VOV4.Sedang - A roh hôp mơ’no tơdrêng tung um tơvi kơxê hâi lơ 16/5 a tíu pêi cheăng Chin phuh pơla Khu râ kăn ai mâ đi đo Khu hnê mơhno tơnêi têa ƀă kong pơlê Bắc Giang ƀă Bắc Ninh – 2 kong pơlê ki tâ pơreăng COVID 19 xông tâ tú ó ăm hlo tŭm 2 kong pơlê pơrá châ hlo tơ’nôm chât ngế dương tĭnh virus SARS-CoV2.

Pơkuâ roh hôp, pôa Vũ Đức Đam, Ngế pro xiâm phŏ hnê ngăn tơnêi têa, Kăn pơkuâ hnê mơhno tối ăm ‘nâi tung 24 chôu la ngiâ pro troăng phôn ki ai ngế tơmâng đi đo vâ tơdah rơkong tối ‘na ivá châ chăn ăm ƀok thái pơkeăng dêi kuăn pơlê drêng thâ.

Mơgêi roh hôp, pôa Vũ Đức Đam, Ngế pro xiâm phŏ hnê ngăn tơnêi têa tối nhên pơreăng xông tâ tú rĕng ó khât a Bắc Giang xua cho kơpong hngêi kơmăi kơmok kơdrâm mơngế, pêi cheăng tung tíu kí ƀă virus ki nếo xông tâ tú rĕng.

Ngế pro xiâm phŏ hnê ngăn tơnêi têa tối nhên, vâ châ pêi pro péa xôh tơdroăng cheăng, bu mơdât kơpong ôh tá ăm prôk lăm a mâu tíu pơreăng tơ’lêi xông tâ tú, laga nôkố ai tíu pơkuâ ôh tá kơtăng tíu mơdât ôh tá ăm prôk lăm, kal pơ’lêh tơdroăng kố. Khu hnê mơhno tơnêi têa hiăng xing xoăng rêm ngế séa ngăn mâu pơlê vâ séa ngăn tơdroăng pêi pro.

A Sa Ly tơplôu ƀă tơbleăng