Ƀă vâi krâ nhŏng o hdroâng kuăn ngo Rơđế a ƀuôn Kŏ Mleo – tíu ki ai hên ngế ki tro pơreăng tơngê mơdrâu a cheăm Hòa Thắng, pơlê kong kơdrâm Ƀuôn Ma Thuột mâu hơnăm hdrối, mê pơreăng tơngê mơdrâu nôkố hiăng ôh tá ai xếo. Nâ H’Robeca Mlô, ƀuôn Kŏ Mleo, ăm ‘nâi:

“Tung pơlê mê ki hên vâi krâ nhŏng o lăm pêi chiâk pêi deăng hên, ai ngế ki ‘nâ mê lăm tung kong đôu tơpăng. Nôkố hiăng hlê plĕng khât, vâi hlê hên tâ hdrối nah. Kơnôm ing peăng Hngêi pơkeăng cheăm lăm chu troh hnê tối, mê nôkố tâng tro tơngê mê vâi lăm xêh a Tíu khăm pơlât cheăm, ôh ti xê to môi tiah hdrối nah xếo, ai xếo tơdroăng ki krếo pơchâu xối, tâng lăm tung kong mê xuân djâ mi-tơ-kel”.

Ƀok thái pơkeăng Hoàng Văn Hùng, ngế ki pơkuâ hngêi pơkeăng cheăm Hòa Thắng ăm ‘nâi, ki hlê plĕng ƀă tơdroăng ki hbrâ mơdât pơreăng dêi kuăn pơlê rế hía rế mơdêk; Tơdroăng rêh ối châ hơ’lêh mê tơdroăng ki lăm tung kong, lăm pêi chiâk koi tâm tung kong rế hiăng ai xếo; Rơtế a mê tơdroăng ki tơbleăng mâu tơdroăng hbrâ mơdât pơreăng tơngê mơdrâu xuân đi do châ Hngêi pơkeăng cheăm tơtrŏng:

“Hngêi pơkeăng hôp tơbleăng rêm khế ăm khu ki cheăng ‘na khăm pơlât vâ mơdêk hnê tối hbrâ mơdât pơreăng tơngê mơdrâu ăm mâu ngế ki tơ’lêi tro môi tiah mâu ngế ki hmâ lăm prôk tung kong mâu ngế ki ai nhŏng o, rơpŏng hngêi lăm pêi cheăng hngế a mâu kong pơlê dế ai pơreăng tơngê mơdrâu, mê hbru ăm mi-tơ-kel ai tâm trếo pơkeăng”.

Tiô ƀok thái pơkeăng Võ Minh Hùng, Kăn pơkuâ Tíu xiâm ngăn pơkeăng pơlât pơlê kong kơdrâm Ƀuôn Ma Thuột, hơnăm 2022, tâi tâng 21 to cheăm bêng dêi pơlê kong kơdrâm hiăng 3 hơnăm hlối ôh tá ai xếo pơreăng tơngê mơdrâu tung pơlê kong kơdrâm, mâu tơdroăng ki rak tơniăn vâ hbrâ mơdât pơreăng tơngê mơdrâu châ rak vế đi đo. Pơlê kong kơdrâm cho tíu pêi cheăng ki apoăng dêi kong pơlê Dak Lak châ mơnhên hiăng hbrâ mơdât tơbrê pơreăng tơngê mơdrâu.

Ƀok thái Võ Minh Hùng ai tối tiah kố, maluâ tiah mê, pơlê kong kơdrâm xuân pơtối tơbleăng mâu troăng hơlâ hbrâ mơdât pơreăng tơngê mơdrâu.

“Tơdroăng ki hbrâ mơdât pơreăng tơngê mơdrâu tung hơnăm 2021 cho mâu tơdroăng ki pêi pro tơƀrê ki apoăng xo, tung la ngiâ xuân pơtối mơdêk hnoăng cheăng hnê tối troh ƀă kuăn pơlê, malối cho ngế ki hmâ lăm tung kong koi tâm a chiâk, lơ lăm pêi cheăng hngế a tíu ki ê vêh vâ vâi hlê plĕng tơdroăng ki rak vế châ chăn ăm pơlê pơla.

Pakĭng mê ngin xuân mơdêk po mâu lâm hnê hriâm vâ mơdêk ki hlê plĕng ăm kăn ƀô̆ ngăn pơkeăng ‘na hnoăng cheăng châ hlo, hnoăng cheăng hnê tối ƀă hnoăng cheăng hnê tung um tơvi, rơ’jiu ăm kuăn pơlê ‘na mâu troăng hơlâ hbrâ mơdât pơreăng tơngê mơdrâu a pơlê kong kơdrâm”.

Tiô Tíu xiâm Hbrâ mơdât châi tamo kong pơlê Dak Lak, tơdroăng ki pơreăng tơngê mơdrâu hiăng kơdroh tung 3 hơnăm hdrối. Tâng môi tiah hơnăm 2020, lâp kong pơlê ai 126 ngế tơngê mơdrâu, mê troh hơnăm 2021 – 2022, rêm hơnăm bu ai lối 10 ngế. Pakĭng pơlê kong kơdrâm Ƀuôn Ma Thuột hiăng kâi hbrâ mơdât pơreăng tơngê mơdrâu, nôkố ai 6 tơring, pơlê kong krâm chêh inâi kô hbrâ mơdât hlối pơreăng tơngê mơdrâu a mơ’nui hơnăm kố.

Ƀok thái pơkeăng Hoàng Hải Phúc, kăn phŏ pơkuâ Tíu xiâm hbrâ mơdât pơreăng châi tamo kong pơlê Dak Lak ăm ‘nâi, maluâ hnoăng cheăng hbrâ mơdât pơreăng tơngê mơdrâu a kong pơlê hlo chía tơniăn, la a kơpong Tây Nguyên ƀă a mâu kong pơlê ki ê dêi tơnêi têa pin xuân hlo ôh tá tơniăn, mơni kô tâ pơreăng tơngê mơdrâu ƀă xông tâ tú tung la ngiâ. Xua mê, tung la ngiâ, tíu xiâm hbrâ rơnáu chêh bro túa pơkâ vâ hbrâ mơdât pơreăng tơngê mơdrâu vêh tâ tú, rak vế mâu tơdroăng ki séa ngăn đi đo tâi tâng a mâu tíu.

“Ngin mơdêk hnoăng cheăng hnê tối ăm kuăn pơlê ƀă mâu kơvâ cheăng rơtế tơrŭm. Má péa nếo mê ngin mơdêk séa ngăn mâu ngế ki tâ pơreăng, má pái cho séa ngăn mâu ngế ki tro pơreăng hbrâ rơnáu a mâu tíu ki tâ tú hên. Tiah hmâ lăm chu séa ngăn mâu ngế ki lăm koi tâm tung kong, mâu ngế ki nhôm mê pâk xo mơheăm séa ngăn vâ châ ‘nâi mâu ngế ki yương tĭnh tung châ tơdrêng amê ngin hlối hnê tối mâu troăng hơlâ tâm mi-tơ-kel tung 2 rôh”.

Mâu tơdroăng ki chía tơniăn tung hnoăng cheăng hbrâ mơdât pơreăng tơngê mơdrâu a kong pơlê Dak Lak cho ivá vâ kong pơlê pơtối hbrâ mơdât túa pơreăng kố, pêi pro troh tơdroăng ki hbrâ mơdât pơreăng tơngê mơdrâu a hơnăm 2028.