Kơxo lơ 19/4, kơvâ ngăn pơkeăng ƀă khăm pơlât Dak Lak hiăng pêi pro xo têa môh rơkong vâ séa ngăn COVID-19 ăm mâu hok tro hngêi trung râ má péa Trung Vương, bêng Thành Công, pơlê kong kơdrâm Ƀuôn Ma Thuột. Hdrối mê, hâi lơ 18/4, a hngêi trung kố hiăng ai 8 ngế yương tĭnh ƀă SARS-CoV-2. Tiah mê, kơvâ ngăn pơkeăng ƀă khăm pơlât Ƀuôn Ma Thuột hiăng toê ngăn môh rơkong ƀă 49 ngế cho mâu hok tro ki ối a chê ƀă mâu ngế ki tro virus SARS-CoV-2. Klêi mê, ai tơ’nôm 7 ngế yương tĭnh ƀă virus SARS-CoV-2, mâu ngế ki kố pơrá rơtế hriâm lâm 8D ƀă mâu ngế ki tâ pơreăng hdrối mê. Nôkố ivá dêi 8 ngế hok tro tro COVID-19 tơniăn, mâu vâi o pơrá châ pơkâ thế pơlât a hngêi ƀă ai kăn ƀô̆ ngăn pơkeăng séa ngăn rêm hâi.

Troh hâi dế lơ 19/4 tâi tâng kơxô̆ ngế tâ COVID-19 a kong pơlê Dak Lak ai 22 ngế, krê pơlê kong kơdrâm Ƀuôn Ma Thuột ai 17 ngế, tung mê ai 15 ngế tung tíu ki ai pơreăng dêi hngêi trung râ má péa Trung Vương. Ƀok thái pơkeăng Nguyễn Văn Lý, kăn phŏ pơkuâ Tíu xiâm ngăn pơkeăng ƀă khăm pơlât pơlê kong kơdrâm Ƀuôn Ma Thuột ăm ‘nâi, hlo tơdroăng ki rơ-iêo dêi pơreăng COVID-19 drêng kơxô̆ ngế tâ tâk tung mâu hâi pơla hdrối nah, kơvâ ngăn pơkeăng ƀă khăm pơlât hiăng tí tăng ‘nâi plĕng ăm Vi ƀan hnê ngăn pơlê kong kơdrâm ‘na túa pơkâ hbrâ mơdât COVID-19.