Tiô troh hâi tơbleăng ing hdrối nah, nâ Nguyễn Thị Diễm Thương, thôn Dak Kual 2, cheăm Dak Ndrung djâ dêi kuăn kơdrâi tơná vâ chê 6 khế lăm troh a hngêi pơkeăng cheăm vâ pâk trum má 3 vaccine 5 tung 1 hbrâ mơdât mâu pơreăng  kơ-o êi krôk, kơ-o ai pơreăng troăng krôk, châi hrê, khăng kơbrĕn ƀă êi xôu, êi kơtôu ngôa xua vi khuẩn Hib pro. Nâ ăm ‘nâi, tơdroăng pâk tŭm  pơkeăng hbrâ mơdât pơreăng mê  kuăn rĕng kân mo sêi.

“Kăn ƀô̆ ngăn pơkeăng tối ăm ‘nâi hdrối hâi vâ lăm pâk, hiăng vâ troh hâi ki pâk kăn ƀô̆ tối ăm pin ‘nâi hdrối mê môi hâi  vâ thế lăm pâk. Tối tơdjuôm vâi hdrêng nôkố phá tâ chal nah, rêm tơdroăng châi pin ôh tá ‘nâi hdrối mê pin thế lăm pâk vâ hbrâ mơdât tơdroăng châi ăm kuăn ‘nĕng”.

Môi tiah nâ Nguyễn Thị Diễm Thương, kơnôm châ hnê tối ‘na ki tơƀrê dêi tơdroăng pâk hbrâ mơdât pơreăng, mê mơhé hngêi ối hơngế ing hngêi pơkeăng, troăng prôk pá puât, la nâ Thị Bân ối a thôn Bu Ndrung, cheăm Dak N’drung, tơring Dak Song xuân pâk tŭm, pâk tro hâi pơkâ ăm dêi 3 ngế kuăn:

“Ăm dêi kuăn pâk tŭm vâ xo ah hmôi pin chiâ kơdroh ki tô tuăn, vâ tối cho hmiân tuăn. 3 ngế  kuăn  á  mơhé ôh tá ai rơxế to xuân mơ-eăm prôk chêng vâ lăm pâk. Dế mơ-êa xuân pâk tối tơdjuôm pâk tŭm tâi tâng’’.

Dak Song cho môi tung mâu tơring ki djâ troăng a hdrối  tung tơdroăng pâk pơkeăng po rơdâ a Dak Nông. Tiô pôa Nguyễn Văn Sơn, Hngêi pơkeăng tơring Dak Song tối, vâ ăm kuăn pơlê ai tuăn loi, Hngêi pơkeăng hiăng mơdêk hnoăng cheăng hnê mơhno mâu tíu cheăng khăm pơlât  hnê tối ăm kuăn pơlê hlê nhên, hlối séa ngăn, ‘mâi rơnêu mâu hngêi pơkeăng rôe tơ’nôm tơmeăm xúa tung khăm pơlât, pơkeăng, vaccine, vâ tơniăn ai tŭm vaccine vâ pâk...

Tung mâu hâi pâk, Hngêi pơkeăng xing xoăng ăm kăn ƀô̆ mơdêk hnoăng cheăng séa ngăn  tơdroăng cheăng a hngêi pơkeăng pêi pro tro pơkâ pâk po rơdâ.

“Sap mơ’nui hơnăm ngin hiăng tơrŭm ƀă kăn thôn lăm kơ-êng ngăn tơrêm rơpŏng hngêi ai vâi hdrêng má péa nếo cho po ngăn  tung phần mềm ki chêh ‘măn inâi mê ngin hiăng rak ngăn krâu tơrêm ngế. Tung phần mềm ai chêh nhên mê ngin krếo, mâu ngế troh lăm pâk mê gá tơ’lêi tâ, ‘na mâu ki lâi ôh tá ai liăn tá ai rơxế to lơ xua xơpá ing tơdroăng ki ê ‘lo hâi châ lăm pâk mê kô pơcháu ăm mâu ngế ngăn pơkeăng thôn vâ mâu ki mê tăng ngăn nếo mâu hdrêng ki lâi ai inâi tung thôn pơlê há lơ ôh vâ rĕng châ ‘nâi mâu ki  hâi teăm pâk lơ hiăng pâk la hâi teăm tŭm kô thế ăm pâk vâ tơniăn ‘na tơdroăng hbrâ mơdât pơreăng ăm vâi hdrêng’’.

Pôa Huỳnh Thanh Huynh, Kăn xiâm phŏ pơkuâ ngăn pơkeăng kong pơlê Dak Nông ăm ‘nâi, mơhé tơdroăng pâk pơtê ton xua tơdjâk dêi pơreăng COVID-19 tung 2 hơnăm hdrối kố nah, la kơnôm tơmâng khât tí tăng ngăn, pêi kơtăng hnoăng cheăng dêi khu ngăn pơkeăng, hlối môi tuăn dêi kuăn pơlê mê kơxô̆ mơngế pâk vaccine tung pơkâ pâk po rơdâ dêi kong pơlê hlo tơ ƀrê.

Tâi 3 khế apoăng hơnăm 2022, kơxô̆ mơngế pâk pơkeăng po rơdâ hbrâ mơdât pơreăng dêi lâp kong pơlê châ 70% tiô pơkâ. Tung 3 khế mơ’nui hơnăm, kong pơlê mơ-eăm khŏm châ 90% kơxô̆ mơngế châ pâk mâu túa vaccine. Tiô pôa Huỳnh Thanh Huynh, nôkố Dak Nông dế pơtối rak thế pâk a 150 tíu ki pơkâ ƀă kô pơkâ tơ’nôm mâu tíu  lăm pâk prôk ukố umê tâng ai ngế kal. Kơvâ ngăn pơkeăng xuân hbrâ tŭm mơngế, tơmeăm ƀă pơkeăng vâ  ai tŭm pơkeăng ki vâ pâk tro tiô pơkâ, hlối tơniăn:

“Khu xiâm ngăn pơkeăng hnê mơhno ƀă lăm troh a mâu tơring cheăm vâ tí tăng ngăn vâ ‘nâi mâu ngế ki lâi hâi pâk klêi mê vâ tăng troăng môi tuăn. Má péa nếo, drêng lăm tí tăng ngăn vâ ‘nâi mâu ngế ki lâi ngin rơtế ƀă mâu ngế ngăn pơkeăng thôn pơlê cheăm rơtế ƀă mâu kăn pơlê cheăm mơhno tíu ki lĕm tro vâ ăm pâk vâ kuăn pơlê tơ’lêi drêng lăm pâk, tá hâi chói ăm vâi lăm pâk, pơtih ai mâu ngế ki ‘nâ vâi lăm a chiâk  deăng koi tâm a chiâk, troh hâi tơdrốu thế châi hâi tĭng lăm pâk tơrŭm ƀă mâu ngế kuăn pơlê pâ nhoăm hlối mơhnhôk mâu nhŏng o ‘nâ hía chiâng lăm pâk a hngêi’’.

Mâu tơdroăng ki mơ-eăm tung tơdroăng pâk pơkeăng po rơdâ a Dak Nông hiăng chôa lâng mơdêk tung tơdroăng rak ngăn ivá kuăn pơlê, hbrâ ví mâu pơreăng ki rơ-iô tung kuăn pơlê; pro kơdroh ki ai hên mơngế lăm khăm pơlât a mâu hngêi pơkeăng tơring, kong pơlê.