Hâi lơ 15/12, Vi ƀan hnê ngăn kong pơlê Gia Lai hiăng po rôh hôp tơpui ƀă tăng troăng tŏng kum mâu tơdroăng xơpá xua ôh tá bê pơkeăng, ôh tá ai tŭm kơxô̆ liăn pêi cheăng. Tung hơnăm 2021 ƀă 2022, 23 tíu khăm pơlât tơnêi têa hiăng châ xing xoăng 758 inâi pơkeăng, ƀă tâi tâng kơnâ lối 646 rơtal liăn, la bu nếo pêi pro châ 66%. Nôkố ai mâu tíu khăm pơlât a kong pơlê dế ối kal hên mâu pơkeăng.

Hnoăng cheăng ki pêi pro ‘no hrê xêh liăn ngân a mâu tíu khăm pơlât tơnêi têa  a Gia Lai xuân trâm hên xơpá pơloăng mơnúa. Tơdroăng ki nâp ôh tá bê tŭm vâ hrê dế pro hên tíu pêi cheăng athế chĕn liăn khế mâu ngế cheăng, chiâng tơdjâk troh hnoăng cheăng khăm pơlât.

Pơkuâ po rôh hôp jâ Nguyễn Thị Thanh Lịch, kăn phŏ hnê ngăn Vi ƀan kong pơlê Gia Lai hnê mơhno Khu ngăn pơkeăng ƀă khăm pơlât, tơrŭm ƀă Ƀaoh hiêm Pơlê pơla ƀă Khu ngăn liăn ngân pơkâ mơ’no, tí tăng ‘nâi plĕng túa pơkâ hbru tơ’nôm, xo kơxô̆ liăn vâ mơhá liăn khế ăm kăn ƀô̆ cheăng khăm pơlât ƀă rak tơniăn tơdroăng ki kum kế tơmeăm xúa ăm mâu tíu khăm pơlât; tơdrêng amê, hlối pơkâ thế kăn pơkuâ khu ngăn pơkeăng ƀă khăm pơlât mơdêk ivá rak ngăn tro tiô troăng tơƀrê, pôu râng dêi hnoăng.