A môi rôh pleăng mơheăm xua Khu tơrŭm ngăn ‘na pêi cheăng a kong pơlê Lâm Đồng tơrŭm ƀă  Khu lo tŏng veăng kong pơlê tơkŭm po a Đà Lạt, nâ Phạm Thị Hồng, ngế tung khu ngăn kơvâ hnê hriâm tối: Kố cho tơdroăng cheăng ki ai pơxúa mê kal pơtối rak vế ƀă tơkŭm pêi đi đo tâ; tơ’mot hên ngế tung pơlê pơla veăng pleăng.

“Drêng tâng tối tơbleăng ai hâi leh pleăng mơheăm a tíu kố mê ngoh o thái cô a hngêi trung vâ xêh lăm pleăng dêi mơheăm, tung tuăn mơno ro ôh tá ai tơchĕng klâi. A tơmiât cho vâ veăng ‘no hnoăng tơná ki kŭn ăm pơlê pơla mê a tâ ro tung hiâm mơno’’.

Kố cho môi tung mâu tơdroăng cheăng pêi tung tơrŭm cheăng pơla Khu tơrŭm cheăng kong pơlê ƀă Khu lo tŏng veăng Lâm Đồng pơla hơnăm 2019-2023, vâ pơtối rak vế tơdroăng pleăng mơheăm kum ăm tơdroăng vâ pơlât tơdrêng, pơlât mâu tơdroăng châi, hbrâ rơnáu lơ ai ngế ki kal vâ tơdrêng mơheăm, vâ ai mơheăm ki vâ kum pơlât tơdrêng.

Nếo achê kố, Khu hnê mơhno mơhnhôk pleăng mơheăm dêi kong pơlê Gia Lai tơkŭm po hneăng hôp mơgêi pleăng mơheăm hơnăm 2022, tơbleăng pơkâ pêi hơnăm 2023. Tiô tối tơbleăng, hơnăm kố lâp tung kong pơlê Gia Lai hiăng tơkŭm mơhnhôk châ 84 rôh pleăng mơheăm, mê hiăng châ xo lối 18 rơpâu CC mơheăm, châ 120% tiô pơkâ hiăng pơcháu. Tung mê, Hngêi pơkeăng Đa khoa kong pơlê Gia Lai hiăng tơdah xo pơlât ăm lối 14 rơpâu 600 CC mơheăm ƀă Hngêi pơkeăng lêng 211 tơdah xo lối 3.300 CC mơheăm. Ai 416 CC mơheăm kal vâ tơdrêng hiăng teăm châ  ăm mâu tíu khăm pơlât vâ pơlât mâu ngế châi tamo.

Pôa Dương Đình Diện - Kăn phŏ pơkuâ ngăn Khu hnê mơhno mơhnhôk pleăng mơheăm, Kăn xiâm hnê ngăn khu lo tŏng veăng kong pơlê Gia Lai, tối:

“Hơnăm 2022 ƀă tơdroăng hnê mơhno kơtăng dêi Vi ƀan kong pơlê xuân môi tiah Khu hnê mơhno mơhnhôk pleăng mơheăm kong pơlê hnê mơhnhôk rế ai hên ngế vâ pleăng mơheăm tung khu râ kuăn pơlê ƀă rế ai hên ngế veăng pleăng mơheăm. Ngin ‘nâi nhên mâu hâi pơtối vâ pêi pro mê ngin mơ-eăm vâ rế hên ngế ai tuăn hơ-ui, pleăng dêi mơheăm vâ tŏng kum mơngế vâ kuăn pơlê kơhnâ veăng pleăng tung la ngiâ”.

A Dak Lak, Khu hnê mơhno pleăng mơheăm kong pơlê xuân hiăng tơkŭm po hneăng Hôp ô eăng mơngế pleăng mơheăm hơnăm 2022. 52 ngế kơhnâ tung tơdroăng pleăng mơheăm hiăng châ ô eăng tung rôh kố. Mê cho mâu ngế ki veăng pleăng mơheăm hên tung hơnăm 2020-2021. Pôa Nguyễn Tấn Chờ, kot mâ hơnăm 1967, ối a thôn Tiến Thịnh, cheăm Quảng Tiến, tơring Čư Mgar, kong pơlê Dak Lak hiăng 48 hdrôh veăng pleăng mơheăm tối tiah kố:

“Á tâ tiah kố kal thế pêi môi iâ tơdroăng ki lâi ‘ló vâ kum ăm mâu ngế ki trâm tơdroăng ôh tá mơhúa tung rêh ối. Troh nôkố á xuân hiăng châ 48 hdrôh pleăng mơheăm ƀă xuân chêh inâi pleăng dêi tơdroăng tung klêa kliâm ‘nâ hía xo ah hmôi pin hlâ ‘lo mê pin xuân hiăng ai ‘măn dêi ki klâi hía ‘lo ăm rơxông tơná,  pleăng ăm ê ki ê.

Xua cho ngế kuăn tung rơpŏng hngêi á xuân lăm pleăng mơheăm ƀă á xuân vâ pơchân ăm rêm ngế, pin pôi tơchĕng tơmiât phá tơ-ê tung tơdroăng ‘na pleăng mơheăm ki tối pro ‘mêi ivá, mơheăm akố, ki hdrối cho pin tŏng kum kuăn mơngế. Má péa, nếo gá kum ăm tung châ pin châ pơ’lêh mơheăm, châ pin kô mo lĕm tâ ôh tá pro ‘mêi klâi ăm ivá’’.

Dak Lak cho môi tung môi chât to kong pơlê ki pơkuâ djâ ăm tung lâp tơnêi têa ‘na tơdroăng mơhnhôk pleăng mơheăm tŏng kum mơngế. Kong pơlê nôkố ai 200 khu hnê mơhno pleăng mơheăm a rêm râ; 8 Kâu lăk ƀô̆ mơhnhôk pleăng mơheăm ƀă pleăng mơheăm hbrâ ‘măn lôi hdrối... Tâng riân rêm hơnăm ai dâng 30 rơpâu ngế chêh inâi pleăng mơheăm, tơdah xo lối 20 rơpâu CC mơheăm.

Jâ H’Yim K’Đoh, Kăn phŏ hnê ngăn Vi ƀan kong pơlê, Ngế pơkuâ hnê mơhno Pleăng mơheăm kong pơlê Dak Lak ai tối tiah kố, ai tiah mê cho kơnôm a tơdroăng mơ-eăm dêi mâu ngế tung Khu hnê mơhno mơhnhôk pleăng mơheăm rêm râ, mâu khu tơrŭm cheăng, mâu ngế, kong pơlê ƀă pêi pro tơdroăng ki lĕm dêi mâu ngế ki pleăng mơheăm.

“Tung  la ngiâ pơtối krếo thế mơhnhôk hên ngế veăng pleăng mơheăm tâ, ƀă púi vâ tâi tâng mâu ngế ki dế mo sêi têi ‘răng veăng pleăng mơheăm tơná ăm mâu ngế châi tamo. Kố xuân cho tơdroăng tơngah ăm tâi tâng rêm ngế ki châi tamo ƀă pin loi khât tiah kố ƀă tơdroăng mơ-eăm khât dêi tâi tâng khu cheăng kal kí tơdrêng ƀă tâi tâng mâu hdroâng kuăn ngo kong pơlê Dak Lak kô ai hên rôh châ hnê pleăng mơheăm ăm mơngế ki châi tamo vâ vâi ai tơdroăng rêh ối tơniăn lĕm tâ’’.

Nếo a chê kố, a pơlê kong kơdrâm Buôn Ma Thuột  xuân hiăng po leh tơbleăng Kâu lăk ƀô̆ khu ai mơheăm RH - kong pơlê Dak Lak. Kâu lăk ƀô̆ mê ai 3 khu ƀă 43 ngế, cho mâu ngế ki ai  khu mơheăm RH - khu mơheăm ki mê iâ mơngế ai. Kố cho tíu tơkŭm, tơrŭm môi tuăn dêi mâu ngế tung khu vâ mơjiâng khu pleăng mơheăm hbrâ rơnáu, pro ai mâu ngế ki ai khu mơheăm mê veăng pleăng mơheăm tơniăn.