A kong pơlê Gia Lai, tung pơla hdrối kố nah, kong prâi ôh tá tơniăn, tơdroăng ki tô hngíu pơ’lêh pơtối hlối tung mâu hâi pro ăm mâu vâi hdrêng mot pơlât tung hngêi pơkeăng tâk hên xua tơdjâk troh troăng hiâm. A chê kố, Hngêi pơkeăng pơlât vâi hdrêng kong pơlê Gia Lai tơdah sap ing 300 – 400 ngế lăm khăm pơlât tung môi hâi, tơdjâk troh mâu pơreăng ing troăng hiâm.

Sap ing apoăng hơnăm troh nôkố hiăng ai vâ chê 1 rơpâu ngế vâi hdrêng mot pơlât tung hngêi pơkeăng xua tro mâu pơreăng ing troăng hiâm, môi tiah: êi xôu, êi tơxui xôu ƀă hên ki ê, tâk hên tâng pơchông ƀă khế kố hơnăm 2022.

Tiô Thak sih, ƀok thái pơkeăng Từ Thị Mai Linh – Kăn phŏ pơkuâ Hngêi pơkeăng pơlât vâi hdrêng kong pơlê Gia Lai, hên vâi hdrêng xua ing tơdroăng ki ôh tá vâ tơmâng dêi nôu pâ mê drêng mot pơlât tung hngêi pơkeăng hiăng râ, tơngê hmân, khăng kơbrĕn.

Hngêi pơkeăng pơchân mâu rơpŏng hngêi kal hbrâ mơdât pơreăng ing troăng hiâm ƀă châi hrê ăm vâi hdrêng tung pơla nôkố vâ teăm djâ vâi hdrêng troh tíu khăm pơlât.