Hên hơnăm hiăng hluâ, mâu hok tro dêi Tíu xiâm Pói tơngah a tíu kơxô̆ 82/198, kơtâu 290 Km Mã Ba Đình, Hà Nội hiăng hmâ ƀă um méa Đỗ Thúy Nga troh péa tíu xiâm a 8 chôu kơxo hâi môi, hâi pái, hâi pơtăm rêm măng tĭng vâ pơxiâm tơdroăng pơkuâ hnê mơhno tíu xiâm hnê pơtâp ivá ăm mâu vâi o chó chêng tơvê kŏng. Tíu xiâm Pói tơngah lôu péa sap ing 7 chôu 30 phut rêm kơxo má nôkố ai 53 ngế hok tro sap ing 36 khế troh 16 hơnăm tro tơdroăng ‘na kơmlâm ôh tá rơhêng tơpui ƀă kơbố.

Ai 12 thái cô hnê veăng hnê a 4 lâm hriâm rơtế tơdroăng tŏng kum dêi mâu pú hmâ sinh viên mơhriâm cheăng ƀă mâu ngế pleăng hnoăng cheăng kong têa ê.

Jâ Đỗ Thúy Nga cho rơxông ƀok thái pơkeăng apoăng troh pêi cheăng a hngêi pơkeăng tơring Thạch Thất Pơkuâ Kơbong Pơlât vâi hdrêng, klêi mê pêi cheăng a Vi ƀan rak ngăn ngế nôu vâi hdrêng, Ƀơrô hnê hriâm ƀă hnê mơjiâng pơlê kân Ba Đình. Hơnăm 1998, drêng hiăng pơtê cheăng xúa hơnăm hiăng krâ ƀă rơpŏng hiăng ai môi pơkâ mơ’no tâi tâng ivá vâ po tíu xiâm pói tơngah:

‘’Drêng pro hngêi pơkeăng mê ai hên vâi hdrêng tro tâ pơreăng êi ngôa Nhuk chiâng châi hên ‘na ngôa cho mâu vâi hdrêng tuăn ngôa ôh tá tơleăng, môi tiah vâi hdrêng ki ê. Á tâ môi tiah tơná tá hâi pêi klêi hnoăng cheăng dêi môi ngế ƀok thái pơkeăng, xua mê á hiăng tơmiât vâ pêi môi tơdroăng cho vâi hdrêng pơtê cheăng xúa hơnăm hiăng krâ á kô po lâm krê ăm vâi hdrêng ki ôh tá mơhúa kố, mê kuăn kơdrâi á ăm mung môi iâ ƀăng tơnêi kố á mơjiâng ƀă kơxô̆ liăn tê hngêi ối a Thành Công vâ mơjiâng chiâng tíu xiâm kố’’.

Hơnăm 2002, Tíu xiâm Pói tơngah châ mơjiâng, jâ Đỗ Thuý Nga tơbleăng rêm chư chêh tung hlá tơbeăng vâ rah xo hok tro ƀă thái cô klêi mê pêi cheăng dêi Tíu xiâm rế hía rế po rơdâ. Ôh tá xê to hnê hriâm, tíu xiâm xuân cho tíu păn roăng rak ngăn ăm ôu kâ, ối koi pơtê rêm hâi ăm mâu vâi o hok tro.

Ƀă 53 ngế hok tro ki chó chêng, tơvê kŏng, ôh tá ‘nhó dâi ivá dế tiô hriâm plâ hâi ƀă kơxô̆ liăn hriâm sap ing 2,5 troh 5 rơtuh môi ngế o hok tro. Ƀok thái pơkeăng Đỗ Thuý Nga tối: ƀă kơlo liăn xo môi tiah mê tíu xiâm kal hnê pro mơnhên xo tơtro ƀă tơdah mâu kơxô̆ liăn tŏng kum vâ rak tơdroăng pêi cheăng:

‘’Tơdroăng ki tô tuăn má môi á cho vâ mơdêk kơlo liăn khế dêi thái cô, kŏng nhân viên tâk hên, laga tâng ôh tá mơdêk mê thế pơtối xo hnoăng liăn hriâm hên. Laga tâng xo hnoăng liăn hriâm hên mê hên rơpŏng vâi ối pá puât, mê bu ai môi troăng cho liăn ngân thế tối tơbleăng tơdrăng, á ôh tá râng liăn mê á pơcháu tâi tâng ăm kăn ƀô̆, thái cô pêi tâi mâu tơdroăng cheăng mê, vâ troh mơ’nui khế ki lâi xuân châ riân mơgêi kơxô̆ liăn mơ’no hrê, pơtih mơ’no hrê tơniăn khế ki lâi xuân ối rơlối môi iâ ngăn ki lâi nôu pâ hok tro ai pá puât mê kơdroh ăm vâi’’.

Klêi kơ’nâi 22 hơnăm mơjiâng troh nôkố, tíu xiâm pói tơngah hiăng hnê ƀă veăng ăm vâ chê 400 ngế vâi o hok tro chó chêng, tơvê kŏng, tro mâu pơreăng ki kơmlâm ôh tá hêng tơpui ƀă kơbố phá tơ-ê dêi pó. Hiăng ai hên vâi o chiâng rơkê, pơxiâm rêh ối tơniăn lĕm ƀă tơdroăng rêh ối. Ƀă mâu tơdroăng veăng kum ăm pơlê pơla, ƀok thái pơkeăng Đỗ Thuý Nga hiăng châ diâp inâi ‘’Vâi kơdrâi pơlê kong xiâm ki má môi hơnăm 2022’’.

Tơdroăng ki pêi tá hiâm mơno dêi tơná ƀă tơdroăng cheăng dêi jâ Nga hiăng châ tơdah tơdroăng ki hâk vâ, nhuô̆m ing pú hmâ, khu pú. Jâ Lê Thị Thu, 72 hơnăm, cô hiăng pêi cheăng 20 hơnăm a Tíu xiâm pói tơngah tối ăm ‘nâi:

‘’Drêng á trâm mêh Nga tung tơdroăng rêh ối nếo, mê á hlo má môi cho tuăn pâ dêi meh, mê cho môi ngế ai hiâm mơno lĕm. Pơtih vâi hdrêng kơchêi kơ-ôk mê meh djâ tơmeăm khăm ăm vâi hdrêng ƀă xo ăm pơkeăng ôu. Ƀă hiâm mơno mê đi đo chiâng pêi tơdroăng ăm vâi hdrêng mê meh pêi tá hiâm mơno tơná’’.

Ƀă tâi tâng tơdroăng ki ‘nâi plĕng ‘na khăm pơlât ƀă hnê hriâm jâ Đỗ Thuý Nga pêi tá hiâm mơno tơná ăm Tíu xiâm Pói tơngah. Tiú ki jâ hiăng têk on trâ eăng dêi tơdroăng phiu ro, hơniâp lĕm, pói tơngah ƀă mâu rơpŏng ƀă mâu vâi hdrêng kơbló, kơmlâm, chó chêng, tơvê kŏng, lơ tuăn ngôa ôh tá tơleăng ƀă inâi ‘’Tíu xiâm Pói Tơngah’’.