Vâ hbrâ rơnáu tung tơdroăng ki hbrâ mơdât ki tâ tú mâu kơxô̆ ngế tâ COVID-19 tung rôh pơtê hiăng vâ troh la ngiâ, kơxo lơ 25/4, Vi ƀan hnê ngăn kong pơlê Dak Lak tơkŭm po rôh hôp tơbleăng hnoăng cheăng hbrâ mơdât pơreăng COVID-19 tung rôh leh lơ 30/4 ƀă lơ 1/5.

Tối tơbleăng a rôh hôp, teăng mâ Khu ngăn pơkeăng ƀă khăm pơlât kong pơlê Dak Lak ăm ‘nâi, riân sap ing apoăng hơnăm troh nôkố, lâp kong pơlê ai 85 ngế tâ COVID-19, tơkŭm hên a pơlê kong kơdrâm Ƀuôn Ma Thuột ƀă 33 ngế. Vâ kơdroh má môi tơdroăng ki tâ tú dêi pơreăng tung rôh leh pơtê, Vi ƀan hnê ngăn kong pơlê Dak Lak pơkâ thế kơvâ ngăn pơkeăng séa ngăn tâi tâng mâu xoăng koi pơlât, kế tơmeăm xúa tung khăm pơlât a mâu hngêi pơkeăng; mơdêk hnoăng cheăng pâk vaccine COVID-19. Tung mê, kơjo kum ăm mâu ngế ki hiăng hên hơnăm, ngế ki ai pơreăng tung châ ƀă vâi hdrêng: tơrŭm ƀă mâu khu râ, kơvâ cheăng, tơring, cheăm vêh po hnoăng cheăng hbrâ mơdât COVID-19; pêi pro kơtăng tơdroăng pơkâ 2K pâng kên tât môh rơkong ƀă xôh kơdê pơreăng, malối cho a mâu kơpong ki ối tơdjuôm, kơpong hơlâ troăng mot, tơraih tơƀai, tơraih rơxế.