Sap apoăng hơnăm troh nốkố, kơvâ ngăn pơkeăng ƀă khăm pơlât Dak Lak hiăng châ hlo 8 tíu pơreăng kơtuâ ‘mêi lối 20 ngế tro tâ, tâk lối 100 ngế tâng pơchông plâ hơnăm 2022. 8 tíu pơreăng xông tâ tú a tơring Lăk, Ea Kar, M’Drăk ƀă pơlê kong kơdrâm Ƀuôn Ma Thuột, tung mê tơring Lăk ƀă Ea Kar cho 2 tơring ai kơxô̆ mơngế tro tâ hên má môi ƀă cho 39 ƀă 38 ngế.

Mâu ngế ki tro tâ pơreăng ki hên cho hok tro ƀă tá hâi châ pâk vaccine hbrâ mơdât pơreăng kơtuâ ‘mêi. Tiô ƀok thái pơkeăng Trần Thị Thúy Minh, Kăn pơkuâ Kơvâ Nhi tổng hợp, Hngêi pơkeăng kân kơpong Tây Nguyên, virus pro chiâng pơreăng kơtuâ ‘mêi châ ối tung khu pơreăng virus xông tâ tú rơdêi, tâng tá hâi châ pâk vaccine ƀă ối achê ƀă mơngế tro tâ pơreăng mê kô tơ’lêi tâ.

Vâ kơdroh ki tâ tú pơreăng kơtuâ ‘mêi, troăng pêi apoăng cho pâk vaccine hbrâ mơdât pơreăng. Tâng vâi hdrêng tro tâ pơreăng kal châ djâ troh hngêi pơkeăng vâ mâu ƀok thái pơkeăng rah mâu ngế tro tâ pơreăng ƀă pơlât teăm tơdrêng.