Tơdroăng châ po apoăng ƀă rơkong hơdruê dêi ngê̆ sih Hngêi rơhdruê - Rơ ‘jíu xiâm Việt Nam hơdruê ô eăng pơlê pơla, tơnêi têa ƀă mâu hnoăng veăng ‘no dêi mâu lêng sâp ếo bông hâi măng pơlât ngăn ivá kuăn pơlê.

Teăng mâ kăn xiâm dêi pŭn kơ koan chêh hlá tơbeăng, pôa Lê Quốc Minh, Ngế cheăng tung tíu xiâm Đảng, Ngế xiâm ngăn rah chêh Hlá tơbeăng Nhân Dân, Kăn phŏ hnê mơhnhôk cheăng Xiâm tơnêi têa, Kăn hnê ngăn Khu chêh hlá tơbeăng Việt Nam hiăng pơtroh rơkong rơkâu ki lĕm má môi ăm tâi tâng mâu kăn xiâm dêi Khu xiâm ngăn pơkeăng pơlât, Kăn hnê ngăn mâu tíu pêi cheăng drêng troh tơbâ 68 hơnăm Hâi thái pơkeăng Việt Nam (27/2), rơkâu mâu thái pơkeăng pơtối pêi cheăng hên tơdroăng tơƀrê, cho tíu kơnôm tơngah dêi mơngế ki châi tamo ƀă kuăn pơlê tung lâp tơnêi têa.

Chôu pâ mâu rôh plâ mơdât pơreăng COVID-19 trâm hên tơdroăng pá ƀă pơloăng mơnúa tung 3 hơnăm hdrối, pôa Lê Quốc Minh tối nhên: Tung pơla mê hiăng ai hên ‘nâi to lâi tơdroăng pêi pro ki lĕm, pêi cheăng tâi ivá hiâm tuăn, pêi cheăng tiô hiâm mơno lĕm dêi mâu kăn ƀô̆ ƀă mâu ngế cheăng ngăn pơkeăng ôh tá xâu pá puât, thăm nếo rơ-iô troh ivá, vâi xuân mơ-eăm pleăng hnoăng tơná, pleăng tơná lăm pêi cheăng plâ mơdât pơreăng, achê ƀă mâu ngế ki tâ pơreăng mâu ki rơ-iô, mơhé vâ tâ rơ-iô la ôh tá xâu, xuân mơ-eăm, pêi cheăng tâi ivâ hiâm mơno vâ rak ngăn mâu ngế châi tamo, mâu ki tâ pơreăng tung kơpong klâ ối krê, mâu ngế pơlât a hngêi pơkeăng lêng pơtân ƀă hên tơdroăng ki ê.

Ƀă hiăng ai kăn ƀô̆ ngăn pơlê ta troh nôkố pá kâi vêh tơkéa vâ tối hiăng hlâ.   Kuăn pơlê tung lâp tơnêi têa đi đo chôu pâ ƀă ‘nâi mơnê kơ mâu hnoăng veăng ‘no kân kĭn pá kâi tối mê. Klêi rôh pơreăng kân COVID-19 tâ tú, kơvâ ngăn pơkeăng dế trâm hên xơpá, tơvâ tơvân. Mê cho tơdroăng ôh tá ai pơkeăng pơlât, tơmeăm khoăng xúa tung khăm pơlât; ôh tá ai luât pơkâ ‘na liăn ngân ăm hngêi pơkeăng dêi tơnêi têa; luât pơkâ kâ liăn tro tơdroăng ƀă mâu kăn ƀô̆ ngăn pơkeăng hâi  tơxâng chiâng ai hên ngế pơtê cheăng:

“Ƀă hnoăng cheăng cho kơ koan chêh hlá tơbeăng ki xiâm, Hlá tơbeăng Nhân dân, Thông tấn xã Việt Nam, Rơ’jiu xiâm Việt Nam kô pơtối pêi a hdrối ‘na hnê tơdroăng rak ngăn ivá kuăn pơlê, ‘na mâu tơdroăng cheăng dêi kơvâ ngăn pơkeăng, dêi mâu ngế thái pơkeăng”.

Tơdroăng châ pơtối tơpui tơno ai pơxá “Xiâm ki mơ-eăm ‘na ivá kuăn pơlê - tơdroăng khăm pơlât tơkâ luâ xơpá”. Mê cho tơdroăng hơ’muăn tối dêi Phŏ Yăo sư - Tiê̆n sih, Thái pơkeăng kuăn pơlê Nguyễn Viết Nhưng, cho  Ngế pơkuâ hngêi pơkeăng pơlât êi Xôu Trung ương ƀă mâu vâi pú hiăng châ kâ Pri Hồ Chí Minh ƀă tơdroăng mơjiâng tơmeăm khoăng ‘’Tí tăng ‘nâi plĕng tung xúa kih thuât rơkê nếo nôkố - tung khăm vâ ‘nâi mâu tơdroăng châi, pơlât tơdroăng châi troăng krôk” ƀă tăng troăng rơhlâ troh tơdroăng pơtê pơreăng kơ o hiăn.

Mê cho mâu túa pêi cheăng mơjiâng tơdroăng khăm pơlât a cheăm, hbrâ mơdât pơreăng tơƀrê ƀă mơdêk ki tơƀrê tung khăm pơlât, pêi pro tơdroăng môi tuăn dêi mơngế khăm pơlât dêi ƀok thái pơkeăng chuyên khoa 1 Trần Phước Đoàn, Ngế phŏ pơkuâ Xiâm Séa ngăn mơdât pơreăng - kong pơlê Tây Ninh, ƀok thái pơkeăng chuyên khoa 1 Phạm Thị Hồng Lam, Ngế phŏ pơkuâ hngêi pơkeăng tơring Nghi Xuân, kong pơlê Hà Tĩnh, ƀok thái pơkeăng Phạm Ngọc Dung, Ngế pơkuâ hngêi pơkeăng cheăm Quảng Sơn, Hngêi pơkeăng tơring Hải Hà, kong pơlê Quảng Ninh.

Veăng tơpui tơno, mâu Kăn hnê ngăn mâu hngêi pơkeăng Trung ương Huế, Nhi trung ương, Hngêi pơkeăng 199 - Khu xiâm Kŏng an, Hngêi pơkeăng Vinmec, Viện Huyết học- Truyền máu Trung ương hiăng tối tơdroăng ki khéa ƀă mâu tơdroăng kơdô mơ-eăm tơkâ luâ xơpá tung rôh tâ tú pơreăng kân COVID-19, ‘na mơngế cheăng khăm pơlât pơtê cheăng, ‘na ôh tá ai tŭm pơkeăng pơlât, tơmeăm xúa tung khăm pơlât, trếo pơkeăng, tơmeăm hngêi pơkeăng.

Phŏ Yăo sư - Tiê̆n sih Trần Minh Điển, Ngế pơkuâ Hngêi pơkeăng Nhi Trung ương ăm ‘nâi:

“Hâi hnah, Khu xiâm ngăn pơkeăng ƀă mâu kăn dêi mâu hngêi pơkeăng kân hiăng tơkŭm hôp ta troh 21 chôu, pin hiăng hlo tiah kố, ki kơdroh xơpá kô chôa tâh  iâ. Laga, tung tơdroăng vâ mâu hngêi pơkeăng tơnêi têa pêi cheăng tro tâ, tơ‘lêi tâ, mê cho ki xiâm luât pơkâ tăng rak ăm dêi ‘na liăn ngân”.

‘Na Yăo sư, Tiê̆n sih Phạm Như Hiệp, Ngế pơkuâ Hngêi pơkeăng Trung ương Huế tối:

“Châ khât gá mâu tơdroăng ki xơpá mê ngin kô tơleăng klêi,  pơtih môi tiah luât khăm pơlât kô châ xúa a hơnăm 2024 xua tung luât khăm pơlât mê xuân hiăng ai hên tíu ki pin hiăng tơleăng klêi pơtih môi tiah yă pơkeăng ƀă tá khăm pơlât, pơtih gá: pơ’lêh rêh ối pơlê pơla, xoăng hnê tối, ƀă mâu tơdroăng mê kô kum tơleăng mơnhên mâu tơdroăng ối tơvâ tơvân dêi kơvâ cheăng dế tro”.

Tối tơbleăng a rôh trâm mâ, tơbâ troh mâu kăn ƀô̆ mâu ngế cheăng ngăn pơkeăng, pôa Đỗ Xuân Tuyên, Ngế phŏ pơkuâ Xiâm ngăn pơkeăng pơlât ăm ‘nâi: Tung la ngiâ, Khu xiâm ngăn pơkeăng tơkŭm pê klêi ‘na luât, luât pơkâ, mâu tơdroăng tơkêa pro dêi luât, pơ’lêh nếo ‘na khăm pơlât ƀă mơdêk ivá mo dâi. Mơdêk ivá cheăng rak ngăn hngêi pơkeăng, ki tơ ƀrê tung tơdroăng khăm pơlât ƀă ‘na hiâm tuăn, tơdroăng pơlât ngăn mơngế châi tamo.

Séa ngăn yă pơkeăng ƀă tơdroăng pơlât tiô troăng rơhlâ riân ngăn tro, riân tŭm, pơ’lêh nếo tơdroăng ki ăm liăn, luât pơkâ ‘na liăn ngân ‘na khăm pơlât ki hbrâ mơdât pơreăng... Khu xiam xuân mơdêk ‘mâi hơ’lêh tơdroăng cheăng, mơdêk ki tơƀrê, pơxúa tung tơdroăng ăm ‘nâi mâu tơdroăng, thê tối tơbleăng tung hlá tơbeăng rơ‘jiu, malối tơbleăng luât pơkâ tŏng kum, vâ châ môi tuăn dêi tâi tâng pơlê pơla  ƀă mâu luât pơkâ, pêi cheăng tung khăm pơlât.