Ai 167 toăng rơxế króu, 19 rơxế trut ƀă 3 loăng kơtrá pơtâp prôk, tâi tâng mâu tơmeăm mê kơnâ châ lối 323 rơtuh liăn, hbru ăm 189 ngế ki chó chêng, plôm mâ, klêk tuăn a kong pơlê Dak Lak. Kố châ ngăn cho tơdroăng pêi pro ki hơ-ui kum kơ kuăn mơngế ki xahpá, hliăng tiâ, vâ vâi ai rơxế prôk lăm tơ’lêi hlâu tung rêh ối rêm hâi. Kong pơlê Dak Lak nôkố ai dâng 78 rơpâu ngế chó chêng, plôm mâ, klêk tuăn, tung mê ai lối 23 rơpâu ngế dế châ tơnêi têa tŏng kum.

Tung 5 hơnăm hdrối mê hía nah, Khu lo tŏng veăng kong pơlê hiăng mơhnhôk, tơrŭm cheăng diâp châ 589 toăng rơxế króu, rơxế trut vâ um mâu ngế ki xahpá tơ’lêi hlâu tung prôk lăm, mơnhông dêk xêh tơdroăng rêh kâ ối.