-Pâ phep pôa tối ăm ‘nâi mâu tơdroăng pêi ki Khu pơkuâ hdroâng kuăn ngo kong pơlê hiăng pêi pro tung pơla kong pơlê Dak Lak trâm ƀă tơdroăng pơreăng COVID-19 xông tâ tú?

Pôa Hà Huy Quang: Hơnăm 2020, 2021 drêng pơreăng COVID-19 xông tâ tú tung kong pơlê, ki rơhêng vâ tối cho ƀă mâu thôn, pơlê kơpong vâi krâ hdroâng kuăn ngo, hlê plĕng ‘na tơdroăng mê, Khu pơkuâ hdroâng kuăn ngo kong pơlê hiăng teăm tơbleăng tơdrêng ăm Vi ƀan kong pơlê mơjiâng pơkâ pêi hnê mơhno kơ koan pêi cheăng hdroâng kuăn ngo mâu râ thăm pêi pro tơdroăng pơtâng tối, hbrâ mơdât pơreăng COVID-19 tung kơpong hdroâng kuăn ngo tung lâp kong pơlê, ki rơhêng vâ tối cho a mâu thôn, pơlê ki tro tơdjâk râ ó xua pơreăng.

Ing mâu troăng pơtâng tối môi tiah xing xoăng hlá mơ-éa chêh pơtâng hnê tối, mơjiâng pro pa-nô ƀă mơhnhôk khu ngế ki kuăn pơlê loi tơngah troh rêm kơtâu, tơgôu rêm toăng hngêi pơtâng tối, mơhnhôk kuăn pơlê kơpong vâi krâ hdroâng kuăn ngo pêi pro krâu mâu troăng hbrâ mơdât pơreăng COVID-19 tiô pơchân tối dêi kơvâ ngăn pơkeăng ƀă khăm pơlât; kơnôm tiah mê pơreăng COVID-19 tung kơpong vâi krâ hdroâng kuăn ngo chôa ‘lâng châ mơdât, kơdroh iâ má môi ‘na hlâ kuăn mơngế, djâ tơdroăng rêh ối dêi kuăn pơlê chôa ‘lâng tơniăn lĕm, tơkŭm pêi cheăng pêt mơjiâng tơmeăm, mơnhông mơdêk cheăng kâ’’.

-Ô pôa, pin kô chiâng vâ mơnhên, vaccine cho tơmeăm ki kal tung tơdroăng hbrâ mơdât pơreăng COVID-19. Laga, drêng pơreăng hiăng châ mơdât, hên kuăn pơlê a Dak Lak ai troăng tơmiât ôh tá vâ bê tơmâng xua mê ôh tá hâk vâ pâk pơkeăng vaccine hbrâ mơdât COVID-19, drêng ai tơdroăng kố, Khu pơkuâ hdroâng kuăn ngo hiăng ai mâu troăng pêi pơtâng tối, mơhnhôk kuăn pơlê lăm pâk vaccine,  ô pôa?

Pôa Hà Huy Quang: Pin kô chiâng mơnhên, tơdroăng pâk vaccine hbrâ mơdât pơreăng COVID-19 cho tơneăn ki ‘răng châ tơƀrê má môi tung tơdroăng hbrâ mơdât pơreăng; môi tiah pin hiăng hlo tung hneăng apoăng kơnôm troăng hơlâ tro, teăm tơdrêng dêi khu râ kăn pơkuâ hnê ngăn cheăng Đảng, khu râ kăn pơkuâ mâu khu râ, ki rơhêng vâ tối cho tơdroăng “Tơpui kâ ƀă kong têa ê ‘na pơkeăng vaccine” ƀeăn rơkê dêi Đảng, Chin phuh pin hiăng ai hên pơkeăng vaccine teăm vâ pâk tơdrêng ăm kuăn pơlê kơpong ki ai pơreăng xông tâ tú ó, kơnôm tiah mê pơreăng chôa ‘lâng châ mơdât, kơxô̆ mơngế tro hlâ xua pơreăng kơdroh hên, tơdroăng rêh ối dêi kuăn pơlê chôa ‘lâng vêh tơniăn tiah hmâ; ing mê, mơjiâng troăng tơmiât tung kuăn pơlê, ki má lối cho kơpong vâi krâ hdroâng kuăn ngo ai tơmiât ôh tá bê tơmâng, tơngôu, ôh tá hâk vâ ƀă tơdroăng pâk vaccine.

Hlê plĕng tơdroăng mê, ing hnê mơhno dêi kơvâ ngăn pơkeăng, khăm pơlât mâu râ, Khu pơkuâ hdroâng kuăn ngo kong pơlê hiăng hbrâ tơrŭm ƀă Rơ’jíu Việt Nam kơ koan teăng mâ kơpong Tây Nguyên ƀă Rơ’jíu, Um Tơvi Dak Lak pêi pro tơdroăng pơtâng tối hbrâ mơdât pơreăng ƀă hên nâl tơpui, mơ’no tung Rơ’jíu dêi kong pơlê ƀă kơpong thăm pêi pro rơdêi tơdroăng pơtâng tối vâ mơdêk hlê plĕng dêi kuăn pơlê tung kơpong vâi krâ hdroâng kuăn ngo ‘nâi nhên ki kơnâ, ki kal dêi tơdroăng pâk pơkeăng vaccine hbrâ mơdât pơreăng COVID-19 tung tơdroăng hbrâ mơdât pơreăng COVID-19, mơhnhôk kuăn pơlê kơpong vâi krâ hdroâng kuăn ngo veăng pâk pơkeăng vaccine hbrâ mơdât COVID-19 teăm tơdrêng, tŭm têk. Ing mê, tiô tơbleăng tơkŭm dêi kơvâ ngăn pơkeăng ƀă khăm pơlât troh nôkố tơdroăng pâk vaccine hbrâ mơdât COVID-19 a rêm khu ngế châ tơƀrê hên; kum chôa ‘lâng troh mơdât pơreăng COVID-19 tung lâp kong pơlê’’.

-Môi tiah pôa nếo tối ‘na tơdroăng tơrŭm ƀă mâu kơ koan thong tâ̆n hlá tơbeăng vâ ai hên troăng pơtâng tối vâ mơdêk hlê plĕng dêi kuăn pơlê tung hbrâ mơdât pơreăng COVID-19, pôa Hà Huy Quang mơnhên môi tiah lâi ‘na tiâ tối dêi mâu ngế tơmâng rơ’jíu ƀă tung la ngiâ, Khu pơkuâ hdroâng kuăn ngo kong pơlê Dak Lak kô ai mâu tơdroăng tơrŭm môi tiah lâi vâ kô chiâng tối tơbleăng tâi tâng mâu tơdroăng ‘na troăng hơlâ ăm kơpong vâi krâ hdroâng kuăn ngo:

Pôa Hà Huy Quang: Mê xuân cho môi tơdroăng ki hôm ƀă châ tơƀrê tung tơdroăng pơtâng tối hbrâ mơdât pơreăng COVID-19 ƀă tơdoăng tơrŭm ƀă Kơ koan chêh hlá tơbeăng dêi hlá tơbeăng,  rơ’jíu dêi Tơnêi têa xuân môi tiah kong pơlê vâ mơdêk hlê plĕng, pôu râng hnoăng cheăng dêi kuăn pơlê tung tơdroăng hbrâ, mơdât pơreăng. Mơdêk mâu tơdroăng châ tơƀrê hiăng châ hôm, tơdroăng pơtâng tối hbrâ mơdât pơreăng COVID-19 tung la ngiâ kal tơkŭm tung mâu hnoăng cheăng ki nhên, mê cho: Pơtối tơrŭm ƀă mâu kơ koan pơtâng tối tơdroăng kal môi tiah Rơ’jíu Việt Nam kơpong Tây Nguyên (VOV), Rơ’jíu ƀă Um tơvi kong pơlê thăm mơdêk chôu pơtâng tối đi đo, trâu hơngế tung vâi krâ kuăn pơlê kơpong hdroâng kuăn ngo.

Ki rơhêng vâ tối mơnhông mơdêk hnoăng dêi Ngế ki kuăn pơlê loi tơngah thăm pơtâng tối hbrâ mơdât pơreăng, kum kuăn pơlê kơpong vâi krâ hdroâng kuăn ngo hlê plĕng tro tơdroăng, ki kơnâ dêi pơkeăng vaccine hbrâ mơdât pơreăng, pơtối hbrâ pêi pro mâu troăng hbrâ mơdât pơreăng: Ki pâng tât rơkong môh, xôh pơkeăng kơdê pơreăng, vaccine, pơkeăng, pơlât, kŏng ngê̆ ƀă mâu troăng pêi tiô hnê mơhno dêi kơ koan ngăn pơkeăng ƀă khăm pơlât mâu râ; ƀă tơdroăng tơkŭm po pêi pro tơtro tơdroăng pơtâng tối hdroâng kuăn ngo ƀă troăng hơlâ tŏng kum hdroâng kuăn ngo tung kong pơlê, ki rơhêng vâ tối, po rơdâ pêi pro tơtro Tơdroăng pơkâ xiâm tơnêi têa ‘na mơnhông mơdêk cheăng kâ – rêh ối pơlê pơla kơpong vâi krâ hdroâng kuăn ngo ƀă kong ngo hneăng hơnăm 2021 – 2030.

Kum rĕng troh tah pơreăng COVID-19, tơkŭm mơnhông mơdêk cheăng kâ, mơdêk tơdroăng rêh ối, rak gâk kring kal kí ƀă tơniăn lâp pơlê pơla tung kơpong vâi krâ hdroâng kuăn ngo; kơdroh kơtăn ‘na tơdroăng rêh ối pơla kuăn pơlê kơpong hdroâng kuăn ngo ƀă hdroâng mơngế Xuăn, pơla kơpong thôn pơlê ƀă kơpong kơdrâm kuăn pơlê rêh ối, tê mơdró.

-Ê, pâ mơnê kơ pôa!