Ki tơxâng vâ tối, bú tung măng tĭng kố nah, kơxô̆ mơngế tơngê hiăng tâk hên ƀă lối 210 ngế thế mot pơlât koi a hngêi pơkeăng. Pơreăng tâ tú hên cho a bêng Tuy Hòa, ƀă mâu cheăm Phú Hòa, Đồng Xuân, Sông Hinh, Krông Ana, Ea Súp, Ea H’Leo dêi kong pơlê Dak Lak. Tơdroăng mơdât pơreăng, rak vế ivá mo lĕm ăm kuăn pơlê drêng kố dế cho tơdroăng pêi pro tơdrêng, ôh tá chiâng tơngôu.

Ki xiâm khoh ai pơreăng tâ tú hên ó a mâu thôn pơlê tung cheăm, bêng cho xua kong mêi tô hmâng vâ, pro tơ’lêi ăm mâu tri trô kơtâ chiâng kiâ ngu ngĕng ai kuăn hên chiâng tri trôu kân ‘ngré ‘ngró pâk ‘mot  pơreăng. Ki tô tuăn tâ, a hên pơlê hơngế hơngo, vâi hmâ hdoăng têa mêi tung mâu vó xiâm, vó kân, mâu kơthung ôh tá klâp tơnâp, tơdrêng amê vâi hlối ôh tá vâ mơgrúa krúa lĕm mâu tíu ai têa toăng, ôh tá vâ hvât lôi kế ai têa toăng ki rơtâ tá hngêi dêi mâu kuăn pơlê, pro tơ’lêi ăm mâu tri trôu châ kơtâ ai kuăn hên.

Hlo tơdroăng rơ-iô mê, Tíu xiâm Séa ngăn mơdât pơreăng kong pơlê Dak Lak dế tơrŭm nhên khât ƀă mâu ngế ngăn pơkeăng cheăm bêng tơbleăng mâu tơdroăng pêi pro. Pakĭng xôh pơkeăng kơdê pơreăng, tơdroăng pơtâp trâu rơdâ tâ vâ mơdêk rế kơkê plĕng tung tơdroăng tối tơbleăng hdrối ki tơ’lêi tâ tú pơreăng ing tíu xiâm a mâu hngêi pơkeăng cheăm, bêng dế châ tơmâng pêi pro kơhnâ khât. Tối ‘na tơdroăng pêi xiâm mê, Ƀok thái pơkeăng Lê Phúc, Phŏ ngế pơkuâ Tíu xiâm Séa ngăn mơdât pơreăng kong pơlê Dak Lak ăm ‘nâi:

 “Ngin mơdêk hnê khât ƀă pêi rĕng tơdroăng hbrâ, mơdât vec-tơ, tơkéa vâ tối cho tí tăng ngăn, tah mâu tíu ai tri trôu, ki ngu ngĕng, ôa hdrong, mâu ngế ngăn pơkeăng a mâu Hngêi pơkeăng Cheăm, bêng. Ing mê, mơdêk ivá pơkuâ ngăn dêi vâi vâ rơkê ai tiô tơdroăng tối ăm ‘nâi hdrối ki tơ’lêi tâ tú a tơrêm cheăm bêng vâ hlâu tung tơdroăng tối tơbleăng xuân môi tiah ki tơbrê tung tơdroăng plâ, pơdât tơngê lo mơheăm”.

Ing kơdôu mơ-eăm dêi kơvâ ngăn pơkeăng, mâu rôh plâ mơdât pơreăng tơngê lo mơheăm kô pê klêi tơdroăng cheăng ing kuăn pơlê. Mâ ta tơngôu, tơkôm ai pơreăng ‘nôi nếo mơdât, mê rêm rơpŏng hngêi thế mơdoh 10 phŭt rêm măng tĭng klâp dêi rơxô, kơthung, vó dâ têa,  kơpuih văng krúa dêi hngêi trăng, klông troăng, gô̆m mâu tuih xok chôu tah ƀă hlối hmâ koi kơmăng thế hnhâng kơmung. Thế pêi pro ing tơdroăng ki kŭn ‘nôi vâ râk vế ivá dêi rơpŏng hngêi mo lĕm ƀă rak tơniăn ăm kuăn pơlê tung rơnó mêi kố.