Sap apoăng hơnăm troh nôkố, kong pơlê Dak Lak tối ai 1.518 ngế tro tơngê lo mơheăm a 14 tíu tâ pơreăng, tâk 154% tâng vâ pơchông ƀă hơnăm 2025. Ki tơxâng vâ tối, bú tung măng tĭng hdrối kố nah hiăng ai 210 ngế tơngê lo mơheăm thế lăm pơlât a hngêi pơkeăng tung kong pơlê. Mâu cheăm tối ai hên ngế tro tơngê lo mơheăm malối a bêng Tuy Hòa, Buôn Ma Thuột ƀă mâu cheăm Phú Hòa, Đồng Xuân, Sông Hinh, Krông Ana, Ea Súp, Ea H’Leo...

Ƀok thái pơkeăng Lê Phúc, Phŏ Ngế pơkuâ Tíu xiâm Séa ngăn mơdât pơreăng kong pơlê Dak Lak (CDC Dak Lak), ăm ‘nâi hlo rế hên ngế tro tơngê lo mơheăm achê kố, tíu pêi cheăng dế tơrŭm ƀă mâu khu ngăn pơkeăng a mâu cheăm, bêng, tơbleăng tơdrêng mâu tơdroăng thế hbrâ mơdât tơngê lo mơheăm.

Tung mê, tơmâng mơdêk hnê tối, vâ kuăn pơlê hlê ‘nâi rak krúa lĕm hyôh kong prâi, tah tíu tri trôu kơtâ ai kuăn; hlối tơrŭm ƀă mâu tíu xiâm ngăn pơkeăng tung kơpong, hngêi pơkeăng cheăm, bêng tơkŭm po xôh pơkeăng kơdê kiâ ngu ngĕng, tri trôu a mâu tíu tâ tú pơreăng hên vâ kơdroh pơreăng tâ tú troh mâu tíu ê, hnê pơtâp rơkê tâ nếo ăm mâu khu ngăn pơkeăng cheăm bêng ‘na hbrâ mơdât pơreăng tơngê lo mơheăm.

“Ngin mơdêk tâ nếo ƀă pêi rĕng tơdroăng hbrâ, mơdât vec-tơ, tơkéa vâ tối cho séa ngăn, kơdê tíu ai tri trôu, kiâ ngu ngĕng, ôa hdrong tăng măng hnê ăm khu khu ngăn pơkeăng a cheăm bêng. Ing mê, pêi cheăng khât tâ nếo vâ ai tiô tơdroăng pơkâ thế rơkê tung tối tơbleăng hdrối drêng nhôm tâ tú pơreăng ăm tơrêm cheăm bêng, vâ tơ‘lêi tung tơdroăng tơbleăng tối hdrối xuân môi tiah pêi cheăng tơbrê tâ tung tơdroăng hbrâ mơdât tơngê lo mơheăm”.

Sap apoăng hơnăm troh nôkố, lâp tung kong pơlê Gia Lai tối ai 1.813 ngế tơngê, tung mê ai 1 ngế hlâ. Tâng pơchông ƀă hơnăm 2025, kơxô̆ mơngế tơngê tâk 914 ngế. Vâ hbrâ séa ngăn ƀă mơdât pơreăng tơngê lo mơheăm pôi rế tâk, Tíu xiâm séa ngăn mơdât pơreăng kong pơlê hiăng tơkŭm ăm khu lăm séa ngăn vâ ‘nâi tơdroăng tơngê lo mơheăm, tơdroăng cheăng hbrâ mơdât pơreăng ƀă xôh pơkeăng kơdê pơreăng a mâu cheăm ki xiâm, ki ai hên ngế tâ pơreăng tung măng tĭng hdrối kố nah.

Mê cho, tíu pêi cheăng nếo tơbleăng tăng ngăn a cheăm Bình An. Khu mê, hiăng pêi cheăng ƀă mâu kăn Vi ƀan Kuăn pơlê cheăm, Hngêi pơkeăng cheăm Bình An, Hngêi pơkeăng Tây Sơn ‘na tơdroăng hbrâ mơdât pơreăng tơngê lo mơheăm a kong pơlê,  tơdroăng mơngế tơngê lo mơheăm, tơdroăng xôh pơkeăng tíu tâ pơreăng hên, kơdê kiâ ngu ngĕng, ôa hdrong, tri trôu; tơrŭm ƀă kơjo kum cheăm bêng tơbleăng xôh pơkeăng  a tâi tâng mâu tíu tâ pơreăng tơngê lo mơheăm.

Tiô Khu ngăn pơkeăng kong pơlê Gia Lai, vâ tơdroăng cheăng hbrâ, mơdât tơngê lo mơnheăm châ tơbrê, mâu cheăm bêng kal thế tơbleăng lăm xôh pơkeăng a tíu tâ tú pơreăng; tơmâng tơdroăng kơdê kiâ ngu ngĕng, mơgrúa lĕm hngêi trăng, kơdrum, xut lĕm krúa hngêi ối; hnê kuăn pơlê hbrâ mơdât pơreăng tơngê a mâu rơpŏng hngêi, mâu hngêi trung ƀă tơbleăng tung loa dêi cheăm; tăng ngăn tri trôu ƀă kiâ ngu ngĕng tiô rơnó vâ ai tơdroăng pêi pro teăm tơdrêng mơdât tá ăm pơreăng tâ tú troh lâp lu.

Troh nôkố, kong pơlê Lâm Đồng tối ai 1.126 ngế tơngê lo mơheăm; tối ai 48 ngế nếo tâ tú tung măng tĭng kố ƀă 10 tíu dế tâ tú hên, tơkŭm hên a mâu cheăm bêng mê cho: Dà Huoai, Bảo Lộc, Di Linh, Tánh Linh, Đức Linh ƀă Bắc Bình. Tiô Khu xiâm ngăn pơkeăng kong pơlê Lâm Đồng, mơhé tơngê lo mơheăm rế kơdroh iâ tâng vâ pơchông ƀă hơnăm hdrối, la pơreăng hiăng tâ rĕng tâ tú, hên kơpong tơ‘lêi tâ tú, mơni kô vêh tâ tú nếo tung mâu khế la ngiâ a pơla rơnó mêi.

Vâ hbrâ séa mơdât pơreăng, kơdroh mơngế tâ tú, mơngế ki râ ƀă  mơngế ki hlâ xua tơngê lo mơheăm pro, Khu  xiâm ngăn pơkeăng pâ thế Tíu xiâm Séa ngăn mơdât pơreăng kong pơlê mơdêk tăng ngăn ‘na pơreăng, hbrâ tí tăng nhăn nhên mâu ‘na pơreăng tâ tú tung kong pơlê. Teăm rĕng châ ‘nâi mơngế tro tơngê, tíu tâ tú vâ rĕng xôh pơkeăng kơdê, ôh tá ăm tâ tú troh lâp lu. Hbrâ tŭm trếo pơkeăng, mâu tơmeăm vâ xôh, tơmeăm ki xúa tung tơdroăng hbrâ mơdât pơreăng; tơkŭm lăm ngăn mơnhên vâ ‘nâi tiô rơnó ƀă kơdrâ lăm ngăn a mâu pơlê cheăm ki nhôm tơ’lêi tâ tú hên.