Jâ Trần Thị Tuyết Hạnh ối a cheăm Čư̆ An, tơring Đăk Pơ, kong pơlê Gia Lai cho rơpŏng ai tơdroăng cheăng kâ rêh ối xơpá. Kơnốu tro châi tamo, mâu kuăn ‘nĕng xuân ôh tá ai liăn ngân vâ tŏng kum, maluâ ivá hiăng ôh tá pá hro xếo, mê jâ xuân ối hrăng troh măng, rĕng riu koi vâ pêi cheăng. Sap ing ‘nâi rơpŏng tơná ối tung rơpŏng châ tŏng kum baoh hiâm khăm pơlât, jâ Hạnh hiăng mơeăm kơtâu, roê ăm tâi pơtăm ngế tung rơpŏng.

“Rơpŏng hngêi á ai 5 ngế, drêng tá hâi ai tơdroăng tŏng kum mê rơpŏng á roê xêh ăm rêm ngế, ôh tá ai tŭm liăn vâ roê tâi ăm tá 5 ngế, la nôkố roê mê châ kum 40%, mê ối 60% rơpŏng xuân mơeăm tăng liăn vâ roê tâi ăm tá 5 ngế tung rơpŏng ki ai vâ ai baoh hiâm khăm pơlât. Xua tung hngêi á ai kơnốu châi tamo râ, tamo hiăng 15 hơnăm kố”.

 Nâ Đinh Thị Bước xuân môi tung mâu rơpŏng ki ối tung rơpŏng kơtiê a pơlê Pơ Nang, cheăm Tú An, pơlê kong krâm An Khê châ tŏng kum roê baoh hiâm khăm pơlât. Nâ Bước ăm ‘nâi, rơpŏng nâ hlo hmiên tuăn khât drêng 6 ngế tung môi rơpŏng hngêi pơrá châ xúa baoh hiâm khăm pơlât tâi tâng sap ing tơdroăng tŏng kum dêi tơnêi têa. Tơdroăng kố hiăng pro tơ’lêi hlâu ăm rơpŏng nâ kơdroh iâ ki xơpá ‘na liăn ngân drêng ôh tá mơhúa tro châi tamo. Nâ Bước tối: “Châ tơdroăng ki tŏng kum dêi tơnêi têa, rơpŏng hngêi á khên tơnôu roê baoh hiâm khăm pơlât ăm ivá châ chăn. Tung hngêi, ngế ki krâ, ngế ki hdrêng, ngế ki kân tung rơpŏng rêm hdroh lăm khăm, pơlât a hngêi pơkeăng pơrá châ xúa mâu tơdroăng ki rak ngăn ivá tơtro khât”.

Hơnăm 2023-2025, pakĭng kơlo tŏng kum sap ing liăn ngân Tơnêi têa pơkâ tiô Luât Baoh hiâm khăm pơlât me tiô Pơkâ 48 dêi Hô̆i đong hnê ngăn kong pơlê Gia Lai, liăn ngân kong pơlê kô tŏng kum 30% kơlo liăn nâp baoh hiâm khăm pơlât ƀă mâu rơpŏng kơtiê ƀă hok tro cho hdroâng kuăn ngo; tŏng kum 10% kơlo liăn nâp baoh hiâm khăm pơlât ƀă mâu rơpŏng ki pêi chiâk deăng, pêt kong, păn ká xi xŏng ai kơlo rêh ối tiah hmâ tiô pơkâ dêi Chin phuh. Pêi pro tơdroăng kố, krê pơlê kong krâm An Khê hiăng tŏng kum ăm vâ chê 16 rơpâu ngế. Pôa Trịnh Duy Phước – Kăn pơkuâ Baoh hiâm xah hô̆i pơlê kong krâm An Khê, kong pơlê Gia Lai ăm ‘nâi, tiô riân troh tâi hơnăm kố, An Khê kô ai lối 30 rơpâu ngế châ xúa troăng hơlâ tŏng kum kơlo liăn nâp baoh hiâm khăm pơlât kố.

 “Klêi kơ’nâi ai Pơkâ dêi Hô̆i đong hnê ngăn kong pơlê, tíu pêi cheăng kố hiăng tơrŭm ƀă Đảng ủy, Vi ƀan hnê ngăn mâu cheăm, bêng xuân môi tiah mâu kơ koan ki ai tơdjâk troh hnê tối mơhnhôk kuăn pơlê vâ ‘nâi nhên troăng hơlâ dêi Đảng ƀă Tơnêi têa. Baoh hiâm xah hô̆i xuân kơhnâ tơrŭm ƀă mâu cheăm, bêng vâ pro hơ’lêh mâu rôh tơpui tơno, xoăng mâu mơeá, mâu pa nô, áp phích hnê tối, malối tơdroăng ki tơƀrê má môi cho hnoăng cheăng tơpui tơno ƀă kuăn pơlê vâ tiâ mâu tơdroăng ki tơvâ tơvân, ôh tá tơniăn ki kuăn pơlê ối tôu tuăn tơdjâk troh baoh hiâm”.