Pôa Nguyễn Đại Phong, Kăn pơkuâ hngêi pơkeăng kân kơpong Tây Nguyên, a Dak Lak tối ăm ‘nâi, troh nôkố, hngêi pơkeăng xuân tá hâi pêi pro tơdroăng rôe pơkeăng, ƀă kơmăi kơmok, tơmeăm khăm pơlât tiô pơkâ 30 ƀă Pơkâ kơxô̆ 07 xuân ối trâm hên tơdroăng ki tơdjâk troh luât pơkâ yă. Tối ‘na tơdroăng kố, pôa Nguyễn Đại Phong tối Pơkâ 30 ƀă Pơkâ 07 mơjiâng ôh tá xê mâu hngêi pơkeăng kô pêi pro tơdrêng tơdroăng rôe pơkeăng ƀă kơmăi kơmok, tơmeăm khăm pơlât mê thế pro mơ-éa pơkâ yă tiô tiah hmâ.

Tung pơla pêi pro mâu tơdroăng pơkâ yă mê thế hía sap ing 4 troh 6 khế. Pakĭng mê, xua tâi tâng mâu tơmeăm khăm pơlât pơrá cho tơmeăm rôe ing kong têa ê, tơdrêng amê nôkố kơxô̆ liăn vâ pêi pro tơdroăng kố dế kreăng xua tơdjâk pơreăng ƀă tơplâ tơplong, xua mê mơhé hiăng tah lôi mâu tơdroăng ki pá ‘na troăng pơkâ pêi, troăng hơlâ laga xuân tá hâi ai kơmăi vâ rôe.