Môi tiah hmâ, hâi lơ 16 rêm khế, ƀok thái pơkeăng Y Nham Niê, Ngế pơkuâ hngêi pơkeăng cheăm Krông Na, tơring Buôn Đôn rơtế ƀă mâu kăn ƀô̆, mâu ngế cheăng khăm pơlât lăm troh a pơlê Drăng Phôk, cheăm Krông Na vâ khăm, pơlât ivá kuăn pơlê. Buôn Drăng Phôk tung kong kân dêi kơdrum kong ilâng Tơnêi têa Yok Đôn, kơtăn Hngêi pơkeăng cheăm vâ chê 20km, tơdroăng lăm a hngêi pơkeăng cheăng vâ khăm  pơlât trâm hên xơpá.

Rêm rôh lăm troh a pơlê, ƀok thái pơkeăng Y Nham đi đo mơdoh chôu hnê ăm kuăn pơlê ‘na tơdroăng hbrâ mơdât pơreăng:

“Tung kơpong hngế hơngo kố hên ngế châi tamo, malối cho tơngê lo mơheăm xuân u ối, achê kố nếo ai mâu pơreăng ki ê tơdjâk ing tíu ê troh xuân dế ối a kố. Kuăn pơlê ôh tá hlê, tá ‘nâi vâ rak vế, kuăn pơlê ‘nâi dêi tơná châi ‘nôi nếo pôu ƀok thái pơkeăng, ‘vâi ôh tá vâ hbrâ mơdât pơreăng”.

Hdrối nah, mâu ngế pêi hnoăng cheăng khăm pơlât a thôn pơlê thế lăm pôu hnê tối tơrêm hngêi thế kuăn pơlê lăm khăm tiô rơnó, mê nôkố, troh a hâi lơ 16 rêm khế, kuăn pơlê ‘nâi lăm troh xêh a hngêi kuăn pơlê hmâ tơkŭm hôp vâ khăm dêi tơná ƀă tơmâng ƀok thái pơkeăng hnê tối tơdroăng thế rak ngăn ivá.

Nâ H’Thép Knul ối a ƀuôn Drăng Phôk ăm ‘nâi:

“Ƀok thái pơkeăng Nham troh a kố khăm, hnê tối ăm kuăn pơlê a kố kơhnâ khât, kơnôm ƀok thái pơkeăng mê kuăn pơlê ‘nâi tơdroăng rak ngăn dêi ivá’’

Cho mơngế kuăn ngo Rơđế kot mâ ƀă xông kân a tơnêi cheăm Ea Bar, tơring Ƀuôn Đôn, drêng hiăng hriâm klêi kơvâ Y Khoa, hơnăm 2002 nah, ngoh Y Nham Niê xo pêi hnoăng cheăng a Hngêi pơkeăng cheăm Ea Bar. Sap hơnăm  2016 troh nôkố, ƀok thái pơkeăng Y Nham châ râ kơpêng thế vêh pro Ngế pơkuâ hngêi pơkeăng cheăm Krông Na.

Lối 20 hơnăm hmâ ƀă tơdroăng cheăng khăm pơlât ƀă hiăng ai 7 hơnăm pêi cheăng hơngế ing hngêi kơtăn lối 20km, ôh tá ai kơbố hlê tơ’mô ƀăng ngoh, tơdroăng rêh ối dêi kuăn pơlê kơpong hngế hngo, kơpong tíu tơkăng kong trâm hên xơpá kố; la xuân ối hên túa tơlá ki ôh pá tro ton nah kuăn pơlê ối rak pro tơdjâk ‘mêi troh ivá kuăn pơlê.

Ƀăng tơdroăng ki tơná hiăng hriâm  hlối kơhnâ vâ khât ƀă tơdroăng cheăng, ƀok thái pơkeăng Y Nham ôh tá xâu pá puât xua troăng prôk, hâi kong tô xuân môi tiah kong mêi, mơ-eăm ƀă vâi pú ƀă mâu ngế pêi hnoăng cheăng khăm pơlât hnê tối kuăn pơlê tah lôi túa tơlá ton nah ki ôh pá tro, hnê kuăn pơlê rak ngăn ivá drêng mơhum kuăn, hnê mâu nôu pâ thế ăm kuăn ‘nĕng lăm pâk pơkeăng mơdât pơreăng pro rơdâ tro hâi khế pơkâ.

Kơnôm mơ-eăm dêi ƀok thái pơkeăng Y Nham ƀă mâu ngế cheăng khăm pơlât dêi cheăm, tơdroăng khăm pơlât ivá kuăn pơlê apoăng a cheăm Krông Na hlo chía tơƀrê. Kơxô̆ rơpŏng hngêi ai kuăn má pái ƀă tơdroăng rĕng xo on veăng tá hâi tro hơnăm, lơ xo on veăng ối pơdjuôm môi mơheăm hdrông hdrê a cheăm kố hiăng kơdroh, kơxô̆ mơngế lăm pâk pơkeăng mơdât pơreăng po rơdâ châ luâ tơdé.

Ƀok thái pơkeăng Y Nham tối:

“Tuăn á tơmiât ki kal cho rak ngăn khăm pơlât ivá ăm rêm ngế, ôh tá pơrah  tíu kô tíu ki tá, kuăn pơlê kal, tơnêi têa thế lăm a thế prôk. A đi đo mơ-eăm xo tơdroăng ki tơná hiăng hriâm, ki hiăng hlê tung pơla tơná pêi cheăng vâ pêi cheăng khăm pơlât ngăn kuăn pơlê’’.

Ôh tá xê to kơhnâ vâ khât ƀă tơdroăng khăm pơlât ivá kuăn pơlê, ƀă hnoăng cheăng tơná pro Ngế pơkuâ ngăn hngêi pơkeăng cheăm, ƀok thái pơkeăng Y Nham  ối chêh pơkâ nhên tơrêm tơdroăng cheăng pêi dêi Hngêi pơkeăng tiô kơ măng tĭng, tiô kơ rêm khế xuân môi tiah hbrâ rơnáu hdrối ‘na tơdroăng tối tơbleăng hdrối ‘na pơreăng tâ tú a pơlê,  cheăm vâ ai tơdroăng tối, pâ thế, tí tăng ‘nâi pleăng teăm tơdrêng ăm râ kơpêng. Pakĭng mê, ƀok thái pơkeăng Y Nham ối kơhnâ hnê ăm mâu ngế cheăng ngăn pơkeăng tung cheăm vâ vâi rế rơkê tung tơdroăng khăm pơlât.

Ngoh Y Sới Hwing, ngế phŏ pơkuâ hngêi pơkeăng cheăm Krông Na ăm ‘nâi:

“Ƀok thái pơkeăng Nham cho môi ngế kơhnâ vâ khât ƀă hnoăng cheăng, ‘nâi hnoăng cheăng tơná pêi kơhnâ ‘nâng. Rêm khế klêi hôp chi bô̆ la lâi ƀok thái pơkeăng Nham xuân tơbleăng tối môi túa pơreăng ki lâi ‘lo vâ hnê, klêi mê vâ tơbleăng tăng môi tơdroăng khăm pơlât drêng trâm tơdroăng châi ki mê, ƀok thái pơkeăng xuân hnê hdrối, ƀok thái pơkeăng hlê tơdroăng klâi xuân hnê tối ăm  vâi ngoh o tung hngêi pơkeăng, vâ drêng ƀok thai pơkeăng prôk tíu ê  ‘lo vâ vâi ngoh o tung hngêi pơkeăng chiâng vâ khăm pơlât’’.

Mâu hnoăng veăng ‘no dêi ƀok thái pơkeăng Y Nham Niê tơxâng nhoăm khât, ngoh ôh tá xê to môi ngế ƀok thái pơkeăng rơkê tung khăm pơlât ƀă  mâu tơdroăng cheăng pêi, mê ối ai hiâm tuăn lĕm tơxâng cho ngế ki djâ troăng lĕm a hdrối tung kơvâ ngăn pơkeăng a kơpong tíu tơkăng kong.

Kơnôm ing rơkê kơhnâ ƀă pơtối rak ki lĕm kuăn pơlê pâ nhoăm vâ pro xiâm ăm kuăn pơlê loi nhoăm mê hiăng kum ăm Ƀok thái pơkeăng Y Nham tơbleăng pê klêi mâu Tơdroăng cheăng ‘na khăm pơlât dêi tơnêi têa troh a thôn pơlê pêi châ tơƀrê.