măn kơdĭng xúa vâi pú kơtiê, Păn chu tơnêi ƀă hên tơdroăng ki ê… Tơdroăng mơhnhôk pêi pro mê hiăng pêi troh lâp lu vâ tăng kơxô̆ liăn veăng kum mâu hok tro ki ối pá puât, mơ-eăm tơkâ luâ xơpá hriâm rơkê. O Nguyễn Thái Thùy Linh, hok tro hngêi trung râ má péa Tân Lợi, pơlê kong kơdrâm Ƀuôn Ma Thuột, kong pơlê Dak Lak hơ’muăn tối:

“A Hngêi trung Tân Lợi dêi o xuân ai hên tơdroăng mơhnhôk pêi pro tŏng kum vâi pú ki kơtiê xơpá, môi tiah tơkŭm ‘măn mâu hlá mơ-éa ki hiăng klêi chêh ki ôh tá xúa xếo, hlá mơ-éa hiăng ton, tơlo hmân ếo, rôe lịch nâp chu tơnêi. Troh a mơ’nui hơnăm, hngêi trung xúa mâu kơxô̆ liăn ki mê vâ kum mâu vâi pú ki kơtiê xơpá. Á tâ hơnâp ro tung hiâm mơno ƀă á púi vâ hngêi trung kô veăng kum mâu vâi pú ki mê hên tâ’’.

Ing kơxô̆ liăn ‘măn kơdĭng dêi tơdroăng mơhnhôk Pơkâ kŭn hiăng kum hên mâu đô̆i viên, hok tro châ xúa

Tiô ngoh Doãn Tới,  Kăn hnê ngăn Hô̆i đong Đô̆i kong pơlê Dak Lak, ôh tá xê to kơjo kum mâu vâi o ki kơtiê xahpá, tơdroăng mơhnhôk pêi pro mê ối veăng hnê ăm mâu đô̆i viên, vâi o hok tro hriâm tơdroăng ki lĕm tro, ‘nâi kơdĭng liăn tơmeăm, hâk vâ kơhnâ pêi cheăng, rak vế hyôh kong prâi ƀă hnê ăm ai tuăn ‘nâi tơrŭm môi tuăn dêi rơpó, ‘nâi hơ ui kum dêi rơpó, veăng kum mâu ki kơtiê, mâu ki puât.

“Ing mâu kilôgam hlá mơ-éa hiăng ton ing mâu kơ’lo têa ngeăm mâu vâi o hiăng tôm tơkŭm ‘măn mê hiăng veăng ’no hnoăng ki veăng kum liăn vâ pro thăm rế hên tơdroăng pêi pro ki lĕm. Má péa nếo, ing mâu tơdroăng pêi pro ki kŭn môi tiah mê mâu vâi o hiăng chiâng ai xêh tuăn ‘nâi tơchĕng tơmiât tơdroăng ki lĕm ‘nâi hơ-ui ƀă ing mê kô chiâng mơngế ai tuăn lĕm, ‘nâi hơ-ui pâ  kơ mâu ki ê, ‘nâi pêi pro tơdroăng xúa vâi pú, kuăn pơlê ƀă ‘nâi kum mâu vâi pú ki ối xơpá tâ.

Hên vâi o ki châ xúa bă châ xo tơmeăm ki tŏng kum ing mâu tơdroăng mơhnhôk  pêi pro hơnăm ối iâ pêi cheăng kŭn, mê cho mâu hnoăng liăn hriâm, mâu tơdroăng veăng kum ing mâu khu cheăng Đô̆i tung hngêi trung ƀă pa kong hngêi trung”.

Ing kơxô̆ liăn dêi tơdroăng mơhnhôk Pơkâ ki kŭn, hên hngêi ối, kơpong xah hêi ăm vâi o, vâi ‘nĕng, tơmeăm mơjiâng pro ăm vâi ‘nĕng hiăng châ mơjiâng pro a Dak Lak. Tơdroăng mơhnhôk pêi pro mê hiăng pro pơxúa tơ-ƀrê, pro tơ’lêi hlâu vâ pơtối kum ăm mâu vâi o ki kơtiê xahpá châ lăm hriâm a hngêi trung.

Gương tơplôu ƀă tơbleăng