Khoa Cấp cứu Hồi sức tích cực chống độc dêi Hngêi pơkeăng kân pơlê kong kơdrâm Buôn Ma Thuột hiăng hbrâ 6 to xoăng koi pơlât ƀă 5 to xoăng pơlât tơdrêng vâ tơdah mơngế ki pơlât tung rôh Têt. Ƀok thái pơkeăng Trần Thanh Qúy, Phŏ Khoa cấp cứu Hồi sức tích cực chống độc, ăm ‘nâi:

“Khoa hiăng hbrâ môi khu ki pêi cheăng tơkôm vâ xo pơlât mê cho 1 ngế ƀok thái pơkeăng 2 ngế điều dưỡng ƀă pêi cheăng plâ hâi măng hbrâ vâ pơlât ngăn tâng lơ ai ngế mot pơlât, malối cho tơdroăng tro hơ-ôu kế kâ  xuân môi tiah trâm xía vâ rong râ a troăng prôk tiah hmâ trâm tung rôh Têt’.

Hngêi pơkeăng kân kơpong Tây Nguyên, ƀă hnoăng cheăng pêi cho hngêi pơkeăng pơlât ki má mơ’nui dêi kơpong Tây Nguyên, đi đo hbrâ rơnáu vâ hbrâ tŭm tơdroăng vâ pơlât mâu ngế ki râ ƀă pơlât tơdrêng. Ƀok thái pơkeăng Nguyễn Doãn Sơn - Phŏ ngế pơkuâ Khoa cấu cứu, ăm ‘nâi, a rôh Têt mơngế mot pơlât tơdrêng hên ‘nâ hía tâk 50% tâng vâ pơchông ƀă hâi ki ê, malối cho mâu rôh pơlât mơngế rong râ trâm xía vâ, ƀă pơlât mơngế ki châi na plâi nôih ƀă kơdrâ mơheăm ôh tá kơtâu troh a ngôa.

“Ngin kô mơdêk hnoăng cheăng gak ngăn, mơdêk tơ’nôm 1 khu pơlât tơdrêng nếo, 1 khu gum veăng pơlât ngăn ƀă 1 khu ki hbrâ rơnáu tâng kal kô krếo tâng drêng ai hên ngế pơlât lơ hên mơngế trâm xía vâ kô krếo mâu khu ki hbrâ rơnáu mê. Pakĭng mê kô tơbleăng 1 khu pêi cheăng ôh tá pơtê a Khoa, tâng lơ ai tơdroăng xing xoăng ngin kô krếo 1 bok thái pơkeăng, 2 điều dưỡng veăng pêi cheăng pơlât ngăn tơdrêng a hngêi pơkeăng”.

Tơdrêng ƀă hbrâ mơngế, tơmeăm pơlât ƀă pơkeăng, Hngêi pơkeăng kân kơpong Tây Nguyên xuân tơmâng khât troh tŏng gum ‘na tơmeăm ƀă hơlêm tuăn ngoâ mơngế ki pơlât a hngêi pơkeăng tung rôh Têt. Ƀok thái pơkeăng Nguyễn Ngoc Thịnh, Phŏ Pơkuâ hngêi pơkeăng, ăm ‘nâi:

“Tâi tâng mâu khoa hbrâ ƀă pơlât apoăng ngin hnê tối thế kơdroh, pôi tá pơtê pâ phêp vâ xúa drêng kal pêi cheăng pơlât mâu ki châi tamo ăm tro tâ, krê ƀă khoa cấp cứu ƀă hồi sức tích cự thế pêi cheăng plâ hâi măng. Tung rôh Têt kố ngin tơkŭm po kơchơ Tết ăm mâu ngế châi tamo ki kơtiê xơpá, pơtih kum ăm phái, têa rơmâ, têa tôu ro vâ mâu ngế châi tamo ki dế pơlât mê tâ tơtô tung hiâm mơno”.

Ôh tá xê to mâu hngêi pơkeăng râ kong pơlê, mâu hngêi pơkeăng râ tơring xuân hbrâ nhên há Têt Lo hơnăm nếo. Ƀok thái pơkeăng Lê Thị Thủy, Ngế pơkuâ hngêi pơkeăng tơring MDrak, ăm ‘nâi:

“Ngế pơkuâ ngăn hnê mơhno ăm tâi tâng mâu khoa tung rêm veăng pơlât, hngêi pơkeăng cheăm tung tơdroăng hbrâ mâu tơdroăng pêi pro vâ tơtro má môi vâ pơlât ngăn mơngế châi tâ mo a 2 tíu, ƀă Hngêi pơkeăng tơring hbrâ tơbleăng pêi tơdrêng hên tơdroăng ki kal tơdjâk troh pơkeăng, tơmeăm pơlât klêi mê xoăng mơngế pêi cheăng, gak ngăn vâ tơniăn tung tơdroăng cheăng khăm pơlât tơdrêng hdrối, tung pơla Têt ƀă klêi kơ’nâi Têt Lo hơnăm nếo”.

Môi tiah mê, a Hngêi pơkeăng tơring tơkăng kong Ea Súp, ƀok thái pơkeăng Nguyễn Viết Hữu, Ngế pơkuâ hngêi pơkeăng, xuân tối:

“Ngin ôh tá ăm mơngế pơtê tung rôh mơ’nui hơnăm ƀă Têt, vâ ai tŭm kơxô̆ mơngế pêi cheăng khăm ngăn pơlât kuăn pơlê tung rôh Têt”.

Kơvâ ngăn pơkeăng Dak Lak hiăng chêh pơkâ hbrâ ing mâu hngêi kong pơlê troh mâu hngêi pơkeăng tơring, vâ tơniăn tơdroăng cheăng khăm pơlât ngăn mâu ngế châi tamo ƀă pơlât tơdrêng. Ƀok thái pơkeăng Nguyễn Hữu Quang, Phŏ pơkuâ ngăn Hngêi pơkeăng, tối:

“Hngêi pơkeăng hiăng ai hlá mơ-éa chêh pơtroh ăm tâi tâng mâu hngêi pơkeăng cheăm hbrâ mơngế pêi cheăng vâ pơlât ngăn, tơmeăm pơlât, mâu pơkeăng thế ai tŭm sap ing tơring troh kong pơlê. Kơvâ ngăn pơkeăng hbrâ rơnáu vâ tơdah xo pơlât mâu ngế ki lo ing pơlê cheăm troh pơlât tung rôh Têt. Pêi cheăng pơla têt ôh tá pơtê môi tiah pêi cheăng kring gak tíu tơkăng kong’’.

Tơdroăng hbrâ nhên ƀă hnoăng cheăng pêi tơná dêi mâu ngế ngăn pơkeăng, kơvâ ngăn pơkeăng Dak Lak hiăng hbrâ tŭm tơdroăng lơ trâm tung mâu hâi Têt. Mơhé pơlât tơdrêng lơ pơlât ngăn kuăn pơlê ki tiah hmâ rêm hâi. Mâu ƀok thái pơkeăng đi đo pêi cheăng tá hiâm tuăn, vâ ai môi Têt tơniăn ƀă tơtô ăm kuăn pơlê./.